Debit îkaan̄ ata ejit me lek kè Mefiboset
9
Debit onenikidido ibe, “Ìre îkaan̄ ogwu òyayaka isik me uwu kè Sọọlu, inyi mâjeen̄ ene ya ata ejit, mije kè Jonatan?”2 Îkaan̄ ogwu ikwaan̄ uwu kè Sọọlu ge ekigwen Siba. Enenigwen ogwu enerieen̄ yi ijet Debit. Ogwu ubọọn̄ Debit onenido ọmọ ibe, “Ìre owu ore Siba?”
Ifọfọọk ibe, “Iin̄, îre emi usun̄ kwun̄.”
3 Ogwu ubọọn̄ onenido ọmọ ibe, “Ìre kpunu ene geege òsisik me uwu kè Sọọlu, ogwu mâkọtbe ijeen̄ ata ejit eyi Awaji me lek?”
Siba ofọfọọk ogwu ubọọn̄ ibe, “Iin̄, îkaan̄ gwun̄ kè Jonatan ge òsisik. Ire, îre akọọk me ukot iba.”
4 Ogwu ubọọn̄ ododo ibe, “Mọmọ gwun̄ ya?”
Siba ofọfọọk ibe ke ìkup me uwu kè Makiri, gwun̄ kè Amien, me ama Lo-Deba.
5 Ogwu ubọọn̄ Debit oneniria ibe esi esa gwun̄ ya me uwu kè Makiri, gwun̄ kè Amien me Lo-Deba, ejet ọmọ.
6 Mgbọ Mefiboset gwun̄ kè Jonatan gwun̄ kè Sọọlu, onube inire isi kè Debit, igegele igwook me ijọn̄ inyi Debit umin.
Debit onenigwen ọmọ, “Mefiboset!”
Mefiboset ochechieek, mè ibe, “Îre emi usun̄ kwun̄.”
7 Debit onenibe ọmọ, “Kafieek owot, ke m̀bajejeen̄ ata ejit me lek kwun̄ mije kè Jonatan nte kwun̄. Mâyaka otutuuk ijọn̄ kè Sọọlu nte nte kwun̄ inyi owu. Owu òbokirie inorie me lek ikasi n̄a mgbọ geelek.”
8 Mefiboset ogegele igwook, mè ibe, “Ekene ene ke emi ogwu usun̄ kwun̄ nre, eyi owu okaan̄be ata ejit me lek nkwukwu ibo òbet lek n̄a ikeyi?”
9 Ogwu ubọọn̄ oneniria etip igwen Siba ogwu ikwaan̄ kè Sọọlu, mè itumu inyi ibe, “Inu geelek Sọọlu mè otutuuk ebi uwu kan̄ ekaan̄be, nra iyaka inyi Mefiboset, gwun̄ gwun̄ nte uwu kwun̄. 10 Owu mè bọn ebirieen̄ kwun̄, mè ebi usun̄ kwun̄ ebekiwop uko me ijọn̄ cha, mè ikirọkọ inyi Mefiboset, inyi gwun̄ gwun̄ nte uwu kwun̄ ikikaan̄ inorie. Mefiboset, gwun̄ gwun̄ nte uwu kwun̄ ìbokirie inorie me lek ikasi n̄a mgbọ geelek.” (Siba ìkaan̄ akọp mè bọn ebirieen̄ go melek akọp ebi usun̄ iba.)
11 Siba ofọfọọk ogwu ubọọn̄ ibe, “Emi ogwu usun̄ kwun̄ mârọ inu geelek owu ogwukaan̄ n̄a, ogwu ubọọn̄, onyibe ida ibe emi ǹrọ.” Mefiboset onenikirie inorie me lek ikasi inorie kè Debit, kubọk ìyaka ire ene ge me lek bọn ogwu ubọọn̄.