Uko gerep kè Nebọt
21
Îkaan̄ gwun̄ enerieen̄ ge ekigwen Nebọt, ogwu Jesereli, òkakaan̄ uko gerep ge me Jesereli, me agba lek uwu ubọọn̄ kè Eyabu, ogwu ubọọn̄ Sameria. 2 Usen ge, Eyabu onenitumu inyi Nebọt ibe, “Uko gerep kwun̄ yi îgbet ere me lek uwu ubọọn̄ n̄a. Eya orọ, nyi emi uko ya, inyi mâsa iwop inwan̄ usun̄, ke mânyi owu ofifi uko gerep ònwọnwọn igak eyi keyi me useen̄. Ire eya ìkponeme owu, mâkpe owu otu ewe uko yi me ikpoko.”3 Ire, Nebọt ofọfọọk ogwu ubọọn̄ ya ibe, “Okumugwem ikachieek! Emi m̀kpasa ìrot ebi nte nte n̄a ikana inyi owu.”
4 Ufọọk-otu ya Nebọt ogwu Jesereli ofọọkbe Eyabu, ibe ke ọmọ ìkposa ìrot ebi nte nte kan̄ inyi Eyabu, osisisik Eyabu lek enenen. Inanaan̄ ejit, mè ije ifo uwu kan̄, mè isi isiki ilaak me inyọn̄ mkpilaak kan̄, mè ikana isi ida agba uwu, ìkachieek irerie inorie.
5 Jeseben ogwu nwa oneninu, mè inido ibe, “Keke orọ okifieek ejit ikeyi, mè ijit irerie inorie?”
6 Eyabu ofọfọọk ibe, “Ntumu inyi Nebọt ogwu Jesereli ibe, ‘Nyam emi uko gerep kwun̄. Ire òkaweek inyanyam, kana nyi emi, ke mânyi owu ofifi uko gerep me useen̄.’ Nebọt obebe ke ọmọ ìkponyi emi uko gerep kan̄.”
7 Jeseben ogwu nwa obebe, “Ìre ìkare owu ore ogwu ubọọn̄ òkikpulu Ijeren? Nan̄a keke, rie inorie, mè bele ejit! Emi mâbọkọ uko gerep kè Nebọt ogwu Jesereli ya isa inyi owu.”
8 Jeseben onenisa erieen̄ kè Eyabu ige ikpa, mè isa iman̄ òriọọn̄ kè Eyabu ikeme me inyọn̄, mè iniria ikpa cha ijet ebi ugane mè ebi isi ene me ama ebi kè Nebọt. 9 Etip Jeseben ogebe me ikpa cha ìre ikeyi:
“Ìsun̄ usen ijin-otu ge, mè ìto Nebọt me ere òsibi isi me ibot ikasi me etete ebi ene, 10 mè ìsa ebirieen̄ iba, ebi afa, ìto ibe ekweek irek ekebene isi ekpọ Nebọt, mè etumu ikọ etoon̄ ọmọ ibe ke îtumu Awaji ilọ, mè itumu si ogwu ubọọn̄ ilọ. Ebi afa cha isitumu ikọ ya, ìsan̄a Nebọt ìsibi, mè ìtọbọ ìkpan̄.”
11 Ebi ugane ama mè ebi isi ene ìluk me ama ebi kè Nebọt erọrọ inu Jeseben otọbe me emen ikpa îgebe iria ijet ema. 12 Ema etoto ijin-otu, mè ito Nebọt me ere òsibi isi me ibot ikasi me etete ebi ene. 13 Ebirieen̄ iba ebi afa enunu inisiki ikweek irek ikibene isi ikpọ Nebọt, mè initumu ikọ itoon̄ ọmọ me isi otutuuk ebi ene cha ibe, “Nebọt îtumu Awaji ifiat, mè itumu si ogwu ubọọn̄ ilọ.” Ebi ene etataba Nebọt isibi me emen ama, mè iteen̄ ewuuk isa itọbọ, ikwukwu. 14 Eneniria etip ijet Jeseben ibe, “Mîsa ewuuk itọbọ Nebọt, îkwu.”
15 Mgbọ Jeseben onọbe ibe ke mîtọbọ Nebọt me ewuuk, ke îkwu, itutumu inyi Eyabu ibe, “Nan̄a keke, na si bọkọ uko gerep kè Nebọt ogwu Jesereli me ìrot; uko ya eyi îjitbe inyanyam inyi owu, mè ibọkọ ikpoko. Mgbọ keyi, Nebọt îkwu, ìkayaka ìkup me ugwem.” 16 Eyabu inọnọ ibe ke Nebọt îkwu, inanan̄a ikeke, mè ije ibosi ibọkọ uko gerep kè Nebọt isak.
17 Okumugwem onenitumu inyi Ilaija ogwu Tisibe ibe: 18 “Je si chichini Eyabu ogwu ubọọn̄ Ijeren, òkup me Sameria ikikpulu. Ọmọ òwa me emen uko kè Nebọt, ìsi ibosi ibọkọ uko ya isak. 19 Tumu nyi ibe ke Okumugwem ìtumu ibe ikeyi: ‘Ke okpan̄ ene me agam isan̄a, mè ibọkọ si inu ene ya isak?’ Tumu nyi si ibe ke Okumugwem ìbe ikeyi: ‘Ere ibo olakabe eje kè Nebọt, ere yaage si ke ibo obolaka si eje kwun̄, owu me lek kwun̄!’ ”
20 Eyabu onenitumu inyi Ilaija ibe, “Ogwu ochicha n̄a, oniweek emi imun̄!”
Ilaija ofọfọọk ọmọ ibe, “Iin̄, nniweek owu imun̄, mije owu osabe lek kwun̄ inyi irọrọ ijọ inu me chieen̄ Okumugwem. 21 Kpọ, Okumugwem ìbe ke ọmọ ògwa òkisa ijo ùrioon̄ inikeme owu, ke ọmọ ìbokpakpan̄ otutuuk ebirieen̄ ebi uwu kwun̄ isan̄a me Ijeren, mè ìre bọn owot, mè ìyaka ire ebi usun̄. 22 Okumugwem ìbe ke ọmọ ìborọrọ uwu kwun̄ inu ọmọ orọbe uwu kè Jerobuwam gwun̄ kè Nebat mè uwu kè Basa gwun̄ kè Ayija, mije owu otapbe ọmọ unaan̄-ejit me ejit, mè irọ ibe ebi Ijeren erọ ijo inu.
23 “Okumugwem îtumu si òfo me lek kè Jeseben ibe ke ibo môtaka nkwukwu kè Jeseben me agba lek mgban ama Jesereli.
24 “Ogwu owot iman kè Eyabu geelek òkwukwu me emen ama, ebi kè ibo ebegwak itaka; ogwu geelek òkwukwu me oron uko, ebi kè unọn òwulu me inyọn̄ ebetọk igwak itaka.”
25 (Kpunu ofifi ene geege ogwu òrarak isa lek inyam inyi irọrọ inu ikpak me chieen̄ Okumugwem kubọk Eyabu, ogwu Jeseben, ogwu nwa, okpọkpọ ikibieen̄ inye me emen ijo inu kan̄. 26 Eyabu îchaka mbuban enenen mije îkanabe igọọk ikifaka mkpọmfaka kubọk ebi Amọ erọbe, eyi Okumugwem obakbe me lek keya irieen̄ ema isan̄a me inyọn̄ ijọn̄ kiban̄ mgbọ ebi Ijeren ekinu.)
27 Mgbọ Eyabu onọbe ikọ chi, itataba ofọnti òkup ọmọ me lek igwak, mè imọnọ ofọnti ufieejit itap, mè inin̄ ijin-otu, mè isa ofọnti ufieejit ya me lek isiki ilaak, mè ikifieek ejit, mè ikije ikana melek ofọnti ufieejit ya me lek.