Solomọn înama Uwu Mbuban
3
Solomọn onenibene inama Uwu Mbuban Okumugwem me Jeruselem me inyọn̄ Ogoon̄ Moraya, me ere igen̄ akpa kè Arawuna ogwu Jebus, ere Okumugwem okanabe isibi me isi kè Debit ogwu ute. Îre ere keya ke Debit odọmọ isun̄ inyi Uwu Mbuban ya. 2 Solomọn ìbene inama Uwu Mbuban ya me òso usen iba me òso onyan̄ iba me òso acha ini me lek mkpulu kan̄.3 Ọdọ Uwu Mbuban Awaji ya Solomọn otọbọbe ìkup ikeyi: ujọn̄ọ kan̄ ìre akọp mè ejit go, sà uwele kan̄ ore ejit go, igọọk me otitọ eyi ukot oka mgbọ. 4 Irak oyet òkup me agan̄ isi Uwu Mbuban ya, ujọn̄ọ kan̄ ìre ejit go, òrere ìkike melek uwele Uwu Mbuban ya. Ubene kan̄ ore akọp ejit ita.
Esa alata araran̄ eyi kpewọlọ ichọkọ ichit otutuuk agan̄ emen. 5 Esa uwot uti alaga inwan̄ igon ichit otutuuk emen uga uwu-ile ya, mè inisa atalek alata araran̄ ichọkọ itoon̄ me inyọn̄, mè inigwook uti asaak mè mkpọn ichit otutuuk lek. 6 Esa atalek ewuuk unye otu ewe ibala emen Uwu Mbuban ya. Alata araran̄ esabe ibala emen uwu ya, elep inan̄a me Parifayim. 7 Esa alata araran̄ ichọkọ ichit lek otutuuk agba lek uwu ya, mè lek ntọọn̄ esabe irak inyọn̄ uwu ya, mè otutuuk ubọk afọn̄, mè otutuuk afọn̄, mè irọkọ ebi mbem emen inyọn̄ me otutuuk agba lek uwu ya.
8 Eneninama Ere Òkup Mbuban Ichit, ujọn̄ọ kan̄ ìre ìkike melek uwele Uwu Mbuban ya, òrere ejit go. Uwele kan̄ onenire si ejit go. Enenisa atalek alata araran̄, eyi ulobo kan̄ orebe akọp obop kilo iba, ichọkọ ichit otutuuk agba lek uwu ya agan̄ emen. 9 Omimin alata araran̄ ge ge esabe isi ikwaan̄ me lek Uwu Mbuban ya îlobo iraka ìkike iba kilo ge. Esa si alata araran̄ ichọkọ ichit lek agba uwu echi agwut agan̄ inyọn̄.
10 Me Ere Òkup Mbuban Ichit ke etọkọ ebi mbem emen inyọn̄ iba, mè isa alata araran̄ ichọkọ ichit otutuuk lek. 11 Uwele uwop ebi mbem emen inyọn̄ cha, bene me utọn̄ uwop agan̄ ge si re utọn̄ uwop agan̄ keyilọ ìre ejit go. Uwop ge, eyi ujọn̄ọ kan̄ orebe ejit ge mè agbagba otubọk iba, ochak me lek agba uwu, sà uwop òso iba, eyi ujọn̄ọ kan̄ orebe si ejit ge mè agbagba otubọk iba, ochak me utọn̄ uwop eyi ogwu mbem emen inyọn̄ eyi òso iba. 12 Ikeya si ke uwop ogwu mbem emen inyọn̄ eyi òso iba ore ejit ge mè agbagba otubọk iba, mè ijọn̄ọ isi ichak me lek agba uwu, sà uwop kan̄ eyi òso iba ore si ejit ge mè agbagba otubọk iba, mè ijọn̄ọ isi ichak si me lek uwop eyi adasi ogwu mbem emen inyọn̄. 13 Uwele uwop ebi mbem emen inyọn̄ iba cha ìgbaan̄ ire ejit go. Ema ekeke me ukot kiban̄, mè iyaka isi ikikpọ emen uwu-ile Uwu Mbuban ya.
14 Enenisa eri oluku oluku, mè irio irio, mè eje eje, mè lilin̄, ilọk ekwut ukwek, mè ilọk ebi mbem emen inyọn̄ me lek, isa igbaka ichit isotu Ere Òkup Mbuban Ichit.
15 Solomọn îrọ si uga atà iba igwuun̄ me agan̄ isi Uwu Mbuban ya, ujọn̄ọ ge ìre ejit jeeta mè agbagba otubọk gweregwen. Ubene ejiik òkup me inyọn̄ ibot atà cha ge ge ìre ejit ge mè agbagba otubọk iba. 16 Mîrom mkpọn kubọk asi ebeka isa itoon̄ me inyọn̄ atà cha, mè irom efit mfut pomegaranet isa ijijen me lek mkpọn cha. 17 Inenigwuun̄ atà cha me isi Uwu Mbuban ya, ge me agan̄ osiki, ge me agan̄ inyọn̄. Eyi òkup me agan̄ osiki ke îgwen Jakinb sà eyi òkup me agan̄ inyọn̄ ke îgwen Bowaji.c