Okwa Itọn̄ 21

Itọtọn̄ Awaji me lek etimbe ikpan̄

Ìkup inyi ogwu òjeen̄ okwa. Okwa kè Debit.

Jei Okumugwem, ogwu ubọọn̄ ìkibele ejit

bak me lek owu onyi ọmọ unye;

ọmọ ìkinwọọn̄ ikpele unwọọn̄

mije owu orọ ọmọ itim ikpan̄.

2 Owu orọ nkeek kan̄ inyi ọmọ,

mè irọ si inu îsabe otu ido owu.

3 Owu osa ata ugbana ibọkọ ọmọ itap,

mè ikwuun̄ ọmọ okpibot ubọọn̄

atalek alata araran̄ me ibot.

4 Ọmọ îbeek owu ugwem,

owu onyinyi ọmọ ujọn̄ọ ugwem

ire mgbọ geelek, mgbọ geelek.

5 Ọmọ îkaan̄ ikpele umin,

bak me lek otapbe ubọk inyi ọmọ itim ikpan̄;

owu onyi ọmọ òrirọ

mè umin ubọọn̄.

6 Owu ògbagbana ọmọ ire mgbọ geelek;

unwọọn̄ ìjojot ọmọ ejit,

bak me lek ọmọ okupbe me isi kwun̄.

7 Bak me lek ogwu ubọọn̄

otoon̄be ejit me lek kwun̄ Okumugwem,

mè itoon̄ si me lek imumechieen̄ mgbọ geelek kwun̄,

owu Ogwu Òbebene Ichit,

kpunu inu geege òbosisik ọmọ.

8 Ogwu ubọọn̄, ubọk kwun̄ môtet otutuuk ebi ochicha kwun̄;

ubọk ulom kwun̄ môweek

otutuuk ebi ochicha kwun̄ imun̄.

9 Mgbọ owu mônube,

owu môsa ukan̄ òkisasak iwọp ema ikpan̄;

Okumugwem môsa unaan̄-ejit ijijaka ema isan̄a;

ukan̄ môtaka ema iriọk.

10 Owu môkpan̄ bọn bọn kiban̄ isan̄a me linyọn̄,

mè ichep owot iman kiban̄ isan̄a me etete ebilene.

11 Ijo otitọt ke ema etọt ikeme owu,

mè ikeek ijo nkeek ibak owu;

ire, ìkabokaan̄ ibot.

12 Owu môyaka ogbaan̄ kwun̄ ida ema me emen isi,

mè irọ inyi ema egwu ekom eliliin̄.

13 Jei Okumugwem, eji ekitọn̄ owu bak me lek ikpele unye kwun̄;

eji mêkọt okwa itọn̄ owu mije unye kwun̄.