2 Me otu ikakwun̄ usen ge, Debit onanan̄a me inyọn̄ mkpilaak kan̄ isibi, mè ikije ikana me inyọn̄ uwu ubọọn̄ kan̄, mè inikup me ere ya imun̄ ogwu enenwaan̄ ge okiken mun̄. Ogwu enenwaan̄ ya îjaan̄ uja enenen. 3 Debit oneniria ibe esi eweek eriọọn̄ ogwu ogwu enenwaan̄ ya orebe. Enenilook ọmọ ibe ke îre Batiseba gwun̄ kè Eliyam òrere nwa kè Uraya ogwu Et. 4 Debit oneniria ebi ene ibe esi esa ogwu enenwaan̄ ya ejet ọmọ. Ogwu enenwaan̄ ya onunu, igọgọọk ilaak. (Ogwu enenwaan̄ ya igwọgwọk lek kan̄ isan̄a me orieen̄ irek ebibaan̄ ire eya.) Igwugwu ikom ifo uwu kan̄. 5 Sọnja mgbọ iraraka, ogwu enenwaan̄ ya omumun̄ ibe ke owot me lek kan̄, mè iniria etip ijet Debit ibe ke owot me lek kan̄.

6 Debit oneniria etip ijet Jowabu ibe, “Ria Uraya ogwu Et jet emi.” Jowabu oraria Uraya ijet Debit. 7 Mgbọ Uraya onube inire isi kè Debit, Debit onenido ọmọ inu ofolek kè Jowabu mè otutuuk ebi akọn̄, mè ido si ubọk akọn̄ okije. 8 Debit onenitumu inyi Uraya ibe, “Fo uwu kwun̄ si tap efuuk.” Uraya onanan̄a me uwu ogwu ubọọn̄ isibi. Ogwu ubọọn̄ onenisan̄a inyinyi ibe esa esi eche enyi Uraya. 9 Ire, Uraya olalaak me otunchit uwu ogwu ubọọn̄ iwele egwe, ọmọ melek otutuuk ebi ìkibem uwu ogwu ubọọn̄, ìkafo uwu kan̄.

10 Enenikpa inyi Debit ibe ke Uraya ìkafo uwu kan̄. Inenido Uraya ibe, “Kpọ-nu ujọn̄ọ ije ojebe ika inu! Keke orọ òkafo uwu kwun̄ ìsi ìtap efuuk?”

11 Uraya ofọfọọk Debit ibe, “Kpọ, okop inyan̄a-ibot, mè otutuuk ebi akọn̄ Ijeren mè otutuuk ebi akọn̄ Juda ekup me emen atanga, sà Jowabu nte uwu n̄a melek ebi akọn̄ kan̄ ere echilọ me orieen̄ akọn̄, kpunu okwukwek. Emi m̀bajeje inifo uwu n̄a isi irie inorie, mè inwọ miin̄, mè isi igọọk nwa n̄a ilaak? Kè lek kwun̄, emi m̀kpakọt irọ ojelek inu òkup ikeya!”

12 Debit onenitumu inyi Uraya ibe, “Ire ikeya, kup me ere keyi chereyi mè iyakwut, sabum mâniria owu ifo.” Uraya okukup me Jeruselem usen ya mè ofit iwele kan̄. 13 Debit onenigwen Uraya iriak ichen inorie. Uraya ogọgọọk Debit irie inorie mè inwọ miin̄. Debit onyinyi Uraya miin̄ inwọ isa. Ire, mgbọ egwe ofitbe, Uraya onanan̄a isibi isi ilaak me irek kan̄ me otunchit uwu ogwu ubọọn̄, ọmọ melek ebi ikwaan̄ nte uwu kan̄. Ìkafo si uwu kan̄.

14 Me ewelegwe, Debit onenige ikpa inyi Uraya ibe isa inyi Jowabu. 15 Ìge me emen ikpa ya inyi Jowabu ibe ito Uraya me isi akọn̄ agan̄ ònyenye ichit, mè eje enan̄a me lek, inyi akọn̄ irie, mè ikwu.

16 Eya orọ, mgbọ Jowabu okpabe mbin akọn̄ ikana ama ile ge, iraria Uraya ito me agan̄ îriọọn̄be ibe ìre ere atalek ebi usọ akọn̄ ekupbe. 17 Ebi ama ya ejijibi akọn̄ isibi inu initim me lek kè Jowabu, usini ebi akọn̄ kè Debit ekwakwaan̄ me akọn̄ ya. Uraya ogwu Et okwukwu si.

18 Jowabu oneniria etip inu òrọrọ me akọn̄ ya ijet Debit, 19 mè itumu inyi ogwu osat ya si ibe, “Osikpa otutuuk inu òrọrọ me isi akọn̄ yi inyi ogwu ubọọn̄ isan̄a, 20 ire ogwu ubọọn̄ inaan̄ ejit, mè inido owu ibe, ‘Enyi ejeje ije iriaak me lek ama ya isi itim akọn̄ me lek? Enyi kperiọọn̄ ibe ke ife cha mêkọt ikup me inyọn̄ mgban ama isook oraan̄ igwook enyi me lek? 21 Ìre Abimelek gwun̄ kè Jerubeset^a ìjeje ikwu? Ìre ìkare enenwaan̄ ikike okup me inyọn̄ mgban ida ewuuk ikọk-akpa eyi agan̄ inyọn̄ itọbọ Jerubeset ikpan̄ me Tebes? Enyi ejeje ije iriaak me lek mgban ama ya?’ Ire ogwu ubọọn̄ ido owu ikọ chi, tumu nyi ibe, ‘Ogwu usun̄ kwun̄ Uraya ogwu Et si îkwu.’ ”

22 Ogwu osat ya onenibene ije kan̄, mè isi ikpa otutuuk inu Jowabu otumube inyi ọmọ inyi Debit, 23 ibe, “Ubọk ebi ife cha înye igak eji. Ema ekpọkpọ igbọọk isibi, mè imeen̄ eji me oyet akọn̄. Ire, eji elililaba ema isi ichik me otunchit ama kiban̄. 24 Me ere ya ke ebi oraan̄ kiban̄ enikup me inyọn̄ mgban ama kiban̄ ikisook eji, mè ikpan̄ usini ebi akọn̄ ogwu ubọọn̄. Ogwu usun̄ kwun̄ Uraya ogwu Et si îkwu me ere ya.”

25 Debit otutumu inyi ogwu osat ya ibe, “Tumu ikọ keyi sa kat Jowabu ejit: Tumu nyi Jowabu be ikachieek ibe inu yi isisaak ọmọ ejit, ke akọn̄ ke îre. Akọn̄ ìkirie isi, mè òrie si udun̄. Tumu nyi be itet lek inye itim akọn̄, mè ijijaka ama ya igwook.”

26 Mgbọ nwa kè Uraya onọbe ibe ke ogwu olom îkwu, ifefieek ejit inyi ogwu olom. 27 Mgbọ mgbọ ufieejit ya orakabe, Debit oraria ebi ikwaan̄ kan̄, esisi isa ogwu enenwaan̄ ya inu me uwu kan̄. Inenikana nwa inyi Debit, mè iniman gwun̄ enerieen̄ inyi Debit. Ire, inu yi Debit orọbe onenifieek me chieen̄ Okumugwem.