Uriaak isasa ibeek ntim-mkpan̄ me akọn̄ inyi ogwu ubọọn̄
Okwa kè Debit. Ìkup inyi ogwu òjeen̄ okwa.
20
Kè Okumugwem inọ uriaak kwun̄,mgbọ okupbe me uyọrọlek;
kè Awaji kè Jekọp isa ubọk kan̄ iwele ichit owu.
2 Kè ọmọ ikup me Uwu Mbuban itap ubọk inyi owu,
mè ikup me inyọn̄ ogoon̄ Sayọn
itap owu unye me emen.
3 Kè ọmọ ibọkọ otutuuk ngwugwa ogwabe inyi ọmọ,
mè ibele ejit me lek ngwugwa ewọwọp owọpbe inyi ọmọ.
4 Kè ọmọ inyi owu inu geelek òkup owu me uyọt,
mè irọ inyi otitọt okaan̄be me ejit ije ijaan̄.
5 Ositim ikpan̄ me akọn̄, eji mêrie ijọk,
mè iben egop ikaan̄ me ubọk
isa iwulu òkô me erieen̄ Awaji kiji;
kè Okumugwem irọ otutuuk inu geelek obeekbe me uriaak
inyi owu.
6 Mgbọ keyi, emi nriọọn̄ ibe ke
Okumugwem ìkekitap ubọk inyi ogwu ubọọn̄
îtọkọbe aran̄ me ibot;
môkup me emen inyọn̄ ere mbuban
inọ uriaak ogwu ubọọn̄;
môsa ubọk ulom kan̄ irọ ogwu ubọọn̄
itim ikpan̄ ebi ochicha kan̄ me agan̄ geelek.
7 Usini ido esa urum akọn̄
mè nroon̄ akọn̄ ema ekaan̄be itoon̄ ejit;
eyi kiji, eji etoon̄ ejit me lek Okumugwem Awaji kiji.
8 Ema mîtọbọ ukot, mè inan̄a irọn̄;
ire, eji mêwulu ibene, mè ikeke inye.
9 Jei Okumugwem, rọ inyi akọn̄ inwọn ogwu ubọọn̄;
soso, tap ubọk nyi eji mgbọ geelek eji egwenbe owu.