Mgbọ ebi ikwaan̄ kè Debit erebe ido Amọn, 3 ebi ibot mkpulu ido Amọn enenitumu inyi Anun ogwu ubọọn̄ kiban̄ ibe, “Eyi Debit oriabe ebi ene inu ibe enekat owu ejit, ìre òkikeek ibe ke ìboninyi nte kwun̄ umin? Òkafat ìriọọn̄ ibe ke Debit ìria ebi ikwaan̄ kan̄ inu kubọk ebi enun̄unun̄, ibe enekpọ ubọk ama yi okupbe, inyi ema mênitim akọn̄ ikpan̄ ama yi?” 4 Mije keya, Anun otetet ebi ikwaan̄ kè Debit cha, mè ikwọkọ ema ifet me agan̄ otu ge, me ene me ene, mè ikọọk ofọnti isan̄a ema me agan̄ ibot edim, mè iria ema ifon ikeya.

5 Enenikpa inu ya inyi Debit, Debit oraria ebi ene ibe eje ekweek ife cha me oniin̄, mije, inu ya îtap ife cha esip me isi enenen. Itutumu inyi ife cha ibe ebia me Jeriko mege ire mgbọ ifet otu kiban̄ môtibibe, sabum ema eka.

6 Mgbọ ebi Amọn eriọọn̄be ibe ke inu ya ema erọbe îrọ ibe ema ekana ebi ochicha kè Debit, ema enenisi igwen akọp obop ebi akọn̄ ukot ukot iba ebi Aram me Bet Reyobu mè Soba, mè igwen ogwu ubọọn̄ ebi Maaka melek obop ebi akọn̄ kan̄, mè igwen si akọp mè obop ebi akọn̄ iba me Tobu, mè ikpe ikpoko inyi otutuuk ife cha.

7 Debit onọnọ otitọt ya, mè iria Jowabu isibi, ọmọ melek otutuuk ebi akọn̄ isi ikweek ema. 8 Ebi akọn̄ Amọn enenijibi akọn̄ isibi isi irieen̄ me otunchit ama kiban̄, sà ebi akọn̄ ebi Aram ebi ìnan̄a me Soba mè Reyobu, mè ebi akọn̄ ebi Tobu, melek ebi akọn̄ ogwu ubọọn̄ Maaka, ekup me lek kiban̄ me emen nsisaan̄ oron cha.

9 Mgbọ Jowabu omun̄be ibe ke ebi ochicha mîrieen̄ akọn̄ ikana ema me isi mè udun̄, igogobo ebi ìrọriọọn̄ ukot akọn̄ ichit me Ijeren, mè iria isibi isi ikweek ebi Aram. 10 Ebi akọn̄ Ijeren kechilọ ke îkana itap me ubọk kè Abisai ogwu ngwan̄, ibe ekeke eda ebi Amọn. 11 Jowabu onenitumu inyi Abisai ibe, “Ire ebi Aram inye lek igak emi, owu na na tap ubọk nyi emi. Ire, ire ebi Amọn inye lek igak owu, emi mânu initap ubọk inyi owu. 12 Nye lek! Eji etet lek enye etim akọn̄ yi me ibot ebi kiji, mè ibot owuwa ama ile Awaji kiji. Okumugwem môrọ inu geelek ònwọnwọn me chieen̄ kan̄.”

13 Jowabu mè ebi akọn̄ kan̄ enenijibi akọn̄ inin̄ lek ebi Aram. Ebi Aram elilim, kpekọt ikeke ida Jowabu. 14 Mgbọ ebi Amọn emun̄be ibe ke ebi Aram mîlim, ema si elililiin̄ ichieen̄ me emen ama ile kiban̄, kpekọt ikeke ida Abisai. Jowabu onenigwu ikom ika inu Jeruselem.

15 Mgbọ ebi Aram emun̄be ibe ke ebi Ijeren mîtim ikpan̄ ema, ema enenikpọk ititiin̄, mè ibem lek. 16 Adadeja oneniria etip igwen ebi Aram ebi ìkup me usaba okwaan̄ Yuferetis. Ema esasaba inu me Yelam, ema melek Sobak, ogwu ibot akọn̄ kè Adadeja.

17 Mgbọ Debit onọbe inu yi, itititiin̄ otutuuk ebi Ijeren, mè isa ema isaba okwaan̄ Jodan isi ire Yelam. Ebi Aram enenibem lek, mè ijibi akọn̄ isi ichichini Debit, mè itim akọn̄ me lek kan̄. 18 Ire, ebi Aram elilim, kpekọt ikeke ida ebi Ijeren. Debit okpakpan̄ efit ebi akọn̄ jaaba ìkikọp me uji akọn̄, mè ikpan̄ si akọp obop ebi akọn̄ ini ìkilibi me inyọn̄ inyinya, mè itap ikpele unan me lek kè Sobak, ogwu ibot akọn̄ kiban̄, ikwukwu me isi akọn̄ ya. 19 Mgbọ otutuuk ebi ubọọn̄ ìkisiki ibot inyi Adadeja emun̄be ibe ke ebi Ijeren mîtim ikpan̄ otutuuk kiban̄, ema esisi irọ esuuk melek ebi Ijeren, mè ikana ebi ebi Ijeren ekikpulu.

Mije keya, ukpook otetet ebi Aram iyayaka ikitap ubọk inyi ebi Amọn.