Okwa unwọọn̄ Awaji okputbe ene lek
Okwa kè Debit. Ekikọt ususuk.
16
Jei Awaji, kput emi lek,ke ǹtap ibot n̄a me ubọk kwun̄.
2 Ǹkitumu inyi owu Okumugwem ibe,
“Owu ore Òkaan̄ n̄a.
Ata inu geelek nkaan̄be
ìnan̄a owu me ubọk.”
3 Ebi ata ife me linyọn̄,
ema ere ebi isi ile;
otutuuk ubelejit n̄a ìkup me lek kiban̄.
4 Ebi ìkigọọk ofifi awaji,
ufialek ufialek okup inyi ema;
ngwugwa ekisa eje igwa inyi awaji kecha,
emi ǹkabakup me lek;
otu n̄a ìkpochachak si me lek erieen̄ kiban̄.
5 Okumugwem, owu ke ngobo inyi lek n̄a;
ònu-me-isi ugwem n̄a ìkup me ubọk kwun̄.
6 Owu orọ ugwem n̄a ijaan̄;
owu onyi emi ata inu geelek nsabe ikiluk ugwem òtotop.
7 Mâtọn̄ owu Okumugwem,
ogwu òkinyi emi nteme;
ikerere eririeen̄, ejit n̄a ìkinyi emi nteme kwun̄.
8 Chieen̄ n̄a ìgwuun̄ me lek Okumugwem mgbọ geelek;
eyi ọmọ okukup me agan̄ ubọk ulom n̄a,
ukot n̄a ìnyenye me ijọn̄.
9 Eya orọ, mbele ejit enenen,
mè itọn̄ owu Okumugwem;
akpalek n̄a môkup me utelelek.
10 Owu òkpojuuk emi itele m̀bia me emen udọn̄-ufuun̄;
owu òkpotetele si gwun̄ ikwaan̄ kwun̄
ikup me udọn̄-ufuun̄ ijọ ibubuku.
11 Kpan̄asi ikeya, owu môjeen̄ emi oniin̄ eyi ugwem;
me isi kwun̄, owu mônyi emi unwọọn̄ òjojot,
mè utop ikukup me agan̄ ubọk ulom kwun̄ ire mgbọ geelek.