Ebi Mowabu mîkpaka ibot inyi ebi Ijeren
3
Me òso akọp mè acha jeeta me lek mkpulu kè Jiosefat ogwu ubọọn̄ Juda, Joram gwun̄ kè Eyabu onenikana ubọọn̄ me Ijeren, mè ikup me Sameria ikpulu akọp mè acha iba. 2 Joram orọrọ ijo inu me chieen̄ Okumugwem, ire, ijo inu cha ìkafieek kubọk echi ogwu ute mè ogwu uga erọbe. Îgbugbọ ewuuk mfaka Baali cha echi ogwu ute orọbe. 3 Ire, ikpọkpọ itet lek inye ikirọ ijo inu cha Jerobuwam gwun̄ kè Nebat orọbe, eyi îrọbe inyi ebi Ijeren erọ ijo inu. Ìkagwu ìkom ìtele ijo inu cha.4 Meyisa ogwu ubọọn̄ ido Mowabu ìre ogwu òkpukpo anam. Acha geelek, ìkiria efit obop bọn arọọn̄ melek inwọọn̄ ònan̄a me lek efit obop orie arọọn̄ ijet ogwu ubọọn̄ Ijeren kubọk mkpukpe. 5 Me mgbọ Eyabu okwube, ogwu ubọọn̄ ido Mowabu onenikpaka ibot inyi aya ogwu ubọọn̄ Ijeren. 6 Mije keyi, me emen mgbọ ya, Joram ogwu ubọọn̄ onanan̄a me Sameria isibi isi ititiin̄ otutuuk Ijeren, inyi ebem lek akọn̄. 7 Iraria si etip ijet Jiosefat ogwu ubọọn̄ Juda ibe, “Ogwu ubọọn̄ Mowabu îkpaka ibot inyi emi. Ìre owu môgọọk emi isi akọn̄ me lek ebi Mowabu?”
Jiosefat ofọfọọk ibe, “Mâgọọk owu isi. Owu melek n̄a ìre inu yaage, ebi n̄a ìre ebi kwun̄, inyinya n̄a ìre si echi kwun̄.”
8 Jiosefat onenido ibe, “Ìre kpasi oniin̄ ke eji ebeje isi itim akọn̄ ya?”
Ogwu ubọọn̄ Ijeren ofọfọọk ibe, “Eji ebeje itibi emen èwê Edọm.”
9 Ogwu ubọọn̄ Ijeren mè ogwu ubọọn̄ Juda enenijibi akọn̄ inin̄ oniin̄, ema melek ogwu ubọọn̄ Edọm. Ema mîje igba iyak ikana me emen èwê usen jaaba, mudim ogagak ema ita. Ebi akọn̄ kpeyaka ikaan̄ mun̄ inwọnwọ, kpukpunu si eyi ebesa inyi anam kiban̄.
10 Ogwu ubọọn̄ Ijeren onenitaan̄ ukpo ibe, “Jei! Okumugwem îgwen eji ebi ubọọn̄ ita ibonikana itap me ubọk ebi Mowabu!”
11 Ire, Jiosefat onenido ibe, “Ìre kpunu ogwu nriran Okumugwem me ere yi, ogwu eji mêkọtbe ido ida Okumugwem iriọọn̄ inan̄a me otu kan̄?”
Ene ge me lek ebi ibot akọn̄ kè Joram ogwu ubọọn̄ Ijeren ofọfọọk ibe, “Ilaisia gwun̄ kè Safat, ogwu mgbọ òrere gwun̄ uwu kè Ilaija, ọmọ òwa me ere yi.”
12 Jiosefat onenibe, “Ire ogwugwa, ikọ Okumugwem ọmọ òwa me otu.” Ogwu ubọọn̄ Ijeren mè Jiosefat mè ogwu ubọọn̄ Edọm enenije isi lek kè Ilaisia.
13 Mgbọ ema erebe, Ilaisia onenitumu inyi ogwu ubọọn̄ Ijeren ibe, “Ìre kpasi inu ke emi melek kwun̄ egbaan̄ ikaan̄? Nan̄a si lek ebi nriran nte kwun̄ mè ebi nriran nga kwun̄.”
Ogwu ubọọn̄ Ijeren ofọfọọk ibe, “In̄-in̄! Îre Okumugwem ogwen eji ebi ubọọn̄ ita chi ibonikana eji itap me ubọk ebi Mowabu!”
14 Ilaisia obebe, “Kè lek ugwem Okumugwem Ogwukaan̄ Inyọn̄ mè Ijọn̄, ogwu nkisi ikwaan̄ inyi. Ire ìkare nlibibe chieen̄ kè Jiosefat ogwu ubọọn̄ Juda, kpamaraan̄ chieen̄ ikpọ owu, kpamanyinyi si owu isi. 15 Ìsa ogwu òkwak uneen̄ ge ìjet emi.”
Mgbọ ogwu òkwak uneen̄ ya okikwak uneen̄, unye Okumugwem oninin̄ emen kè Ilaisia. 16 Itutumu ibe, “Okumugwem ìtumu ibe ikeyi: Ìrọkọ udọn̄ ijot emen iteke yi. 17 Mije, Okumugwem ìbe ikeyi: Enyi kpebemun̄ efet owutbe, enyi kpebemun̄ si ibot orepbe, ire, mun̄ ìbojojot emen iteke yi. Enyi mè eriembuuk kinyi mè ofifi anam kinyi mêkakaan̄ mudim inwọ. 18 Eyi ìre mfufet inu me chieen̄ Okumugwem. Ọmọ môkana si Mowabu itap enyi me ubọk. 19 Enyi mêgbugbọ otutuuk ama ile geelek ewakbe mgban ikana igwook, mè igbugbọ si otutuuk ikpele ama kiban̄ cha geelek igwook, mè ichon uti geelek òkito ata mfut igwook. Otutuuk ogbuuruk mun̄ geelek, ìgon ìchit. Otutuuk ata ijọn̄ geelek, ìtọọn̄ ewuuk ìgwook ìchit.”
20 Me ofit iwele kan̄, mgbọ ekigwa ngwugwa ewelegwe, mun̄ okpọkpọ inan̄a me agan̄ Edọm ikigbuk inu, mè ibaak ichit otutuuk inyọn̄ ijọn̄ ya.
21 Ebi Mowabu eneninọ ibe ke ebi ubọọn̄ cha mêkijibi akọn̄ inu ibenitim ema me lek. Ema egwegwen otutuuk ebirieen̄ ebi mêkọtbe iben nroon̄ akọn̄ isibi isi akọn̄ ititiin̄, nsabọn mè ugane, mè inijibi akọn̄ isi irieen̄ me oke ijọn̄ kiban̄. 22 Me ofit iwele kan̄, mgbọ ebi akọn̄ Mowabu ebolobe chieen̄ me agan̄ egwe, ema enimun̄ ura okitoon̄ me isi mun̄ ya. Me usaba agan̄ ya ema ekekebe, utun agan̄ egwe ya ìkitoon̄ araran̄ me inyọn̄ isi mun̄ ya kubọk eje. 23 Ema ekekibe, “Ìnikpọ, îre eje! Ebi ubọọn̄ cha mîra itim akọn̄ me lek kiban̄, mè ikpan̄ lek kiban̄ isan̄a. Ngwa, ebi Mowabu, eji enesi m̀fum!”
24 Mgbọ ebi Mowabu erebe orieen̄ akọn̄ ebi Ijeren, ebi akọn̄ Ijeren enanan̄a ikeke, mè itim ema akọn̄ me lek mege ema elilim. Ebi Ijeren elililaba ema, mè ibum inin̄ ido kiban̄, mè ikpan̄ ema jakajaka, 25 mè igbugbọ ama ile kiban̄ geelek igwook. Otutuuk ata ijọn̄ geelek ema emun̄be, mîra ititen̄e ewuuk me ene me ene itọọn̄ igwook ichit. Otutuuk ibot mun̄ geelek ema emun̄be, mîra igon ichit. Otutuuk ata uti geelek òkukup, mîra ichon igwook. Inenisik Kiri Areset, ama ibot kiban̄, gaalek melek mgban ewuuk kan̄. Ebi akọn̄ olik mgbọlọ Ijeren ekpakpa mbin ikana, mè itọbọ ama ya ijijaka.
26 Mgbọ ogwu ubọọn̄ Mowabu omun̄be ibe ke akọn̄ ya înye igak ọmọ, inenisa efit ene jaaba, ebi ìriọọn̄ ifiala oge akọn̄, igbaalek kan̄ ibosi ibum itibi iraka me agan̄ ere ogwu ubọọn̄ Edọm okupbe ikitim akọn̄, ire ema kpekọt. 27 Ogwu ubọọn̄ Mowabu otetet adasi gwun̄ enerieen̄ kan̄, ogwu monibọkọ irek ubọọn̄ kan̄, mè igwu isa igwa ngwugwa me inyọn̄ mgban ama ya inyi awaji kiban̄. Inu ya ogwogwook ebi Ijeren ikpele mbiribọ me lek, ema echachak lek ikpebe, mè igwu ikom ifon ido kiban̄.