Okwa itọn̄ Debit okọtbe
(Itọn̄ 18)
22
Mgbọ Okumugwem onyan̄abe Debit isibi me ubọk otutuuk ebi ochicha kan̄, mè ubọk kè Sọọlu, Debit onenikọt okwa keyi inyi Okumugwem. 2 Ìkọt okwa yi ibe ikeyi:“Okumugwem ore ewuuk n̄a,
mè uwu mgban akọn̄ n̄a,
mè ogwu òkinyan̄a emi isibi;
3 Awaji n̄a ore ewuuk n̄a,
emen kan̄ ke nkitap ibot;
ọmọ ore agbọ n̄a,
mè ire si iko nkisa inyan̄a lek kubọk anam.
Ọmọ ore okwukwek akọn̄ n̄a, mè ere ilet-lek n̄a,
mè ire si ogwu òkinyan̄a emi isibi
me ubọk ebi afa.
4 Ngwen Okumugwem ogwu ògbegbe itọn̄,
inyanyan̄a emi isibi
me ubọk ebi ochicha n̄a.
5 “Mkpa îbum ikana emi okokop
kubọk ekoon̄;
mfiat îmeen̄ emi isan̄a
kubọk unye ukot mun̄.
6 Udọn̄-ufuun̄ îkat emi igọm kubọk olik;
ufe mkpa îbubana emi.
7 Me emen ufialek n̄a, ngwen Okumugwem;
ntaan̄ ukpo igwen Awaji n̄a.
Ikukup me Uwu Mbuban kan̄ inọ emi ida;
ito n̄a osisi ire ọmọ utọn̄.
8 “Ijọn̄ osisisik, mè iriran jikijikijiki,
otutuuk ọdọ akpa isinyọn̄ owuwuwọk;
ema esisik mije
Okumugwem înaan̄ ejit.
9 Oduku okekibumu isibi me inwọm kan̄;
ukan̄ òkitaka inu iriọk
okekicho isibi me otu kan̄,
mbubuk ukan̄ okekigigeen̄ isibi me otu kan̄.
10 Inwunwun akpabin inyọn̄ kubọk ogbaan̄,
mè isibi ijọn̄ inu,
melek ofifit oduku inyọn̄ me irak ukot kan̄.
11 Ebi mbem emen inyọn̄ eben ọmọ iwulu inu;
efet ore uwop òkikọp ọmọ iwulu ije.
12 Udun ke îsa igwuk ikana lek kan̄ ilet,
mè isa ofifit oduku inyọn̄ mun̄ ogakbe lek
ikwuun̄ ichit lek kan̄.
13 Me utoon̄ eyi isi kan̄
ke omumen-inyọn̄ okisook isibi.
14 Okumugwem ososook me akpabin inyọn̄
kubọk ìre isinyọn̄;
ida Ogwu Òbebene Ichit okekinunọọn̄;
15 Îgwook oraan̄ kan̄ ichit ebi ochicha,
ema eyiyiyala;
îsook omumen-inyọn̄,
mè itap wọlọwọlọ me etete kiban̄.
16 Mgbọ Okumugwem okigbin
ebi ochicha kan̄,
oruk unaan̄-ejit okekicho
ọmọ me inwọm isibi;
okwaan̄ ile ochachiaak ita ire ijọn̄;
ejit ijọn̄ linyọn̄ ochichili
irak irak kan̄ ibook.
17 “Okumugwem okukup me isinyọn̄
inyana ubọk itet emi,
mè idut emi isibi me irem okwaan̄.
18 Înyan̄a emi isibi
me ubọk ebi ochicha n̄a ìnyenye lek,
mè ubọk ebi ìkaan̄ emi oriara me lek,
mije, ema mînye lek igak emi.
19 Ema mîfan̄a inu
mgbọ ùrioon̄ okemebe emi;
ire, Okumugwem ke mbieen̄ lek me lek.
20 Isasan̄a emi isibi ito
me ere òwowook emi me lek;
ìnyan̄a emi mije ejit kan̄ îtop me lek n̄a.
21 “Okumugwem îrọ emi inwọn,
mije, nrọ inu òtatat;
ìsa ata inu ikpe emi bak me lek ubọk n̄a otanabe.
22 Mije, ǹrọrọ otutuuk nteme Okumugwem,
ǹkagba udun̄ ìfit Awaji n̄a,
mè ìsa me ikeya ìrọ ijo inu.
23 Ikan geelek înyibe ibe esun̄, ǹsusun̄ iso;
inu geelek îtọbe ibe erọ, ǹkakpaka.
24 Ǹkakaan̄ nrọ-nlọ geege me isi kan̄;
ǹsasan̄a lek n̄a me lek irọrọ ijo inu.
25 Okumugwem îrọ emi inwọn,
bak me lek ke nrọ inu òtatat,
mè bak me lek ubọk n̄a otanabe me isi kan̄.
26 “Okumugwem, me lek ebi ejit nsan,
owu òkijeen̄ lek kwun̄
kubọk ogwu ejit nsan;
me lek ebi ekakaan̄ge ofiaan̄ me emen,
owu òkijeen̄ lek kwun̄
kubọk ogwu ikakaan̄ge ofiaan̄ me emen.
27 Me lek ebi ìtatana me ugwem,
owu òkijeen̄ lek kwun̄
kubọk ogwu òtatana me ugwem.
Ire, me lek ebi ngan,
owu òkirọ ema inu me lek ifiọk ifiọk.
28 Owu okinyan̄a ebi ìsisiki lek;
ire, chieen̄ kwun̄ ìgwọgwọk
me lek ebi ugumu,
inyi owu ògele ema òsiki.
29 Îre owu, Okumugwem, ore utoon̄ n̄a;
Okumugwem, owu okirọ
udun n̄a ikana utoon̄.
30 Sa me lek kwun̄ ke nkibum itibi
urum akọn̄ ebi ochicha;
sa me lek kwun̄, Awaji n̄a,
ke nkiwulu isaba mgban akọn̄.
31 “Ire Awaji, otutuuk irọrọ kan̄
ìtatat isan̄a;
ikọ Okumugwem
kpukpunu ofiaan̄ geege me emen.
Ọmọ ìre agbọ òkikwek lek
otutuuk ebi ìtatap ibot me lek kan̄.
32 Mije, ìre ekene ore Awaji,
ita me lek Okumugwem?
Sà ìre ekene ore Ewuuk òkikput eji lek,
ilọ me lek Awaji kiji?
33 Awaji ore unye uwu mgban akọn̄ inyi emi,
ọmọ okirọ oniin̄ nkije ikare oniin̄ unan.
34 Înyi emi ukot òkigọm ijọn̄
kubọk ukot ogaan̄,
mè ikirọ ǹkeke ǹnye
me inyọn̄ ubene ogoon̄.
35 Îjeen̄ emi ukot akọn̄,
ọmọ orọ, mâkọt isa ekwe inwun ogbaan̄.
36 Owu onyi emi agbọ kwun̄
eyi nkisa itim ikpan̄;
owu ogele isiki inirọ emi m̀min ene.
37 Owu orọ ere iwook emi me ukot ijeje,
inyi nkatọbọ ukot, mè ìnan̄a ìrọn̄.
38 “Ǹgọgọọk ebi ochicha n̄a,
mè itim ikpan̄ ema;
ǹkagwu ìkom
mege mkpan̄be ema isan̄a kpai.
39 Ǹchochon ema igwook, mè ikpan̄ ema isan̄a;
ema kpeyaka ikọt ibene isi;
ema elalaak ibia me ijọn̄ me ukot n̄a.
40 Owu onyi emi unye nsabe itim akọn̄,
mè irọ ebi ochicha n̄a
egele egwook me ijọn̄ me ukot n̄a.
41 Owu orọ ebi ochicha n̄a
eliliin̄ enan̄a emi me isi,
njijijaka ebi oriara n̄a isan̄a kpai.
42 Ema mîtaan̄ ukpo iweek ntap-ubọk,
ire, kpunu ogwu ònyan̄a ema;
mîyaka igwegwen Okumugwem,
ire, ìkabọkọ ema otu.
43 Ǹkọkọk ema ikpukpuku iriọk
kubọk mfuun̄ ijọn̄ ikike;
m̀kpukpukpuku ema,
mè ijak ema me ukot
kubọk ogbọ ejit oniin̄.
44 “Owu onyan̄a emi isibi me ufialek
ebi n̄a etapbe emi me lek,
mè isun̄ emi me irek
ibe emi ǹre ogwu ibot mkpulu
ǹnyi owuwa ido.
Ebi nkarakge ìriọọn̄ isi
mîkana ebi nkikpulu.
45 Ebi ichen ekinigele igwook
me isi n̄a mije ukpook;
ema isinọ ida n̄a,
ekigbagban̄ utọn̄ inyi emi.
46 Nsisa ìkitata me owot ebi ofifi ido;
ema mîra ikinan̄a isibi
me ere ema ekilet ikweek itim akọn̄,
mè ikiran.
47 “Okumugwem òwa me ugwem!
Itọn̄ ikup inyi Ewuuk ilet-lek n̄a!
Ìjibi Awaji, ogwu òrere Ewuuk,
mè ire si Ogwu Unyan̄a n̄a, ìbene!
48 Ọmọ ore Awaji
ogwu òkitim akọn̄ me ibot n̄a;
ọmọ osiki ebi ido geelek itap me irak n̄a,
49 mè inyan̄a emi isibi
me ubọk ebi ochicha n̄a.
Owu obene emi isaba iraka ebi oriara n̄a;
owu onyan̄a emi isibi me ubọk ebi afa.
50 Eya orọ, Okumugwem,
mâtọn̄ owu me etete ebi ofifi ido,
mè ikọt okwa itọn̄ erieen̄ kwun̄.
51 Awaji, owu okinyi ogwu ubọọn̄ owu otobe
ntim-mkpan̄ òmimiin̄ ibot;
owu okaan̄ imumechieen̄
òkup mgbọ geelek me lek kè Debit
ogwu otọkọbe aran̄ me ibot,
mè ikaan̄ si me lek bọn kan̄
ire mgbọ geelek.”