4 Ogwu ubọọn̄ Ijeren ofọfọọk ibe, “Ogwukaan̄ n̄a ogwu ubọọn̄, ike owu otumube, emi nchieek. Emi melek otutuuk inu geelek nkaan̄be ìre echi kwun̄.”

5 Ebi osat cha esisi ilook Ben-Adadi etip ya, mè ikpọk inu, mè inibe, “Ben-Adadi ìbe ikeyi: ‘Nria ebi osat ibe enetumu enyi owu ibe ke alata okuket kwun̄ mè alata araran̄ kwun̄, melek ebi nwa kwun̄ mè bọn ebirieen̄ kwun̄ ìre echi n̄a. 6 Ire, me ike mgbọ keyi iyakwut, mâria ebi ikwaan̄ n̄a inu me lek kwun̄, ibe enin̄ uwu kwun̄, mè enin̄ si uwu ebi ibot ikwaan̄ kwun̄, mè ewọlọ emen uwu cha geelek, mè echiaan̄ inu geelek òkaan̄ oruru inyi owu esa ekaan̄ me ubọk ejet emi.’ ”

7 Ogwu ubọọn̄ Ijeren ogwegwen ebi ugane ido Ijeren ititiin̄, mè itumu inyi ibe, “Ìkpọ! Ùrioon̄ ire eyi ene yi okiweek itatap! Îdasi iria etip ibe ọmọ ìkiweek ebi nwa n̄a mè bọn ebirieen̄ n̄a, mè alata okuket mè alata araran̄, emi ǹkajit inyinyi ọmọ inu îweekbe.”

8 Otutuuk ebi ugane melek otutuuk ebi ido Ijeren efọfọọk ibe, “Kagban̄. Kachieek si ìnyi.”

9 Ogwu ubọọn̄ onenitumu inyi ebi osat kè Ben-Adadi ibe, “Ìtumu ìnyi ogwukaan̄ n̄a ogwu ubọọn̄ ibe ke emi ogwu usun̄ kè ogwugwu mârọ otutuuk adasi inu cha îdobe, ire, ke emi m̀kpakọt irọ echi òso mgbọ iba yi îdobe.” Ebi osat cha efofon, mè isa ufọọk-otu ya isi ilook Ben-Adadi.

10 Ben-Adadi oneniria ofifi etip ijet Eyabu ibe ikeyi: “Kè ebi kè awaji esulu emi ekpan̄, ire ǹkachan Sameria ìnọọn̄, ire lek, achiaan̄ môsikbe me ijọn̄ ama ya kposobe otutuuk ebi akọn̄ n̄a ikpukpulu akpa ubọk ge ge isa ifo.”

11 Ogwu ubọọn̄ Ijeren onenifọọk ibe, “Ìsi ìtumu ìnyi, ibe ke ogwu òsulu akama ititiin̄ ebi akọn̄ ìkakigugo lek, îtata ebi akọn̄ ekaka, mè inikwak ekpete ijọk.”

12 Etip yi onenire Ben-Adadi utọn̄ mgbọ ọmọ melek ofifi ebi ubọọn̄ ekupbe me emen atanga kiban̄ ikinwọ miin̄. Inyinyi ebi akọn̄ kan̄ ida ibe, “Ìbem lek akọn̄.” Ebi kan̄ ebebem lek isisi itim akọn̄.

13 Ogwu nriran ge onunu initumu inyi Eyabu ogwu ubọọn̄ Ijeren ibe, “Okumugwem ìtumu ibe ikeyi: ‘Ke omun̄ ogbogbo urum ebi akọn̄ chi! M̀bakakana ema itap owu me ubọk cherekeyi, inyi owu môsa iriọọn̄ ibe ke emi nre Okumugwem.’ ”

14 Eyabu onenido ogwu nriran ya ibe, “Ìre ekene ke Okumugwem obosa itim akọn̄ yi?”

Ogwu nriran ya ofọfọọk ibe, “Okumugwem ìbe ke îre asasa ebi isi akọn̄ ìkup me irak ebi ibot akọn̄ me agan̄ me agan̄ eberọ.”

Eyabu onenido si ibe, “Ìre ekene obobene akọn̄ yi?”

Ogwu nriran ofọfọọk ibe, “Îre owu.”

15 Eyabu onenigwen asasa ebi isi akọn̄ ìkup me irak ebi ibot me agan̄ me agan̄ ititiin̄, ema ìre efit ene iba mè akọp ita mè iba. Itititiin̄ si otutuuk ebi akọn̄ Ijeren ìsisik igbaalek, otutuuk onenire obop ebi akọn̄ jaaba. 16 Ebi akọn̄ cha enenijibi akọn̄ isibi me ejit ikarek. Me ike mgbọ ya, Ben-Adadi melek akọp ebi ubọọn̄ ita mè iba cha ebi ìgọgọọk ọmọ ikeke ekup me emen atanga kiban̄ cha ikinwọ miin̄ isa. 17 Asasa ebi isi akọn̄ cha ìkup me irak ebi ibot akọn̄ me agan̄ me agan̄ edasi inan̄a ije.

Sabum mgbọ ya, Ben-Adadi îto ebi enun̄unun̄ ikana ibe ekekpọ ere enyi ọmọ. Ife cha enenilook ibe ke ebi akọn̄ mêkinan̄a me Sameria isibi inu.

18 Ben-Adadi oneninyi ebi kan̄ ida ibe, “Ire ife cha inu ibeniweek esuuk, ìtet ema me agam. Ìyaka irere akọn̄ ke ema esa inu, ìtet si ema me agam.”

19 Asasa ebi isi akọn̄ cha ìkup me irak ebi ibot akọn̄ me agan̄ me agan̄ enenikije me isi isibi me emen ama, ebi akọn̄ Ijeren ekekigọọk ema me udun̄. 20 Ogwu akọn̄ Ijeren geelek òchichichini ogwu akọn̄ Aram, îra ifieek ito. Ebi akọn̄ Aram ebebene ikilim, ebi akọn̄ Ijeren ekekirieen̄ ema. Ire, Ben-Adadi ogwu ubọọn̄ olilibi me inyọn̄ inyinya akọn̄ kan̄ inan̄a, mè inwọnọ, ọmọ melek usini ebi kan̄ ìkilibi me inyọn̄ inyinya. 21 Ogwu ubọọn̄ Ijeren onanan̄a isibi inu, mè itim akọn̄ unye unye melek ebi Aram, mè ijijaka inyinya akọn̄ kiban̄ cha melek ebi ìkikọkọp, mè ikpan̄ si ebi akọn̄ Aram igwook nsebe nsebe.

22 Sọnja mgbọ, ogwu nriran ya onunu initumu inyi ogwu ubọọn̄ Ijeren ibe, “Si tutuun̄ lek. Ikaan̄ ubọk geelek oriọọn̄be obosa ibem lek akọn̄, rọ, mije, ogwu ubọọn̄ Aram môkpọk ijibi akọn̄ inu owu lek me aya otu ura acha òkinunu.”

23 Ebi ikwaan̄ ogwu ubọọn̄ Aram enenisi itumu inyi ogwu ubọọn̄ kiban̄ ibe, “Awaji ebi Ijeren ìre awaji inyọn̄ ogoon̄, eya orọ ema enyebe lek igak eji. Ire, eji esi etim ema akọn̄ me lek me òla ijọn̄, mè ekpọ-nu mè ìre eji kpebefat inye lek igak ema. 24 Inu owu oborọ ìre ikeyi: San̄a otutuuk ebi ubọọn̄ cha otobe me isi akọn̄, mè sa ebi ibot akọn̄ to me irek kiban̄. 25 Mgbọ keyi, titiin̄ ojelek adasi urum akọn̄ ebọkọbe owu ijijaka cha. Otu ifuk ene yaage, otu ifuk inyinya akọn̄ yaage, mè otu ifuk uji akọn̄ yaage si. Tutuun̄ lek ikeyi san̄a, mè eji esi etim ema akọn̄ me lek me òla ijọn̄, mè kpọ mè ìre eji kpebetim ikpan̄ ema.” Ben-Adadi obọbọkọ nteme kiban̄ itap, mè irọ si ikeya.

26 Me aya otu ura ofifi acha, Ben-Adadi otititiin̄ ebi Aram, mè inijibi akọn̄ isi Afek ibosi itim me lek ebi Ijeren. 27 Ebi Ijeren enenititiin̄ ebi akọn̄ kiban̄, mè itutuun̄ ema itap me oniin̄, ema ejijibi akọn̄ isibi isi ikweek ebi Aram. Ema mîse enenen me otu ifuk, ema enikup kubọk asasa urum ebot iba. Ire, ebi Aram enyanyana ichit otutuuk inyọn̄ ijọn̄ ya gboi.

28 Ogwu nriran Awaji ya onunu initumu inyi ogwu ubọọn̄ Ijeren ibe, “Okumugwem ibe ikeyi: ‘Mije ebi Aram ekitumu ibe ke Okumugwem ìre awaji inyọn̄ ogoon̄, ke ìkare awaji iteke, mâyaka ogbogbo urum ebi akọn̄ kiban̄ chi itap owu me ubọk, inyi enyi esa eyiyi eriọọn̄ ibe ke emi nre Okumugwem.’ ”

29 Ebi akọn̄ agan̄ iba cha ekukup me orieen̄ akọn̄ kiban̄ usen jaaba, kpetim akọn̄, ge okekibene chieen̄ ikpọ ge. Me òso usen jaaba, akọn̄ obebene. Ebi Ijeren ekpakpan̄ efit obop ebi akọn̄ ukot ukot ebi Aram me egwe ge gaalek. 30 Ebi ìkwakwaan̄ isik elililiin̄ isi itap ibot me Afek, mgban ama ya ogbugbugbọ ikeme akọp obop ene iba mè jaaba, ema ekwakwaan̄. Ben-Adadi olilibi inin̄ ejit ama ya, mè isi ilet me agwut ge òkup me emen emen.

31 Ebi ikwaan̄ kan̄ enenisi itumu inyi ibe, “Kpọ, eji mîkinọ ibe ke ebi ubọọn̄ Ijeren ìre ebi ata ejit. Eji enekwun ekwut ufieejit me ebon kiji, mè esa olik ekat ekana ibot kiji, mè eneje esibi esi lek ogwu ubọọn̄ Ijeren. Usini mgbọ, môto owu nsan, mè itele inyi owu òluk ugwem.”

32 Ema enenikwun ekwut ufieejit me ebon, mè isa olik ikat ikana ibot kiban̄, mè ininan̄a ije isi imun̄ ogwu ubọọn̄ Ijeren, mè itumu inyi ibe, “Ogwu usun̄ kwun̄ Ben-Adadi oria eji ibe enetumu enyi owu ibe soso, mè owu ònye lek òtele inyi ọmọ iluk ugwem, mè okakpan̄ ọmọ.”

Ogwu ubọọn̄ onenibe ema, “Ìre ọmọ òwa si me ugwem? Ọmọ ìre ngwan̄ n̄a ma!”

33 Ife cha emumun̄ inu ya me ejit kiban̄ kubọk inu ijejeen̄, mè igwat lek ikpebe ikọ ya me otu kan̄, mè inibe ọmọ, “Iin̄, ngwan̄ kwun̄ Ben-Adadi.”

Ogwu ubọọn̄ obebe, “Ngwa, ìsi ìsa ìnu.” Esisi isa Ben-Adadi inu. Mgbọ înube, Eyabu obebe Ben-Adadi inigọọk ọmọ inin̄ emen uji akọn̄ kan̄.

34 Ben-Adadi onenitumu inyi Eyabu ibe, “Otutuuk ama cha nte n̄a obọkọbe me ubọk kè nte kwun̄, mâyaka inyi owu. Owu môkọt inichili ewe me ere geelek omabe me Damasikọs, kubọk nte n̄a ochilibe me Sameria.”

Eyabu onenibe Ben-Adadi, “Ire ochieek inye ibe ke owu môrọ inu chi, mâtele ibe owu òfo me ikike.” Eyabu onenigọọk Ben-Adadi ikaan̄ mgbaan̄-nchieek, mè itele inyi ifo.

35 Igọọk me ida Okumugwem onyibe, ene ge me etete otu ogbo ebi nriran ìkup me ere ya onenitumu inyi ogwu melek kan̄ ibe, “Soso sa inu ge sulu emi.” Ire, ogwu melek kan̄ ya ojijit.

36 Ogwu nriran ya onenitumu inyi ogwu melek kan̄ ya ibe, “Mije owu ojitbe irọrọ ida Okumugwem, osije inan̄a itele emi, egbe àtat môchim owu ikpan̄.” Mgbọ yaage ogwu enerieen̄ ya ojebe inan̄a me ere ya, egbe àtat omumun̄, mè ichim ikpan̄.

37 Ogwu nriran ya onenimun̄ ofifi ene, mè itumu inyi ibe, “Soso sa inu ge sulu emi.” Ogwu ene ya osasa inu igon ọmọ itap unan me lek. 38 Ogwu nriran ya onenisa ekwut ikana ichit isi ire mgbugbo chieen̄ kan̄, inyi ekariọọn̄ ọmọ isi, mè ininan̄a ije isi ikeke me agba oniin̄ ikikpọ mgbọ ogwu ubọọn̄ Eyabu oboniraka. 39 Mgbọ ogwu ubọọn̄ obonije iraka me ere ya, ogwu nriran ya ogwegwen, mè inibe ọmọ, “Me umin kwun̄, ogwu ubọọn̄! Emi ogwu usun̄ kwun̄ ǹnan̄a me emen akọn̄ me isi akọn̄ isibi, ene ge onenisa ogwu îtetbe me isi akọn̄ initap emi me ubọk ibe emi m̀gbala chieen̄ m̀kpọ, mè ibe emi, ire ene ya igak emi ichep, ke ebesasa ugwem n̄a inwene ibot ene ya, mè ìyaka ire, ke emi mâkpe obop ikpoko alata okuket ita. 40 Mgbọ ogwu usun̄ kwun̄ okirọ ofifi inu, ogwu enerieen̄ ya ofọfiọọk ichep.”

Ogwu ubọọn̄ Ijeren obebe ọmọ, “Ifieek-oyerebet kwun̄ ire eya ma! Owu gaalek ofieek oyerebet inyi lek kwun̄.”

41 Ogwu nriran ya ogwagwat lek isan̄a ekwut isan̄a me mgbugbo chieen̄ kan̄, ogwu ubọọn̄ Ijeren oneniriọọn̄ ibe ke îre ene ge me lek ebi nriran. 42 Ogwu nriran ya onenitumu inyi ogwu ubọọn̄ ibe, “Okumugwem ìtumu ibe ikeyi: ‘Mije owu osabe ubọk kwun̄ iria ogwu mbe ekpakpan̄,^a inyi ifo, owu môkwu mkpa me irek kan̄, ebi kwun̄ si mêkwaan̄ me irek ebi kan̄.’ ”

43 Ogwu ubọọn̄ Ijeren ogwugwu ikom ifo uwu kan̄ me Sameria melek uga unaan̄-ejit mè ufieejit.