Samien
Eyi Òso Iba
Debit înọ etip mkpa kè Sọọlu
1
Mgbọ Sọọlu okwube iraka, Debit oneninan̄a me isi akọn̄ ere îtimbe ikpan̄ ebi Amalek ika inu Sikilagi, mè inikup me ere ya isiki efuuk usen iba. 2 Me òso usen ita, ogwu enerieen̄ ge ònan̄a me isi akọn̄ ere Sọọlu okitim akọn̄ onenikana isibi, melek achiaan̄ me ibot, mè ngwak ofọnti me lek, eyi òkijeen̄ ibe ke ìkup me ufieejit. Mgbọ ogwu enerieen̄ ya onube inire isi kè Debit, igegele igwook me ijọn̄ inyi ọmọ umin.3 Debit onenido ọmọ ibe, “Ìre onan̄a me owa?”
Ogwu enerieen̄ ya ofọfọọk ibe, “Me orieen̄ akọn̄ ebi Ijeren ke nnan̄a ilibi inwọnọ mkpa.”
4 Debit onenibe ọmọ, “Keke orọ me ere ya? Kpa-nu nyi emi!”
Ogwu enerieen̄ ya onenikpa inyi Debit ibe, “Ebi Ijeren elililiin̄ inan̄a me isi akọn̄. Owuwa ene mîkwaan̄ me akọn̄. Ògak ge, Sọọlu mè Jonatan ogwu gwun̄ mîkwaan̄ si inin̄ me akọn̄.”
5 Debit onenido ogwu enerieen̄ òsa etip ya inilook ọmọ ibe, “Owu òjeje iriọọn̄ ibe ke Sọọlu mè Jonatan ogwu gwun̄ mîkwaan̄?”
6 Ogwu enerieen̄ ya ofọfọọk si ibe, “Emi òwa me inyọn̄ ogoon̄ Gilibowa nkupbe mgbọ inu ya orọbe. Ǹsasa chieen̄ n̄a imun̄ ike Sọọlu obieen̄be lek me lek otunwa kan̄, mè imun̄ si uji akọn̄ ebi ochicha mè ebi ìkikọp inyinya akọn̄ ekilibi inin̄ ọmọ lek ibenimeen̄ ọmọ. 7 Ineniraan̄ chieen̄ imun̄ emi, mè igwen emi. Nchechieek, mè ibe ọmọ, ‘Kpọ emi gwu.’
8 “Inenido emi ibe, ‘Owu ìre ekene?’
“Mfọfọọk ibe ke emi ìre ogwu Amalek.
9 “Ibebe emi, ‘Soso, je na me ere keyi, na keke gon emi kpan̄, ke unan înin̄ emi lek igbet mkpa, ire, ǹkakwu-nu.’
10 “Njeje isi, mè igon ọmọ ikpan̄. Mije, nriọọn̄ ibe ke ìkpokọt iyaka igat ugwem ofifi, bak me lek uga unan òninin̄ ọmọ lek. Nnenisan̄a okpibot ubọọn̄ òkup ọmọ me ibot, mè isan̄a si akalari ubọọn̄ òkup ọmọ me ubọk. Ogwu nte, kpọ inu cha ire echi nsabe ijet owu.”
11 Mgbọ Debit onọbe inu ya òrọrọ, isasa me ufieejit itaba ofọnti òkup ọmọ me lek igwak, otutuuk ebi melek kan̄ etataba si ofọnti kiban̄ igwak. 12 Ema efefieek ejit, mè ito ito, mè ijin otu, kperie inorie geege usen ya mege ifit egwe mije kè Sọọlu mè Jonatan ogwu gwun̄, mè ebi akọn̄ Okumugwem, mè otutuuk ebi Ijeren, mije owuwa kiban̄ ekwaan̄be me akọn̄.
13 Debit onenido gwun̄ enerieen̄ òsa etip ya inilook ọmọ ibe, “Ònan̄a me owa?”
Gwun̄ enerieen̄ ya ofọfọọk ibe, “Emi ìre gwun̄ ogwu Amalek ge. Ǹkiluk me etete kinyi, me ido kinyi.”
14 Debit onenibe ọmọ, “Owu òjeje ikat ejit ikpan̄ ogwu Okumugwem otọkọbe aran̄ me ibot, ukpook ìkatet owu!”
15 Debit oneninyi ene ge me lek ebi akọn̄ kan̄ ida ibe, “Je nin̄ lek gwun̄ yi, mè kep kpan̄!” Ogwu ene ya osasa oge akọn̄ kan̄ ichim gwun̄ enerieen̄ ya, ikwukwu. 16 Debit otutumu inyi gwun̄ enerieen̄ ya ibe, “Eje kwun̄ ìtoon̄ owu me ibot. Mije, îre owu osa otu kwun̄ gaalek itumu isibi ibe ke îre owu okpan̄ ogwu Okumugwem otọkọbe aran̄ me ibot.”
Debit îkọt okwa ito inyi Sọọlu melek Jonatan
17 Debit onenikọt okwa ito keyi me ibot kè Sọọlu mè Jonatan ogwu gwun̄, 18 mè inyi si ida ibe ejeen̄ ebi Juda okwa ito yi, eyi ekigwen “Okwa Ito Ogbaan̄.” (Mîge okwa yi me emen Ikpa kè Jasia.) Okwa ito ya ìje ikeyi:
19 “Uja ebi Ijeren mîkwaan̄ irurọn̄ọ me inyọn̄ ogoon̄!
Jei! Ikpele ebi usọ akọn̄ mîkwaan̄ ita!
20 Ikakpa inu yi me Gat,
ikalolook si me lek oniin̄ Asikelọn,
inyi ebibaan̄ Filisia ekabele ejit,
inyi bọn ibaan̄ ido ebi
kpefieek afi ekanwọọn̄ unwọọn̄.
21 Enyi ebi kè ogoon̄ Gilibowa,
mbat geege, mè ibot geege
ikayaka ìrep ìgwook me inyọn̄ kinyi,
melek inyọn̄ ijọn̄ kinyi cha
òkisibi akpa ekisa igwa ngwugwa!
Mije, ere ya ke echaka mbuban me lek agbọ ebi usọ akọn̄;
agbọ kè Sọọlu, kpebeyaka ikiken aran̄ me lek.
22 Ogbaan̄ kè Jonatan ìkawaka ìrọn̄,
oge akọn̄ kè Sọọlu si ìkayaka ìka ukpọk ukpọk ìtele
eje ebi ekpan̄be me akọn̄
melek ufuk ebi usọ akọn̄.
23 “Sọọlu mè Jonatan ìre ebi emabe
mè ebi ìnwọnwọn me ògat ugwem kiban̄,
me mkpa, ge ìkatele ge.
Ema mîgwat igak igo,
mè inye lek igak egbe àtat.
24 Jei ebibaan̄ Ijeren,
ìto ito ìnyi Sọọlu,
ogwu òsasa unye otu ewe ekwut eje eje
mè ujuja inu nken ibala enyi lek,
mè irọ ibe enyi eketap ofọnti òkaan̄ alata araran̄ me lek.
25 Jei! Ikpele ebi usọ akọn̄ mîkwaan̄ ita me akọn̄!
Jei, Jonatan, owu okwu ilaak me inyọn̄ ogoon̄!
26 Jonatan ngwan̄ n̄a, mfieek ejit inyi owu;
owu onwọn melek n̄a enenen.
Imumechieen̄ okaan̄be me lek n̄a îmin enenen;
îdọk enenen igak imumechieen̄ ebibaan̄.
27 Jei! Ikpele ebi usọ akọn̄ mîkwaan̄ ita!
Jei! Ogbogbo nroon̄ akọn̄ îchieen̄ ita dìp dìp!”