Ogwu ògbegbe itọtọbọ ebum inyi Awaji
Okwa kè Debit.
15
Okumugwem, ìre ekene mônin̄ Uwu Mbuban kwun̄isi itọbọ ebum inyi owu?
Sà ìre ekene mônene Sayọn
ogoon̄ mbuban kwun̄?
2 Îtata ogwu òsisiki ibot inyi owu me lek inu geelek îkirọ,
mè ikirọ inu ònenen,
mè ikitumu atikọ me ijọn̄ ijọn̄ ejit kan̄;
3 ogwu ìkakitumu ofifi ene ìfiat;
ìkakirọ ene ijo inu;
ìkakitiik ene itiik.
4 Ene ya si môre ogwu òkida lek isan̄a me lek ebi ijo irọrọ,
mè ikikaan̄ ulibi inyi
ebi geelek ìkimin Okumugwem;
ogwu ìkakilọ irọrọ use geelek îchieekbe iso;
ikerere use eyi môkọtbe itap ọmọ unan me lek.
5 Ene ya môre si ogwu òkifọọk ikpoko inyi ene me ikike,
ìkakitoon̄ urot me inyọn̄;
ogwu ìkagọọk me ebek ikpoko udun̄,
mè ìsi ìkeke ata-ikọ ataak
ìkeme ogwu ikalọge inu geege.
Ogwu òkirọ inu kechi,
ukot ìbonyenye me ijọn̄ ire mgbọ geelek.