Uriaak ogwu ata irọrọ
Uriaak kè Debit.
17
Jei Okumugwem,nọ uriaak nkiriaak ibeek owu unen;
gban̄ ukpo nkitaan̄ ibe owu òtap ubọk ònyi emi;
rieen̄ utọn̄ gban̄ uriaak n̄a;
ǹkasa me ejit ofiaan̄ ìriaak!
2 Sa me isi kwun̄ fieek oyerebet nyi emi,
mije chieen̄ kwun̄ îkimọọn̄ inu òtatat.
3 Owu omọọn̄ emen ejit n̄a;
owu ochichini emi me eririeen̄,
mè iwọlọ emi ikpọ,
òkamun̄ ijo irọrọ geege me emen n̄a;
ǹkasa otu n̄a ìtumu ijo ikọ geege.
4 Ǹkakirọ inu
kubọk ebilene ekirọ;
igọọk me ikọ otu kwun̄,
ǹjijit ijeje me oniin̄ ebi afa.
5 Oniin̄ obe eje ke nkije mgbọ geelek;
ukot n̄a ìkakwakwala ìnan̄a me lek mgbọ geege.
6 Jei Awaji, owu ke nkigwen,
mije owu okinọ mbeek n̄a, mè ikirọ;
eya orọ, rieen̄ utọn̄,
mè nọ uriaak n̄a.
7 Rọ inyi uyeke uyeke imumechieen̄ kwun̄
òkup mgbọ geelek isibi utoon̄;
owu okisa ubọk ulom kwun̄
inyan̄a ebi ìnitap ibot me ubọk kwun̄ isibi
me ubọk ebi ìkirọ ikeme ema.
8 Bem emi ubọk okibem ukwuuk chieen̄ kwun̄;
let emi me irak uwop kwun̄ kubọk unọn okileek bọn.
9 Let emi bak me lek ebi ikpak ìkinu emi akọn̄ me lek;
ebi ochicha ebi ìkana emi okokop
ikiweek ikpakpan̄ emi.
10 Ejit kiban̄ ìnyenye gboi,
kperiọọn̄ nsan;
ikọ ubenelek okisibi ema me otu.
11 Ema mîgọọk me akpat ukot n̄a inimun̄ emi,
mè ikpa ikana emi okokop,
mè igwọk chieen̄ ikikpọ irek isibi
inyi ema etọbọ emi ekpan̄ me ijọn̄.
12 Ema ekup kubọk egbe àtat
eyi ichichim anam okiyok me ejit;
ema etuun̄ ikikpọ emi
kubọk gwun̄ egbe àtat olet me udọn̄ ikpọ anam.
13 Jei Okumugwem, nan̄a keke na;
tim ebi ochicha n̄a etim me lek,
mè tọbọ ema me ijọn̄;
sa oge akọn̄ kwun̄ nyan̄a emi sibi me ubọk ebi ikpak.
14 Jei Okumugwem, sa ubọk kwun̄ nyan̄a emi sibi
me ubọk ebi owot ojotbe me linyọn̄ keyi;
sa ufialek osun̄be ikikpọ ema keme ema;
bọn kiban̄ ebọkọ ufialek cha ewa egak ema,
mè esik usini eban bọn bọn kiban̄.
15 Ire emi, mâmun̄ owu isi me isi,
mije ubọk n̄a ìtatana;
nsilaak ijomo, mânwọọn̄ unwọọn̄,
mije mâmun̄ ubọk owu okupbe.