Umin Awaji okaan̄be me lek nrom îrombe melek ikan kan̄
Ìkup inyi ogwu òjeen̄ okwa. Okwa kè Debit.
19
Akpabin inyọn̄ òkitumu ibe Awaji mimin;akpa isinyọn̄ òkijeen̄ ubọk ikwaan̄ kan̄ isibi utoon̄.
2 Ikarek ge ìkitumu umin Awaji isibi inyi ikarek ògọgọọk;
eririeen̄ ge ìkichili si ijeen̄ eririeen̄ ògọgọọk.
3 Ema kpekaan̄ usem,
kpekakaan̄ si amọn ebilene ekaan̄be;
kpekinọ ida kiban̄.
4 Ire, ida kiban̄ îtaan̄ iso otutuuk linyọn̄;
enọnọ ikọ kiban̄ me ntutun̄ ere geelek me linyọn̄.
Me akpa isinyọn̄ ke Awaji osun̄ uwu inyi ura olukbe,
5 inyi ikinan̄a isibi me ewelegwe me ubelejit,
kubọk ogwu òdo nwa ayaya okinan̄a me agwut isibi,
mè ikibele ejit kubọk ogwu ifan̄a ekot òbolibi ekot kan̄.
6 Ura ìkibum me agba isinyọn̄ agan̄ ge,
mè ikije isaba itoon̄ me agan̄ keyilọ;
kpunu inu geege uyok kan̄ ìkakire lek.
7 Ikan Okumugwem ìjajaan̄ isan̄a;
ìkinyi ene aya efuuk me emen.
Ata-ikọ Okumugwem îgbe inu etoon̄be ejit me lek;
ìkirọ ogwu ikakaan̄ge iriọọn̄-inu
ikana ogwu òriọọn̄ inu.
8 Ikọ Okumugwem otọbe, ìtatat ikup;
ìkisa unwọọn̄ ijet ebi ìkirọ inu cha;
inyinyi ida Okumugwem onyibe, ìnenen;
ìkigwuku ene chieen̄.
9 Itetet ukpook me lek Okumugwem,
ìkakaan̄ okpa me lek,
ìbokukup ire mgbọ geelek;
oyerebet Okumugwem okifieek, ìkikekeke,
ìkinenen isan̄a kpai.
10 Ema mînye otu ewe igak alata araran̄,
ikerere owuwa atalek alata araran̄;
ema mînin̄i igak aran̄ akwọọk,
ikerere aran̄ akwọọk òkirọrọn̄ọ me lek akpa akwọọk.
11 Ògak ge, ema ke okisa itaba
emi ogwu ikwaan̄ kwun̄ ubọk me utọn̄;
ikpele mkpukpe òwa me lek isusun̄ ema.
12 Kpunu ogwu òkimọọn̄ nrọ-nlọ ọmọ orọbe me ikariọọn̄ge;
jei Okumugwem, nyan̄a emi sibi me ijo inu
òlelet ikup emi me ejit.
13 Kachieek si ibe emi, ogwu usun̄ kwun̄,
ǹgen ibak ǹrọ inu nriọọn̄be isan̄a ibe ìre ijo inu;
kachieek ibe ijo inu itọ ikọ inyi emi;
sa me ikeya ke mâtana me ugwem,
mè inwọnọ irọrọ ikpele ijo inu.
14 Soso, bọkọ ikọ otu n̄a mè ekiket ejit n̄a tap,
jei Okumugwem, owu Ewuuk òlet emi,
mè Ogwu Òfaka emi Isibi.