2 Debit onenisi itim si akọn̄ me lek ebi Mowabu, mè itim ikpan̄ ema. Inenibe ema elilam me ijọn̄, ene ge me agba lek ge, mè inisa olik itọ-inu ikitọ isaba ema. Isitọ olik ita, môkpan̄ otutuuk ebi olik iba osababe, mè itele ebi olik ge osababe. Sa me ikeya ke ebi Mowabu enikana usun̄ inyi Debit, mè ikikpe otitip mkpulu inyi Debit.

3 Debit onenitim akọn̄ me lek kè Adadeja, gwun̄ kè Reyobu, ogwu ubọọn̄ Soba, me mgbọ Adadeja obosi ikpọk ibọkọ agba okwaan̄ Yuferetis ikikpulu. 4 Debit otitim ikpan̄ ọmọ, mè ibọkọ obop uji akọn̄, mè ebi akọn̄ ìkikọp uji akọn̄, obop ene jaaba, mè ibọkọ si ebi akọn̄ ukot ukot, akọp obop ene iba. Ifafaan̄ ukot otutuuk inyinya kiban̄ isik efit inyinya uji akọn̄ gaalek.

5 Ebi Aram ìnan̄a me Damasikọs enunu ibenitap ubọk inyi Adadeja ogwu ubọọn̄ Soba, Debit okpakpan̄ akọp obop ebi akọn̄ iba mè obop iba me lek kiban̄. 6 Debit oneninama okwukwek akọn̄ me agan̄ Damasikọs me ido Aram. Ebi Aram enenikana usun̄ inyi Debit, mè ikikpe otitip mkpulu inyi ọmọ. Okumugwem okekinyi Debit ntim-mkpan̄ me ere geelek îsibe.

7 Debit onenikpulu otutuuk agbọ alata araran̄ îbọkọbe me ubọk ebi ibot akọn̄ kè Adadeja isa ika inu Jeruselem inisun̄. 8 Ogwu ubọọn̄ Debit îkpulu inu esabe ekwe irom òwawa enenen me Beta^a mè Berotai, ama ile cha òkup me irak mkpulu kè Adadeja, isa ika inu Jeruselem inisun̄.

9 Towu,^b ogwu ubọọn̄ ido Amat, oneninọ ibe ke Debit îtim ikpan̄ otutuuk urum akọn̄ kè Adadeja, 10 mè iniria ogwu gwun̄, Joram,^c ibe isi itọp ogwu ubọọn̄ Debit amọn, mè itọn̄ ọmọ me lek akọn̄ îtimbe ikpan̄ Adadeja. Adadeja îtim akọn̄ me lek kè Towu owuwa mgbọ. Joram osasa owuwa inu alata okuket mè echi alata araran̄ mè echi ekwe ikaan̄ me ubọk ijet Debit.

11 Ogwu ubọọn̄ Debit ofafaka inu cha itap me ubọk Okumugwem, ike îrọbe me lek otutuuk alata okuket mè alata araran̄ mè ekwe geelek îbọkọbe me ubọk ebi ido geelek îtimbe ikpan̄, 12 òrere ebi Edọm, mè ebi Mowabu, mè ebi Amọn, mè ebi Filisia, mè ebi Amalek. Ubọk yaage si ke îfaka otutuuk inu îkpulube me akọn̄ îtimbe melek Adadeja gwun̄ kè Reyobu, ogwu ubọọn̄ Soba, itap me ubọk Okumugwem.

13 Mgbọ Debit okpan̄be akọp mè obop ebi akọn̄ Edọm jeeta me iteke Uchi, mè ikigwu ikom ika, etip kan̄ okekitaan̄ ikana ere.

14 Debit oneninama okwukwek akọn̄ me otutuuk Edọm. Otutuuk ebi Edọm ekakana usun̄ inyi ọmọ. Okumugwem okekinyi Debit ntim-mkpan̄ me ere geelek îsibe.

15 Debit okekikpulu otutuuk Ijeren, mè ikirọ inu ònenen, mè itat me lek otutuuk ebi kan̄. 16 Jowabu, ogwu ogwu uga orebe Seruya ore ogwu ibot ebi akọn̄ kè Debit, sà Jiosefat gwun̄ kè Ayiludu ore ogwu òkige mfufuk; 17 Jadọk, gwun̄ kè Ayitubu, mè Ayimelek, gwun̄ kè Abiata ere ebi ngwugwa; Seraya ore ogwu uti ikpa; 18 Benaya, gwun̄ kè Jeyoyada, ore ogwu ibot inyi ebi Keret mè ebi Pelet ebi ìkibem Debit, sà bọn ebirieen̄ kè Debit ere ebi ibot mkpulu.^d