Nroon̄ ikwaan̄ Uwu Mbuban
4
Me ida ogwu ubọọn̄ Solomọn, enenisa ekwe irọ ntook ngwugwa ge eyi ujọn̄ọ kan̄ orebe ejit go, uwele kan̄ orere si ejit go, sà ubene kan̄ ore ejit iba mè ìkike iba. 2 Enenirọ otin̄ ekwe ge òkana okokop eyi ekigwen Okwaan̄. Uwele otu kan̄, bene me agba agan̄ ge saba toon̄ me agba agan̄ keyilọ, ìre ejit iba mè okpọkọ, ubene kan̄ ore ejit ge mè agbagba otubọk iba, sà ekirikit kan̄ ore ejit jaaba mè okpọkọ. 3 Erorom inu òbet lek eriembuuk ikana ukpọk otu Okwaan̄ ekwe ya, akọp eriembuuk me ujọn̄ọ agbagba otubọk iba. Etọkọ eriembuuk cha onineen̄ iba, egbagbaan̄ ema melek Okwaan̄ ya irom lek ge.4 Okwaan̄ ya ìkeke me inyọn̄ akọp mè eriembuuk iba. Ita okikpọ agan̄ inyọn̄, ita okikpọ agan̄ ichep-ura, ita okikpọ agan̄ osiki, sà ita okikpọ agan̄ mbum-ura, udun̄ kiban̄ ìyaka ijeen̄ agan̄ emen. Îre inyọn̄ kiban̄ ke Okwaan̄ ya okeke. 5 Ulobo akpọk Okwaan̄ ya ìre uwele otubọk ini. Irak ebek kan̄ ìbet lek irak ebek ekpen̄, ìbebeke isibi kubọk ajakajak lili. Okwaan̄ ya ìkiben obop ojọngwu mun̄ go mè efit ojọngwu go. 6 Mîrom si akọp okwa ebekisa igwọk inu; go ke esun̄ me agan̄ osiki, mè isun̄ go kechilọ me agan̄ inyọn̄. Emen okwa cha ke ekigwọk inu geelek ebesa igwa ngwugwa ewọwọp iriọk. Ire, mun̄ emen Okwaan̄ ya ke ebi ngwugwa ekisa igwọk inu.
7 Solomọn onenirọ akọp ngugọọn̄ alata araran̄, igọọk me ubọk etọbe, mè ikpulu iyik me emen Uwu Mbuban, go me agan̄ osiki, go me agan̄ inyọn̄.
8 Îrọ akọp ikasi fituru mbuban itap me emen Uwu Mbuban, go ke îyik me agan̄ osiki, go kechilọ ke îyik me agan̄ inyọn̄. Îsa si alata araran̄ irom efit ewop inyan eje.
9 Înama oyet egep eyi ebi ngwugwa, mè inama si oyet egep ilile, mè irọ afọn̄ itap me oyet egep ilile ya, mè isa ekwe ichọkọ ichit lek afọn̄ cha. 10 Ineniben Okwaan̄ ya iyik me agan̄ osiki, me ibot usọk agan̄ mbum-ura me emen Uwu Mbuban.
11 Îrọ si ebi kè okwa mè orọk mè ewop inyan eje.
Ikeya ke Uram orọ otutuuk ikwaan̄ kan̄ îrọbe inyi ogwu ubọọn̄ Solomọn me Uwu Mbuban Okumugwem isan̄a.
12 Inu îrọbe ìre: atà iba;
mè ejiik iba òbet lek ewop òkup me inyọn̄ ibot atà cha ge ge;
mè ukpa mkpọn iba elọkbe kubọk ute eyi esabe ibala lek ejiik iba òbet lek ewop òkup me inyọn̄ ibot atà cha;
13 mè efit mfut pomegaranet ini òkup me lek ukpa mkpọn iba elọlọk (onineen̄ pomegaranet iba me lek ukpa mkpọn ge esabe ibala lek ejiik òbet lek ewop cha echi òkup me inyọn̄ atà cha);
14 mè ngugọọn̄ cha melek okwa òje melek kiban̄;
15 mè Okwaan̄ ya melek akọp mè eriembuuk iba òkup me irak kan̄;
16 melek okwa mè orọk, mè ochichim cha, mè otutuuk nroon̄ ikwaan̄ òje me lek.
Otutuuk inu chi Uram-Abi orọbe inyi ogwu ubọọn̄ Solomọn me Uwu Mbuban Okumugwem, ìsa ekwe ekwukbe lek irọt itoon̄ irọ. 17 Îre me lek òla ijọn̄ okwaan̄ Jodan me etete Sukot melek Sereda ke ogwu ubọọn̄ obe ema ekup erọ inu cha. Esa arika irọ ubot esabe itọkọ inu cha. 18 Inu chi geelek Solomọn orọbe îwa enenen, mije keya, kpetọ ulobo ekwe esabe irom ema.
19 Solomọn îrọ si otutuuk nroon̄ ikwaan̄ òkup me Uwu Mbuban Awaji.
Inu cha ìre: ntook alata araran̄;
mè ikasi echi ekisa itoon̄ Fituru Isi Okumugwem;
20 mè ngugọọn̄ mkpukan̄ atalek alata araran̄, melek otitọn̄ kiban̄ echi òkilomo me isi ere mbuban eyi emen emen, ike edọmọbe;
21 mè ajakajak, mè otitọn̄, mè otu-ucha, otutuuk ìre atalek alata araran̄;
22 mè sisini ekisa ikpaan̄ ekwut mkpukan̄, mè ewop inyan eje,
mè ebi kè nkọm, mè ngigọ nsensi, otutuuk ìre alata araran̄;
mè afọn̄ alata araran̄ cha òkup me lek Uwu Mbuban: afọn̄ agan̄ emen emen me Ere Òkup Mbuban Ichit, mè afọn̄ uga isotu Uwu Mbuban.