Akis ofọfọọk ebi ibot akọn̄ Filisia cha ibe, “Îre Debit, ogwu ikwaan̄ kè Sọọlu ogwu ubọọn̄ ebi Ijeren ogwu òlilibi itele nte uwu kan̄, mè ikana inu inigọọk emi iluk karake acha ge mè urot. Karake înube inigọọk emi iluk mege inire cherekeyi, ǹkamumun̄ ijo inu geege me ugwem kan̄.”

4 Ire, ebi ibot akọn̄ Filisia enanaan̄ ejit me lek kè Akis, mè itumu inyi ibe, “Ria ogwu enerieen̄ yi inyi igwu ikom ifo ere owu osun̄be inyi. Eji kpeweek ibe ene yi igọọk eji isibi isi oyet akọn̄, inyi ikakana ogwu oriara ìnyi eji me oyet akọn̄. Ire ene yi igọọk eji isi akọn̄, ìkpolọlọ ikpakpan̄ ebi kiji, mè ifieek ibot kiban̄ isa isi ijeen̄ nte uwu kan̄, inyi nte uwu kan̄ ibele ejit me lek kan̄. 5 Ìre ìkafat ìre ogwu enerieen̄ keyi ke ekọt me okwa ibe, ‘Sọọlu îkpan̄ eyi kan̄ me obop me obop, Debit okpan̄ eyi kan̄ me akọp akọp obop’?”

6 Akis ogwegwen Debit itumu inyi ibe, “Kè lek ugwem Okumugwem, emi mmun̄ ibe ke owu ìre ogwu kpunube ofiaan̄ geege me emen, ubọk owu melek n̄a ekisibi isi irieen̄ akọn̄ mè ikiyaka ika îneme emi. Emi ǹkamun̄ ijo inu geege me emen kwun̄ bene me usen onube me lek n̄a mege inire chereyi. Ire, ebi ibot akọn̄ Filisia kpeweek owu. 7 Eya orọ, gwu kom fo me esuuk, inyi okarọ inu geege ìlọ me chieen̄ ebi ibot akọn̄ Filisia.”

8 Debit onenido Akis ibe, “Ìre keke ke nrọ ilọ? Sà ìre kpasi nrọ-nlọ ke owu omun̄ me lek n̄a kubọk ogwu usun̄ kwun̄ karake nnube inigọọk owu iluk mege inire cherekeyi? Ìre keke ke nrọ, eyi òrọrọ ibe emi m̀kpagọọk isi itim akọn̄ me lek ebi ochicha ogwukaan̄ n̄a, ogwu ubọọn̄?”

9 Akis ofọfọọk Debit ibe, “Nriọọn̄ ibe ke owu onwọn me lek n̄a kubọk ogwu osat Awaji. Ire, ebi ibot akọn̄ Filisia mîra ibe owu okagọọk ema ìsi akọn̄ yi. 10 Eya orọ, me ata otu ewelegwe, utoon̄ egwe isikimumọọn̄ inu, owu melek ebi ikwaan̄ nte uwu kwun̄ ebi ìgọgọọk owu inu, ìnan̄a ìkeke, mè ìgwu ìkom ìfon!”

11 Mije keya, Debit melek ebi kan̄ enanan̄a ikeke me ata otu ewelegwe, mè igwu ikom ifo ido ebi Filisia. Ebi akọn̄ Filisia enanan̄a ije isi agan̄ Jesereli.