3 Me acha me acha, Elikana ìkikpukpulu ebi ototun̄ ukan̄ kan̄ isa igbaalek ije inan̄a me ama kiban̄ isi ama Silo isi itọbọ ebum inyi Okumugwem Ogwukaan̄ Inyọn̄ mè Ijọn̄, mè igwa si ngwugwa inyi ọmọ. Me Silo ya, Ofini mè Fineyas, bọn ebirieen̄ iba kè Ilai, ere ebi ngwugwa ìkigwa ngwugwa inyi Okumugwem. 4 Usen geelek Elikana ogwabe ngwugwa inyi Okumugwem, îra ikiche uche inorie ngwugwa ya inyi ogwu nwa Penina mè ebi bọn ebirieen̄ mè ebibaan̄. 5 Ire, ìkiche irek ge eyi môsobe ene iba inyi Ana, mije îmabe ọmọ enenen, mè mije Okumugwem ogonbe owot kè Ana ichit, inyi ikaman gwun̄. 6 Mije Okumugwem ogonbe owot kè Ana ichit, Penina ogwu uwuk kan̄ okekirọ ọmọ nnaan̄ me lek, inyi ikinaan̄ ejit. 7 Ikeyi ke Penina okpọkpọ ikisisaak Ana me acha me acha mgbọ ema ekisi Uwu Mbuban Okumugwem me Silo, ire lek, Ana îra ikito ito, mè ikijit irerie inorie. 8 Elikana ogwu olom îra ikitumu inyi ọmọ ibe, “Ana, ìre keke orọ owu okito ito? Ìre keke orọ mè owu òjit irerie inorie? Ìre keke orọ okifieek ejit ikeyi? Ìre emi ǹkafat ìnwọn ìgak akọp nsabọn ebirieen̄ ìsa ìnyi owu ni?”

9 Usen ge, me Silo, mgbọ ema eriebe inorie mè inwọ miin̄ isan̄a, Ana onanan̄a ikeke. Me ike mgbọ ya, Ilai ogwu ngwugwa ọmọ òwa osikibe ikweek me inyọn̄ ikasi me agba isotu Uwu Mbuban Okumugwem. 10 Ejit îsisaak Ana enenen. Inenisa me ujat ejit ya isi isi Okumugwem isi iriaak uriaak, mè ito ito ujat ujat inyi Okumugwem. 11 Me emen uriaak kan̄, Ana onyanyan̄a ibot ibe, “Jei Okumugwem Ogwukaan̄ Inyọn̄ mè Ijọn̄, me atikọ, soso raan̄ chieen̄ kpọ ijo irek n̄a, mè keek emi gwun̄ usun̄ kwun! Soso, kawuuk emi! Me atikọ, ire owu okeek emi, mè inyi emi gwun̄ enerieen̄, nchieek use ibe ke mâyaka gwun̄ ya inyi owu Okumugwem, ibe ikisi ikwaan̄ inyi owu otutuuk usen ugwem kan̄. Akwaan̄ ìkpochak ọmọ me ibot isọp ọmọ ijeek mgbọ geege.”

12 Mgbọ Ana okiriaak uriaak ya, Ilai okekikpọ ubọk ukpọk-otu kan̄ okije me lek uriaak ya. 13 Ana ìkiriaak uriaak ya me emen ejit, ida kan̄ ìkasibi, ukpọk-otu kan̄ gaalek okisisik. Eya orọ, Ilai okekikeek ibe ke Ana înwọ miin̄ isa, 14 mè itumu inyi ibe, “Ìre kpa mgbọ ke owu obonwọ miin̄ isa ire? Tele usa-miin̄ kwun̄!”

15 Ana ofọfọọk Ilai ibe, “In̄-in̄, ogwu nte, emi ìre enenwaan̄ òkaan̄ ikpele unan me ejit. Ǹkanwọ miin̄ geege mè ìre unye miin̄ geege. Gaalek ǹkiben ufialek òkup emi me ejit ikpa inyi Okumugwem. 16 Kamọnọ emi ogwu usun̄ kwun̄ enenwaan̄ kubọk enenwaan̄ ogwu ìkakup me lek inu geege. Îre ikpele ufiak òkup emi me ejit mè ikpele ufieejit òkup emi me emen ke nkikpa inyi Okumugwem mege inire mgbọ keyi.”

17 Ilai onenitumu inyi Ana ibe, “Fo me esuuk! Awaji ebi Ijeren irọ mbeek geelek obeekbe me ubọk kan̄ inyi owu!”

18 Ana ofọfọọk Ilai ibe, “Owu onirọ me lek ata ejit okaan̄be me lek ogwu usun̄ kwun̄ enenwaan̄!” Ana itutumu ikọ ya isan̄a, ijeje ifo. Bene me mgbọ ya, ikekirie inorie, ìkayaka ìkifieek ejit ofifi.

19 Me ata otu ewelegwe ofit iwele kan̄, Elikana mè ebi ototun̄ ukan̄ kan̄ ebobolo chieen̄, mè itọbọ ebum inyi Okumugwem, mè ininan̄a me Silo ika inu Rama, ama kiban̄. Elikana onenigọọk Ana ogwu nwa ilaak. Okumugwem onenikeek Ana. 20 Sọnja mgbọ iraraka, Ana oninin̄ owot, mè iman gwun̄ enerieen̄, mè inyi erieen̄, Samien, mije ke ọmọ ìbebeek gwun̄ ya me ubọk Okumugwem.

21 Inenire ofifi ibot mgbọ, Elikana onenisa ebi ototun̄ ukan̄ kan̄ inan̄a isi Silo isi igwa ngwugwa inyi Okumugwem, mè isan̄a use îchieekbe, kubọk îkirọ acha geelek. 22 Ire, Ana ìkagọọk ema ìsi. Itutumu inyi ogwu olom ibe, “Mâkup mege ire mgbọ gwun̄ yi môbanbe ebe. Mgbọ ya, mânenisa isi, mè esa esi me isi Okumugwem, inyi ikup me ere ya ire mgbọ geelek.”

23 Elikana, ogwu olom ofọfọọk ọmọ ibe, “Inu geelek ònwọnwọn me lek kwun̄, rọ si ikeya. Kup re mgbọ gwun̄ môbanbe ebe. Kè Okumugwem irọ ikọ kan̄ iso.” Ikeya ke Ana owalek ikup, mè ikinyi ogwu gwun̄ ebe mege ire mgbọ îbanbe ebe.

24 Mgbọ gwun̄ ya obanbe ebe, Ana obeben gwun̄ ya isa isi Uwu Mbuban Okumugwem me Silo. Îsa si eriembuuk acha ita^b mè akpa ekọkọk môsobe akọp iko iba mè ita, mè itap miin̄ ijot ogbokot ikpa anam isa igbaalek isi ije ya. Me ike mgbọ ya, gwun̄ ya ìre sọn̄ gwun̄. 25 Enenigwu eriembuuk ya me ere ya isa igwa ngwugwa, mè iniyaka gwun̄ ya itap me ubọk kè Ilai. 26 Ana onenitumu inyi Ilai ibe, “Ogwu nte, kpọ! Ìre oyaka ikeek emi? Îre emi nre ogwu enenwaan̄ ya ogwu mgbọ òkekeke me ere keyi me agba lek kwun̄ ikiriaak uriaak ibeek mbeek me isi Okumugwem. 27 Îre sọn̄ gwun̄ yi ke mbeek me ubọk Okumugwem, Okumugwem orọrọ mbeek n̄a ya eyi mbeekbe ọmọ inyi emi. 28 Eya orọ, emi si nyaka isa ọmọ iniche inyi Okumugwem. Me otutuuk usen ugwem kan̄, ọmọ ìre uche isa inyi Okumugwem.” Gwun̄ ya obabia me ere ya ikitọbọ ebum inyi Okumugwem.