Uwu ogwu ubọọn̄ Solomọn
7
Ire, me lek uwu eyi kan̄, ogwu ubọọn̄ Solomọn ìsa akọp mè acha ita inama isan̄a. 2 Uwu ge me lek uwu kan̄, ekigwen Uwu Ubọọn̄ eyi Oron Lebanọn. Ujọn̄ọ uwu keya ìre akọp mè ejit iba mè okpọkọ, sa ubene kan̄ ore ejit jaaba mè okpọkọ. Uwu ya îkaan̄ atà uti olik me ugban me ugban ikeya ugban ini, mè ikaan̄ ogbugboon̄ uti olik me ibot otu atà cha ge ge. 3 Esa uti olik igon uchit ebek uwu ya ikana; akọp ogbugboon̄ ini mè go me inyọn̄ ugban atà ita obeme uchit ya ikaan̄, akọp mè go me ugban ge. 4 Mîtap ukpa nruruk ita ifo agan̄ inyọn̄ me lek agba uwu cha ge ge, ukpa nruruk ita òkup me agba uwu ge ìkiyaka isi ida ukpa nruruk ita òkup me agba uwu eyi òkikpọ eya. 5 Otutuuk isotu mè ubọk afọn̄ kiban̄ ìkaan̄ otu utọn̄ ini. Ema ekup ukpa ita, ge ìyaka isi ikikpọ ge.6 Me lek uwu kè Solomọn îkaan̄ si uwu ekigwen Uwu Atà eyi ujọn̄ọ kan̄ orebe akọp mè ejit iba mè okpọkọ, sà uwele kan̄ ore ejit jaaba mè okpọkọ. Uwu ya îkaan̄ irak oyet me agan̄ isi, mè ikaan̄ okwuun̄ òwọwọọk isibi, eyi esabe atà ibene ikaan̄.
7 Înama uwu ogboon̄ ubọọn̄, eya ore Uwu Oyerebet, ere îkikup isibi oyerebet. Esa uti olik igbaka lek uwu keya ibene me ijọn̄ ire lek uchit ebek uwu ya. 8 Uwu eyi ọmọ okiluk, enama ifo udun̄ isa inichak me lek Uwu Oyerebet. Uwu keyi, enama si kubọk uwu kechilọ. Chieen̄ uwu yi si ke Solomọn onama inyi gwun̄ enenwaan̄ ogwu Fero îdobe me lek nwa.
9 Otutuuk uwu chi geelek, ibene me lek ọdọ ire lek ebek, mè ibene me agan̄ oyet ire lek ikpele oyet egep kiban̄, esa ewuuk unye otu ewe inama. Ewuuk cha etọtọ ibak, mè isa ojijọọk ikpaan̄ isi mè udun̄ itat. 10 Esa atalek ewuuk òmimiin̄ itap ọdọ uwu cha. Usini ewuuk cha ìre ejit iba mè okpọkọ me ujọn̄ọ, usini ìre ejit iba. 11 Me inyọn̄ ewuuk echi ọdọ cha ke etoon̄ atalek ewuuk etọtọ ibak mè ogbugboon̄ uti olik. 12 Mgban òkakana ikpele oyet egep ya, esa ewuuk ekpakpaan̄ inama. Isitoon̄ ewuuk ekpakpaan̄ ya ukpa ita, mîra initoon̄ ogbugboon̄ uti olik ukpa ge, igọọk ubọk enamabe oyet egep agan̄ emen eyi Uwu Mbuban Okumugwem melek irak oyet kan̄.
Ibabala Uwu Mbuban
13 Ogwu ubọọn̄ Solomọn oneniria osat igwen ogwu usọ ge ekigwen Urama me ama Taya inu. 14 Nga kè Uram ìre nwakpa ònan̄a me otoko kè Nafitali, nte kan̄ ore ogwu Taya, ogwu usọ ikwaan̄ ekwe. Uram îkaan̄ òjot òjot iriọọn̄-inu, mè ngobo-ntet mè ifuk-ibot me lek chieen̄ ikwaan̄ ekwe geelek. Ọmọ onunu me lek ogwu Ubọọn̄ Solomọn, mè inirọ otutuuk ikwaan̄ Solomọn odọmọbe inyi ọmọ.
15 Îtọkọ atà ekwe iba, ujọn̄ọ ge kan̄ ìre ejit ini mè okpọkọ, ekirikit kan̄ ore ejit ita. 16 Îrom si ejiik iba esabe ekwe itọkọ. Ejiik cha ke esa itoon̄ me inyọn̄ ibot atà cha. Ubene ejiik cha ge ge ìre ejit ge mè agbagba otubọk iba. 17 Mkpọn elọkbe kubọk ute ke esa ililọkọ ikana lek ejiik cha òkup me inyọn̄ ibot atà cha, ejiik ge ge ìkaan̄ mkpọn jaaba. 18 Uram îsa ekwe irom mfut pomegaranet ugbọ iba iba ikat ikana mkpọn cha elọkbe kubọk ute, isa ibala lek ejiik cha òkup me ibot atà cha ge ge. 19 Ejiik echi òkup me inyọn̄ atà òkup me irak oyet ìkakana igwook kubọk ajakajak lili okikup, ubene ge kan̄ ìre ejit ge. 20 Esa efit mfut pomegaranet iba etọkọbe ikat me ukpa me ukpa ikana ejiik ibot atà iba cha ibene isaba ere òkpukpulu isibi òriaak me lek mkpọn elọkbe kire ute ya. 21 Îgwuun̄ atà me irak oyet Uwu Mbuban, ge me agan̄ osiki, ge me inyọn̄. Eyi agan̄ osiki ke îgwen Jakin, sà eyi inyọn̄ ke îgwen Bowaji. 22 Ejiik òkup me ibot atà cha ìkana igwook kubọk ajakajak lili okikup. Ikeya ke ikwaan̄ atà cha ota.
23 Îrom si nga otin̄ ekwe ge òkana okokop, eyi ekigwen Okwaan̄. Uwele otu kan̄ bene me agba re agba ìre ejit iba mè okpọkọ, ugwuuk kan̄ ore ejit ge mè agbagba otubọk iba, sà ekirikit kan̄ ore ejit jaaba mè okpọkọ. 24 Mîtọkọ inu òbet lek osisem isa igbaka ikana me irak ebek Okwaan̄ ya okokop, akọp osisem iba ke etaak ikpọ me lek ujọn̄ọ ìkike iba ejit ge ge. Osisem cha ìkana Okwaan̄ ya ukpa iba, egbaan̄ ema melek Okwaan̄ ya itọkọ lek ge.
25 Okwaan̄ ya ìkeke me inyọn̄ akọp mè eriembuuk iba, ita okikpọ agan̄ inyọn̄, ita okikpọ agan̄ ichep-ura, ita okikpọ agan̄ osiki, sà ita okikpọ agan̄ mbum-ura, udun̄ kiban̄ ìyaka ijeen̄ agan̄ emen. Inyọn̄ kiban̄ ke Okwaan̄ ya okeke. 26 Ulobo akpọk Okwaan̄ ya ìre uwele otubọk ini, irak ebek kan̄ ìbet lek irak ebek ekpen̄, ìkpukpulu isibi kubọk ajakajak lili. Okwaan̄ ya ìkiben obop ojọngwu mun̄ go mè efit go.
27 Uram îsa si ekwe irom akọp ngugọọn̄ ekpirikpo, ujọn̄ọ ge ge ìre ejit ge, uwele ore ejit ge, sà ubene ore agbagba otubọk gweregwen. 28 Ikeyi ke erom ngugọọn̄ cha: Esa ekwe uwele akpọk inwaan̄ me lek agbasi. 29 Mîtọkọ egbe àtat mè eriembuuk mè ebi mbem emen inyọn̄ itoon̄ me inyọn̄ ekwe uwele akpọk cha òkup me agbagba agbasi cha, mè isa inu itet agbasi cha inye me inyọn̄ ibot, mè isa ekwe ebọbọn̄ irom ajakajak isa ikpa me inyọn̄ mè irak egbe àtat cha mè eriembuuk cha. 30 Kpa ngugọọn̄ îkaan̄ ekpirikpo ekwe ini mè agọm ekwe. Otu utọn̄ geelek me lek otu utọn̄ ini kan̄ îkaan̄ ukot ini etoon̄be okwa ekwe me inyọn̄. Esa ekwe ebọbọn̄ irom ajakajak, mè isa ikpa me agba isi ukot cha geelek. 31 Ngugọọn̄ cha îkaan̄ otu me inyọn̄ agan̄ emen. Otu cha îkaan̄ agbasi òkana okokop òkibeme okwa cha. Ugwuuk kiban̄ ge ge ìre agbagba otubọk iba. Otu cha ìkana okokop, uwele otu kiban̄, nan̄a me agba saba toon̄ me agba, ìre agbagba otubọk ita. Esa ekwe ebọbọn̄ irom ajakajak isa ikpa ikana me agan̄ udun̄. Ekwe uwele akpọk òkup me lek ngugọọn̄ cha ìkaan̄ isi ini, ìkakup okokop. 32 Ekpirikpo ini ngugọọn̄ cha ge ge okaan̄be ìkup me irak ere uwele akpọk cha. Egbaan̄ agọm ekpirikpo cha itọkọ lek ge melek ukot ngugọọn̄ cha. Uwele ekpirikpo cha ge ge, nan̄a me agba saba toon̄ me agba, ìre agbagba otubọk ita. 33 Erom ekpirikpo cha ibet lek ekpirikpo ukot uji akọn̄, agọm melek otu utọn̄ kiban̄ mè ndali melek okpin kiban̄ esa alata itọkọ.
34 Ngugọọn̄ cha ge ge ìkaan̄ ubọk ini, ubọk ge me otu usọk ge egbaan̄be irom lek ge melek ngugọọn̄ keya. 35 Me inyọn̄ ibot ngugọọn̄ cha ge ge, îkaan̄ inu ge òkakana okokop, eyi uwele kan̄ orebe agbagba otubọk ge. Ukot ngugọọn̄ cha melek ekwe uwele akpọk cha egbagbaan̄ itọkọ lek ge melek ngugọọn̄ cha. 36 Uram îtibi ebi mbem emen inyọn̄ mè itibi egbe àtat melek uti asaak me ere geelek òbobook me isi ukot mè isi ekwe uwele akpọk cha òkup me lek ngugọọn̄ cha, mè isa ekwe ebọbọn̄ irom ajakajak ikpa ikana lek otutuuk cha. 37 Ikeyi ke îrom akọp ngugọọn̄ cha. Etọkọ ema otutuuk me emen ubot yaage, ema erere ìkike, mè ire lek yaage.
38 Îrom akọp okwa ekwe, okwa ge me inyọn̄ ngugọọn̄ ge. Uwele otu okwa cha ge ge ìre ejit ge nan̄a me agba saba toon̄ me agba. Okwa ge ìkiben efit ojọngwu mun̄ mè akọp. 39 Ìsun̄ ngugọọn̄ cha go me agba agan̄ osiki Uwu Mbuban, mè isun̄ go kechilọ me agba agan̄ inyọn̄. Okwaan̄ ya ke îyik me usọk agan̄ osiki Uwu Mbuban me ibot usọk agan̄ mbum-ura. 40 Îrom si ebi kè okwa mè orọk mè ewop inyan eje.
Nroon̄ ikwaan̄ Uwu Mbuban
Ikeya ke Uram orọ otutuuk ikwaan̄ kan̄ îrọbe inyi ogwu ubọọn̄ Solomọn me Uwu Mbuban Okumugwem isan̄a.
41 Inu îrọbe ìre: atà iba;
mè ejiik iba òbet lek ewop òkup me inyọn̄ ibot atà cha;
mè ukpa mkpọn iba elọkbe kubọk ute isa ibala lek ejiik iba cha òbet lek ewop òkup me inyọn̄ ibot atà cha;
42 mè efit mfut pomegaranet ini òkup me lek ukpa mkpọn iba elọlọk (ukpa pomegaranet iba me lek ukpa mkpọn ge esabe ibala lek ejiik cha òbet lek ewop echi òkup me inyọn̄ atà cha);
43 mè akọp ngugọọn̄ cha mè akọp okwa òje melek kiban̄;
44 mè Okwaan̄ ya melek akọp mè eriembuuk iba òkup me irak kan̄;
45 melek okwa mè orọk mè ewop inyan eje.
Otutuuk inu chi Uram orọbe inyi ogwu ubọọn̄ Solomọn me Uwu Mbuban Okumugwem, ìsa ekwe ekwukbe lek irọt itoon̄ irọ. 46 Îre me lek òla ijọn̄ okwaan̄ Jodan me etete Sukot melek Jeretan ke ogwu ubọọn̄ obe ema ekup erọ inu cha. Esa arika irọ ubot esabe itọkọ inu cha. 47 Solomọn ìkatọ ulobo inu cha, mije, îwa enenen. Eya orọ, kperiọọn̄ ulobo ekwe esabe irom inu cha.
48 Solomọn orọrọ si otutuuk nroon̄ ikwaan̄ òkup me Uwu Mbuban Okumugwem.
Inu cha ìre: ntook alata araran̄;
mè ikasi alata araran̄ cha ekisa itoon̄ Fituru Isi Okumugwem;
49 mè ngugọọn̄ mkpukan̄ atalek alata araran̄ (go me agan̄ ulom, go me agan̄ ujit, me isi ere mbuban eyi emen emen); mè ajakajak, mè otitọn̄, mè otu-ucha, esa alata araran̄ irom otutuuk cha;
50 mè okwa, mè sisini ekisa ikpaan̄ ekwut mkpukan̄, mè ewop inyan eje,
mè ngigọ nsensi, mè uchieen̄ iwọp nsensi, esa alata araran̄ irom otutuuk cha;
mè mgba alata araran̄ echi lek afọn̄ agwut emen emen, òre Ere Òkup Mbuban Ichit, mè echi lek afọn̄ uga isotu Uwu Mbuban.
51 Mgbọ ogwu ubọọn̄ Solomọn osibe otutuuk ikwaan̄ me lek Uwu Mbuban Okumugwem isan̄a, inenisa inu echi ogwu ute Debit ofakabe itap me ubọk Awaji inisun̄ me uwu isun̄-inu òkup me Uwu Mbuban Okumugwem. Inu cha ìre inu alata araran̄ mè alata okuket mè inu ibala uwu.