Ukpo ufieejit mè okwa itọn̄
Nteme òkup inyi ogwu òjeen̄ okwa: Igọọk me ida okwa ogaan̄ agan̄ egwe. Okwa kè Debit.
22
Awaji n̄a, Awaji n̄a, ìre keke orọ ojitbe emi itele?Keke orọ okupbe ijọn̄ọ ere me lek n̄a,
mè ijit itatap ubọk inyi emi?
Keke orọ ojitbe inọnọ mfi nkito?
2 Jei Awaji n̄a, ikarek ngwen owu igak,
òkabọkọ emi otu;
eririeen̄ si ǹkasiki efuuk
igwegwen owu.
3 Ire, owu ore ogwu òkup me mbuban,
mè ikup me inyọn̄ ogboon̄ ubọọn̄
ikibọkọ itọn̄ ebi Ijeren ekinyi owu.
4 Ebi nte nte kiji etoon̄ owu ejit me lek,
owu osasan̄a ema isibi me ufialek.
5 Ema ebọn̄ọ owu,
owu onyanyan̄a ema;
ema etoon̄ owu ejit me lek,
owu otọtọn̄ọ ema isi.
6 Ire emi, emi ìre akọkọọk, ǹkayaka ìre ene;
nkana ogwu ochak mè ogwu ebilene ekikpọ ilọ chieen̄.
7 Ebi geelek ìmumun̄ emi ekichachak emi;
ema ekitumu ikọ ibook otu inyi emi,
mè ikiwuwum ibot.
8 Ema ekibe, “Mênikpọ! Òsa lek kwun̄ inyi Okumugwem,
Okumugwem inyan̄a owu ma;
ire ọmọ ima owu,
inyan̄a owu isibi-nu!”
9 Îre owu osan̄a emi isibi me owot nga n̄a;
owu orọ ibe ǹtoon̄ owu ejit me lek,
ikerere mgbọ nkinwọ ebe me ejit nga n̄a.
10 Irak ubọk kwun̄ ke nkup bene me usen emanbe emi;
karake nga n̄a omanbe emi, owu ore Awaji n̄a.
11 Kada lek ìbọkọ emi me lek,
mije uyọrọlek înin̄ iriaak emi lek;
kpunu ogwu òbotap ubọk inyi emi.
12 Owuwa ebi ochicha mîkana emi okokop
ibenigoon̄ emi kubọk eriembuuk;
ema ekakana emi me ijọn̄,
mè inye lek kubọk eriembuuk agan̄ Basan.
13 Ema ekaka otu ibook,
mè ikigbin kubọk egbe àtat
inin̄ emi lek inenigwak emi iche.
14 Mîgwook emi isibi kubọk mun̄;
otutuuk ukwuuk n̄a îkwala inan̄a me usọk;
ejit n̄a îtọk ita kubọk uchi.
15 Unye îta isan̄a emi me emen;
ǹchiaak kubọk odùdû;
alọm n̄a îgba igọm me lek eseen̄ n̄a;
owu oyaka emi imaan̄ itele me achiaan̄ inyi mkpa.
16 Urum ibo îgban ikana emi me ijọn̄;
ogbogbo ebi ikpak mîkana emi okokop;
ema mîchiin̄ emi ubọk mè ukot igwak.
17 Otutuuk ukwuuk n̄a îgwọk isibi
ire lek mâkọtbe ifuk otu ifuk;
ebi ochicha n̄a egwugwuun̄ chieen̄ ikikpọ emi,
mè ikikebe emi.
18 Ema mîche ekwut ichit-lek n̄a inyi lek kiban̄,
mè iroon̄ nriroon̄ me lek ofọnti n̄a.
19 Jei Okumugwem, kada lek ìbọkọ emi me lek;
owu ogwu òkitap emi unye me lek;
gwat lek na na nyan̄a emi!
20 Nyan̄a emi sibi me otu oge akọn̄,
mè nyan̄a si emi sibi me otu ejeek ibo.
21 Dut emi sibi me otu egbe àtat;
owu ofọọk emi otu,
mè itaba emi isan̄a me otu iko eriembuuk òweek ikọ.
22 Mâtumu erieen̄ kwun̄ isibi inyi ebi ngwan̄ n̄a;
mâtọn̄ owu me ere ebi eyi kwun̄ etitiin̄be.
23 Enyi ebi ìkaan̄ ukpook me lek Okumugwem, ìtọn̄ ọmọ;
otutuuk kinyi ebi owot iman kè Jekọp, ìmin ọmọ;
otutuuk kinyi ebi Ijeren, ìtet ukpook me lek kan̄!
24 Mije, ọmọ ìkasan̄a chieen̄ me lek ufialek ebi ijo irek;
ìkakpọ si ema chieen̄ ìsiki;
ìkagba udun̄ ìfit ema;
ire, înọ ema ida mgbọ etaan̄be ukpo igwen ọmọ.
25 Mâtọn̄ owu me ntitiin̄ ile eyi ebi kwun̄;
mâsa ngwugwa nchieekbe owu use
inu me isi ebi ìkitọbọ ebum inyi owu.
26 Ebi ijo irek mêrie, mè igbuuk;
ebi ìnu me lek Okumugwem, mêtọn̄ ọmọ;
inu môje ijaan̄ inyi ema mgbọ geelek.
27 Ebi ido geelek me linyọn̄ mêkeek Okumugwem,
mè igwu ikom igọọk ọmọ;
ototun̄ ukan̄ ebi ido geelek mêtọbọ ebum inyi ọmọ.
28 Mije, Okumugwem ore ubọọn̄;
ọmọ okikpulu ido geelek.
29 Ebi geelek ìbọbọọn̄ ubọọn̄ me linyọn̄ mêrie ijọk
mè itọbọ ibot inyi ọmọ;
otutuuk ebi geelek mênin̄be achiaan̄ mêtọbọ ibot me isi kan̄,
òrere otutuuk ebi kpekọt isun̄ lek kiban̄ me ugwem.
30 Owot iman geelek mêrọ ikwaan̄ inyi ọmọ;
ebilene mêkpa inu ofolek
Ogwukaan̄-ene inyi ukot òkinunu.
31 Ebiba si mênu,
mè inikpa si ata irọrọ kan̄ inyi ebi kpemaman-nu;
ikeyi ke Okumugwem odọmọ ibe ikup.