3 Mgbọ Debit mè ebi kan̄ enube inire ama ya, ukan̄ îtaka ama ikpukpuku, mîkpulu ebi nwa kiban̄ mè bọn kiban̄ ebirieen̄ mè ebibaan̄ isan̄a me usun̄ akọn̄. 4 Ema etataan̄ ukpo ikito ito, mè ito ito abayaage, ire lek kpeyaka ikaan̄ efuuk isasa ito ito. 5 Ebi Amalek mîkpulu si ebi nwa iba kè Debit, Ayinowam ogwu Jesereli, melek Abigen ogwu nwakpa kè Naban ogwu Kamen igbaalek. 6 Atalek ikpele ufialek oninin̄ me lek kè Debit, mije, ebi kan̄ cha ekitumu ibe ke mêteen̄ ewuuk isa itọbọ Debit ikpan̄ bak me lek ikpele unaan̄-ejit eyi ema ekamun̄ge bọn kiban̄ ebirieen̄ mè ebibaan̄. Ire, Okumugwem Awaji kè Debit okakat Debit ejit.

7 Debit onenibe Abiata ogwu ngwugwa, gwun̄ kè Ayimelek isa mgbidim ofọnti ikwaan̄ ngwugwa ijet ọmọ. Abiata osasa ofọnti ya ijet Debit. 8 Debit onenido Okumugwem ibe, “Ìre ǹjibi akọn̄ ǹgọọk ebi urum akọn̄ cha? Ìre mâsoon̄ ema?”

Okumugwem ofọfọọk Debit ibe, “Iin̄, jibi akọn̄ gọọk, ke owu òkpolọlọ isosoon̄ ema. Owu môbọkọ si ebi kwun̄ isibi me ubọk kiban̄ me atikọ.” 9 Debit mè efit ebirieen̄ gweregwen, ebi melek kan̄, enanan̄a isibi igọọk ife cha mege isi ire lek gwun̄ okolo ge ekigwen Besoru. Usini kiban̄ ebabia me agba lek okolo ya mije uwọ-lek. 10 Debit mè efit ebirieen̄ ini kan̄ ebi efuuk osikbe me emen etetet lek inye ikigọọk si ebi Amalek cha. Efit ebirieen̄ iba ebi efuuk otabe me emen ebabia me agba lek okolo Besoru ya.

11 Me oniin̄ ije kiban̄, ebi melek kè Debit enenimun̄ ogwu Ijipiti ge ogwu uraafiọọn̄ otetbe, mè isa inu me lek kè Debit. Ema eneninyi ogwu ene ya inorie, irerie, mè inyi si mudim, inwọnwọ. 12 Ema enyi ogwu ene ya okpọkọ nchicha figi ge mè nchicha gerep iba. Ogwu ene ya ìkarie inorie geege, ìkanwọ si mudim geege ototuuk egwe ita mè eririeen̄ ita òraraka. Eya orọ, irerie inorie ya mè inwọ mudim ya isan̄a, lek kan̄ oyayaka ititiin̄.

13 Debit onenido ogwu enerieen̄ ya ibe, “Owu ìre gwun̄ uwu kè ekene? Ìre ònan̄a me owa?”

Ogwu ene ya ofọfọọk ibe, “Emi ìre ogwu Ijipiti. Ǹkisi ikwaan̄ inyi ogwu Amalek ge. Eyi mè ọmọ oso usen ita orukan̄ otetbe emi. Îre mije keya ke nte uwu n̄a ojit emi itele. 14 Eji ejibi akọn̄ isi èwê agan̄ osiki ido ebi Keret, mè agan̄ ebi Juda, mè emen èwê agan̄ osiki ere ebi owot iman kè Kelep elukbe, mè itap ukan̄ iwọp ama Sikilagi.”

15 Debit onenido ogwu enerieen̄ ya ibe, “Ìre owu môkọt isa emi isi ijeen̄ ere ebi urum akọn̄ cha ekupbe?”

Ogwu enerieen̄ ya ofọfọọk Debit ibe, “Ire owu osa Awaji inyan̄a ibot inyi emi ibe ke owu òkpokpan̄ emi, òkpokana si emi itap me ubọk nte uwu n̄a, emi mâsa owu isi ijeen̄ ere ife cha ekupbe.”

16 Ogwu enerieen̄ ya onenisa Debit isi ijeen̄ ere ebi urum akọn̄ cha ekupbe. Ema emumun̄ ubọk ife cha eyatbe iwele ijot inyọn̄ ijọn̄ ere ya, mè ikirie, mè ikinwọ, mè ikinwọọn̄ lek me lek ogbogbo inu cha ekpulube me akọn̄ me ido ebi Filisia mè ido ebi Juda. 17 Debit melek ebi kan̄ ejijibi akọn̄ inin̄ lek ebi ife cha ibene me mgbọ utun onimbe me usen ya, mè itim ema akọn̄ me lek mege ifit egwe òso usen iba kan̄, mè ikpan̄ ema nsebe nsebe. Gaalek efit nsabọn irieen̄ ini kpọi ewulu inene inyọn̄ aligọ kiban̄, mè ilibi inwọnọ. 18 Debit obọbọkọ otutuuk inu kiban̄ ebi ife cha ekpulube, mè ibọkọ si ebi nwa kan̄ iba cha. 19 Kpunu inu kiban̄ geege òchechep. Ene geege si ìkachep, mè ìre ebi asasa mè ìre ebi ilile, ibene me lek bọn kiban̄ ebirieen̄ mè ebibaan̄ ire lek otutuuk inu kiban̄ geelek ebi ife cha ekpulube. Debit îbọkọ otutuuk isa ika. 20 Debit okpukpulu si otutuuk arọọn̄ mè eriembuuk. Ebi kan̄ ekekisa arọọn̄ mè eriembuuk cha ikije me isi ofifi anam kechilọ, mè ikitumu ibe, “Echichi ìre inu Debit ofumbe me akọn̄!”

21 Debit mè ebi melek kan̄ enenije ire lek efit ebirieen̄ iba cha, ebi mgbọ lek owọbe ekakọtge ìgọọk ìje ìnyi isi cha, ebi ìbabia me agba lek okolo Besoru. Mgbọ ife cha ebenebe chieen̄ imun̄ Debit, ema enanan̄a ije inu inikweek Debit mè ebi melek kan̄ me ejit oniin̄. Debit otọtọp ema amọn, mè ido ubọk lek kiban̄ okupbe. 22 Ire, otutuuk ebi ijo ife mè ebi unye-ibot me etete ebi ìgọgọọk isi akọn̄ ya ekekitumu ibe, “Ogwu ìkagọọk ìsi akọn̄, kpebenyi ene ya inu geege ònan̄a me isi akọn̄. Gaalek, ogwu ikup, ikpulu ogwu nwa mè ebi bọn isa ifo!”

23 Debit otutumu inyi ema ibe, “In̄-in̄ ebi ngwan̄ n̄a! Enyi kpeberọ ikeya me lek inu Okumugwem onyibe eji! Okumugwem îbem eji, mè ikana ebi urum akọn̄ cha ìrọrọ eji nnaan̄ me lek itap eji me ubọk! 24 Ìre ekene obochieek me lek ojelek ikọ kecha enyi ekitumu? Ogwu òsi akọn̄ mè ogwu òkup ikikpọ chieen̄ me lek nroon̄ uwu kiji ebekaan̄ uche ìkike! Agan̄ ge ìkpokaan̄ iwa igak agan̄ ge!”

25 Sa me ikeya, bene me usen ya nyi isi, inu ya okakana ikan mè orọmijọn̄ me ido Ijeren mege inire cherekeyi.

26 Mgbọ Debit okabe inire Sikilagi, ineniche inu cha ema ekpulube me isi akọn̄ iria ijet ebi ugane me Juda, ìrere ebi une kan̄, mè ilook ema etip igbaalek ibe, “Eyi ìre uche òre enyi lek inan̄a me lek inu eji efumbe akọn̄ eji etimbe me lek ebi ochicha Okumugwem.” 27 Debit îche inu cha inyi ebi une kan̄ ìluk me Beten, mè ebi ìluk me Ramot me emen èwê agan̄ osiki, mè ebi ìluk me Jatiri, 28 mè ebi ìluk me Aroweri, mè ebi ìluk me Sifimot, mè ebi ìluk me Esitemowa, 29 mè ebi ìluk me Rakali, mè ebi ìluk me ama ebi Jerameli, mè ebi ìluk me ama ebi Keyin, 30 mè ebi ìluk me Oruma, mè Boru Asan, mè ebi ìluk me Atak, 31 mè ebi ìluk me Eburọn. Debit îche uche cha iso ebi une kan̄ ebi ìluk me otutuuk ama geelek ere ọmọ melek ebi kan̄ ejijen̄ebe ikana me mgbọ ema ekilibi ekot ugwem.