Ogwu mbubut ìbe kpunu Awaji
Ìkup inyi ogwu òjeen̄ okwa. Okwa kè Debit.
14
Ogwu burubut ìtumu me ejit kan̄ibe ke kpunu Awaji;
ebi burubut mîbubuku me ugwem,
mè ikirọ òchichaka inu;
kpunu ene ge ikeyi me etete kiban̄ òkirọ ata inu.
2 Okumugwem Awaji ìkup me emen inyọn̄
isiki chieen̄ ikpọ bọn ebilene me linyọn̄,
mè ìre îkaan̄ ebi ìkikọt igobo inu itet,
mè ikitọbọ ebum inyi ọmọ.
3 Ire, otutuuk kiban̄ mîrurọn̄ọ igwook;
ema otutuuk mîje ilọ, mè ibubuku;
kpunu kubọk ene ge ikeyi òkirọ ata inu.
4 Ìre otutuuk ebi ikpak chi,
ebi ìkitaka ebi n̄a kubọk etaka fituru,
ìre ema kperiọọn̄ inu geege ni?
Me atikọ ema mîjit irariaak uriaak inyi Okumugwem.
5 Ere ema ekupbe, ukpook môgọm ema uga,
mije, Awaji ìkigọọk ebi ata irọrọ ikeke.
6 Ebi ijo irọrọ ekijijaka nkeek ebi ugbọọn̄;
ire, Okumugwem okichit ebi ugbọọn̄ lek.
7 Jei, îlọk emi enenen ibe
Awaji ikup me Sayọn inyan̄a ebi Ijeren!
Mgbọ Okumugwem môrọbe
inyi inu ikpọk ije ijaan̄ me lek ebi kan̄,
ebi Ijeren, bọn kè Jekọp mênwọọn̄ unwọọn̄,
mè ibele ejit.