Okwa Debit okọtbe mgbọ îtimbe ikpan̄ ebi ochicha kan̄
Ìkup inyi ogwu òjeen̄ okwa. Okwa Debit ogwu ikwaan̄ Okumugwem okọtbe inyi Okumugwem mgbọ înyan̄abe ọmọ me ubọk otutuuk ebi ochicha kan̄, mè ubọk kè Sọọlu.
18
Okumugwem mmun̄ owu me chieen̄ enenen;owu ore unye n̄a.
2 Okumugwem ore ewuuk n̄a, mè uwu mgban akọn̄ n̄a,
mè ogwu òkinyan̄a emi isibi;
Awaji n̄a ore ewuuk n̄a, emen kan̄ ke nkitap ibot;
ọmọ ore si agbọ òkikwek emi lek,
mè iko nkisa inyan̄a lek kubọk anam;
ọmọ ore okwukwek akọn̄
ere nkilibi inin̄ inwọnọ ebi ochicha.
3 Ngwen Okumugwem, ogwu ògbegbe ibe etọn̄;
inyanyan̄a emi isibi me ubọk ebi ochicha n̄a.
4 Mkpa îkat emi ikana kubọk olik,
mè itọp ichit emi kubọk ekoon̄.
5 Udọn̄-ufuun̄ îkat emi igọm kubọk olik;
ufe mkpa îbubana emi.
6 Mgbọ uyọrọlek okanabe emi inwan,
ngwen Okumugwem;
nto ito igwen Awaji n̄a ibe inyan̄a emi;
ukpo n̄a orere ọmọ utọn̄;
ikukup me Uwu Mbuban kan̄ inọ emi ida.
7 Ijọn̄ osisisik, mè iriran jikijikijiki,
ebi kè ogoon̄ ejujujuk,
mè inyinyen̄e me ebon ijọn̄ kiban̄,
ema esisik, mije, Okumugwem înaan̄ ejit.
8 Oduku okekibumu isibi me inwọm kan̄;
ukan̄ òkitaka inu iriọk okekicho isibi me otu kan̄,
mbubuk ukan̄ okekigigeen̄ isibi me otu kan̄.
9 Inwunwun akpabin inyọn̄ kubọk ogbaan̄,
mè isibi ijọn̄ inu,
melek ofifit oduku inyọn̄ me irak ukot kan̄.
10 Ebi mbem emen inyọn̄ eben ọmọ iwulu inu;
efet ore uwop òkikọp ọmọ iwulu ije.
11 Udun ke îsa igwuk ikana lek kan̄ ilet,
mè isa ofifit oduku inyọn̄ mun̄ ogakbe lek
ikwuun̄ ichit lek kan̄.
12 Me utoon̄ eyi isi kan̄ ke oduku inyọn̄ okinan̄a isibi;
ibot mgbọlọ mè omumen-inyọn̄
okekisook isibi me emen ofifit oduku inyọn̄ ya.
13 Okumugwem ososook me akpabin inyọn̄ kubọk ìre isinyọn̄;
ida Ogwu Òbebene Ichit okekinunọọn̄;
ibot mgbọlọ mè ukan̄ òkinyanyan
okekisook si isibi.
14 Îgwook oraan̄ kan̄ ichit ebi ochicha,
ema eyiyiyala;
îsook omumen-inyọn̄,
mè itap wọlọwọlọ me etete kiban̄.
15 Mgbọ Okumugwem okigbin ebi ochicha kan̄,
oruk unaan̄-ejit okekicho ọmọ me inwọm isibi;
okwaan̄ ile ochachiaak ita ire ijọn̄;
ejit ijọn̄ linyọn̄ ochichili irak irak kan̄ ibook.
16 Okumugwem okukup me isinyọn̄ inyana ubọk itet emi,
mè idut emi isibi me ejit irem okwaan̄.
17 Înyan̄a emi isibi me ubọk ebi ochicha n̄a ìnyenye lek,
mè ubọk ebi ìkaan̄ emi oriara me lek,
mije, ema mînye lek igak emi.
18 Ema mîfan̄a inu mgbọ ùrioon̄ okemebe emi;
ire, Okumugwem ke mbieen̄ lek me lek.
19 Isasan̄a emi isibi ito me ere òwowook emi me lek;
ìnyan̄a emi, mije, ejit kan̄ îtop me lek n̄a.
20 Okumugwem îrọ emi inwọn, mije, nrọ inu òtatat;
ìsa ata inu ikpe emi bak me lek ubọk n̄a otanabe.
21 Mije, ǹrọrọ otutuuk nteme Okumugwem,
ǹkagba udun̄ ìfit Awaji n̄a,
mè ìsa me ikeya ìrọ ijo inu.
22 Ikan geelek înyibe ibe esun̄, ǹsusun̄ iso;
inu geelek îtọbe ibe erọ, ǹkakpaka.
23 Ǹkakaan̄ nrọ-nlọ geege me isi kan̄;
ǹsasan̄a lek n̄a me lek irọrọ ijo inu.
24 Okumugwem îrọ emi inwọn,
bak me lek ke nrọ inu òtatat,
mè bak me lek ke ubọk n̄a otanabe me isi kan̄.
25 Okumugwem, me lek ebi ejit nsan,
owu òkijeen̄ lek kwun̄ kubọk ogwu ejit nsan;
me lek ebi ekakaan̄ge ofiaan̄ me emen,
owu òkijeen̄ lek kwun̄
kubọk ogwu ikakaan̄ge ofiaan̄ me emen.
26 Me lek ebi ìtatana me ugwem,
owu òkijeen̄ lek kwun̄ kubọk ogwu òtatana me ugwem.
Ire, me lek ebi ngan,
owu òkirọ ema inu me lek ifiọk ifiọk.
27 Îre owu okinyan̄a ebi ekirọ ikeme,
mè ikisiki ebi ìkigumu lek.
28 Okumugwem, owu okinyi emi utoon̄,
Okumugwem Awaji n̄a okirọ udun n̄a ikana utoon̄.
29 Sa me lek kwun̄ ke nkibum itibi urum akọn̄ ebi ochicha;
sa me lek kwun̄, Awaji n̄a,
ke nkiwulu isaba mgban akọn̄.
30 Ire Awaji, otutuuk irọrọ kan̄ ìtatat isan̄a;
ikọ Okumugwem kpukpunu ofiaan̄ geege me lek;
ọmọ ìre agbọ òkikwek lek
otutuuk ebi ìtatap ibot me lek kan̄.
31 Mije, ìre ekene ore Awaji, isan̄a me lek Okumugwem?
Sà ìre ekene ore Ewuuk òkikput eji lek,
ilọ me lek Awaji kiji?
32 Awaji ore uwu mgban akọn̄ ònyenye inyi emi,
ọmọ okirọ ibe oniin̄ nkije ikare oniin̄ unan.
33 Înyi emi ukot òkigọm ijọn̄ kubọk ukot ogaan̄,
mè ikirọ ǹkeke ǹnye me inyọn̄ ubene ogoon̄.
34 Îjeen̄ emi ukot akọn̄,
ọmọ orọ, mâkọt isa ekwe inwun ogbaan̄.
35 Owu onyi emi agbọ kwun̄ eyi nkisa itim ikpan̄;
ubọk ulom kwun̄ ke osa ibieen̄ emi ikaan̄;
owu ogele isiki inirọ emi m̀min ene.
36 Owu orọ oniin̄ iwook emi me ukot ijeje,
inyi nkatọbọ ukot, mè ìnan̄a ìrọn̄.
37 Ngọọk ebi ochicha n̄a, mè itut ema;
ǹkagwu ìkom mege mkpan̄be ema isan̄a kpai.
38 Ǹchochon ema igwook, ema kpeyaka ikọt ibene isi;
ema elalaak ibia me ijọn̄ me irak ukot n̄a.
39 Owu onyi emi unye nsabe itim akọn̄,
mè irọ ebi ochicha n̄a
egele egwook me ijọn̄ me ukot n̄a.
40 Owu orọ ebi ochicha n̄a eliliin̄ enan̄a emi me isi,
njijijaka ebi oriara n̄a isan̄a kpai.
41 Ema mîtaan̄ ukpo iweek ntap-ubọk,
ire, kpunu ogwu ònyan̄a ema;
mîyaka igwegwen Okumugwem,
ire, ìkabọkọ ema otu.
42 Ǹkọkọk ema ikpukpuku iriọk
kubọk mfuun̄ efet okiwut ije,
mè ichibi ema igwook kubọk ògbọ ejit oniin̄.
43 Owu onyan̄a emi isibi me
ufialek ebi n̄a etapbe emi me lek,
mè irọ emi ogwu ibot mkpulu inyi ebi ido geelek.
Ebi nkarakge ìriọọn̄ isi
mîkana ebi nkikpulu.
44 Ema isinọ ida n̄a, ekigbagban̄ utọn̄ inyi emi;
ebi ofifi ido ekigegele igwook me isi n̄a mije ukpook.
45 Nsisa ìkitata me owot ebi ofifi ido;
ema mîra ikinan̄a isibi me ere ema ekilileek ikup itim akọn̄,
mè ikiran.
46 Okumugwem òwa me ugwem!
Itọn̄ ikup inyi Ewuuk ilet-lek n̄a!
Ìjibi Awaji Ogwu Unyan̄a n̄a ìbene!
47 Ọmọ ore Awaji ogwu òkitim akọn̄ ibot n̄a;
ọmọ osiki ebi ido geelek itap me irak n̄a.
48 Ọmọ ore Awaji
ogwu òkikpe ebi ochicha n̄a useen̄ inu ema erọbe emi.
Okumugwem îbene emi isaba iraka ebi oriara n̄a,
mè inyan̄a emi isibi me ubọk ebi afa.
49 Eya orọ, Okumugwem,
mâtọn̄ owu me etete ebi ofifi ido;
mâkọt okwa itọn̄ erieen̄ kwun̄.
50 Awaji, owu okinyi ogwu ubọọn̄ owu otobe
ntim-mkpan̄ òmimiin̄ ibot;
owu okaan̄ imumechieen̄ mgbọ geelek
me lek kè Debit ogwu owu otọkọbe aran̄ me ibot,
mè ikaan̄ si me lek bọn kan̄ ire mgbọ geelek.