2 Ilaisia onenifọọk ọmọ ibe, “Keke ke mbarọ inyi owu? Tumu nyi emi nu, keke ke okaan̄ me uwu?”

Ogwu nwakpa ya ofọfọọk ibe, “Ogwu nte, emi ogwu usun̄ kwun̄ ǹkakaan̄ inu geege me uwu, ilọ me lek sọntiik iko aran̄ ge gaalek.”

3 Ilaisia onenitumu inyi ọmọ ibe, “Je kana si lek otutuuk ebi melek kwun̄, mè beek ibe enyi owu ogbokot ukpọk emen. Kabeek inen mè inen gaalek, beek wa. 4 Kpulu ogbokot cha taak me uwu, mè raka nin̄, mè chit afọn̄ kwek lek kwun̄ mè bọn ebirieen̄ iba kwun̄, mè bene kitọkọ aran̄ ya tap me emen otutuuk ogbokot cha. Geelek òjojot, yik da bọkọ.”

5 Ogwu nwakpa ya otetele Ilaisia, mè isi inin̄ uwu kan̄, mè ichit afọn̄ ikwek lek, ọmọ melek bọn ebirieen̄ iba kan̄. Nsabọn cha ekekiben ogbokot ukpọk emen cha ijet nga kiban̄, ikekitọkọ aran̄ itap me emen. 6 Mgbọ îtapbe aran̄ ijot emen otutuuk ogbokot ukpọk emen cha, itutumu inyi ebi bọn ibe, “Ìnyi emi ofifi ogbokot!”

Nsabọn cha efọfọọk ọmọ ibe ke kpunu ofifi ogbokot ukpọk emen. Aran̄ ya otata, ìkayaka ìgbuk.

7 Ogwu nwakpa ya osisi ikpa inu ya òrọrọ inyi ogwu ikwaan̄ Awaji ya. Inenibe ọmọ, “Si nyam aran̄ ya, mè sa ikpoko okaan̄be me lek kpe otutuuk urieek okaan̄be. Ikaan̄ eyi òsisik, ìsa ìkpọ lek kinyi, owu melek bọn ebirieen̄ kwun̄.”

8 Usen ge, Ilaisia onenisi ama Sunem. Ogwu enenwaan̄ ge òsisibi isi me ama ya onenigwen Ilaisia ibe igba uwu kan̄ inirie inorie. Mije keya, mgbọ geelek Ilaisia orebe Sunem, ìkigba uwu ya irie inorie. 9 Ogwu enenwaan̄ ya onenitumu inyi ogwu olom ibe, “Mmun̄ ibe ke ogwu enerieen̄ yi òkinu uwu kiji ìre ogwu òkup mbuban òkisi ikwaan̄ inyi Awaji. 10 Mônwọn ibe eji enama sọn̄ agwut ge me inyọn̄ otoon̄-uwu kiji, mè etap mkpilaak ge me emen, mè ikasi itoon̄-inu ge, mè ikasi ikweek-irek ge, melek otitọn̄, inyi ọmọ môkikup me ere keya mgbọ geelek isinu me lek kiji.”

11 Usen ge Ilaisia onunu Sunem, mè ije isi inin̄ uwu ya, mè inene ifo agwut ya isi isiki ilaak. 12 Inenigwen Geyaji ogwu gwun̄ uwu, mè itumu inyi ibe isi igwen ogwu enenwaan̄ Sunem ya ibe inu. Geyaji osisi igwen, ogwu enenwaan̄ ya onunu, mè inikeke me isi kè Ilaisia. 13 Ilaisia onenibe Geyaji, “Do-nu ogwu enenwaan̄ yi ibe, eyi îrọbe otutuuk inu chi inyi eji, ìre keke ke îweek ibe eji erọ enyi ọmọ. Ìre îweek ibe eji esi lek ogwu ubọọn̄ mè ìre ogwu ibot akọn̄ esi etumu ata inu ofolek ata ubọk ikwaan̄ kan̄.”

Ogwu enenwaan̄ ya ofọfọọk ibe ke ebi kan̄ ebi ọmọ olukbe me etete kiban̄ mîriọọn̄ ọmọ.

14 Ilaisia onenido Geyaji ibe, “Ìre keke ke okeek ibe erọ enyi ọmọ?”

Geyaji obebe, “Ogwu enenwaan̄ yi ìkakaan̄ gwun̄ enerieen̄ geege, ogwu olom si îkan.”

15 Ilaisia otutumu inyi Geyaji ibe igwen ogwu enenwaan̄ ya ibe inu. Geyaji ogwegwen, inunu inikeke me isotu. 16 Ilaisia onenitumu inyi ogwu enenwaan̄ ya ibe, “Me ike mgbọ keyi ofifi acha, owu môben gwun̄ enerieen̄ ikaan̄ me ubọk kwun̄.”

Ogwu enenwaan̄ ya obebe, “In̄-in̄, ogwu nte, ogwu ikwaan̄ Awaji, soso kafiaan̄ emi ogwu usun̄ kwun̄ ikeya!”

17 Ogwu enenwaan̄ ya oneninin̄ owot. Monirere ike mgbọ yaage ofifi acha, imaman gwun̄ enerieen̄, ike Ilaisia otumube inyi.

18 Gwun̄ ya onenimin. Usen ge, inenisi ikpọ ogwu ute me uko, ere ọmọ melek ebi ikwaan̄ ekirọkọ inu me uko. 19 Me ere ya, gwun̄ ya onenikitaan̄ ukpo itumu inyi ogwu ute ibe, “Ibot n̄a-e! Ibot n̄a-e!”

Ogwu ute obebe ogwu ikwaan̄ kan̄ ge iben isa ijet ogwu uga. 20 Ogwu ikwaan̄ ya obeben gwun̄ ya isa ijet ogwu uga, ogwu uga obọbọkọ ikaan̄ me inyọn̄ ukot. Gwun̄ ya okukup ikeya me inyọn̄ ukot ogwu uga mege ire ikarek, mè ikwu. 21 Ogwu enenwaan̄ ya obeben nkwukwu gwun̄ ya inene ifo uwu inyọn̄ ya, mè iben imaan̄ me inyọn̄ mkpilaak ogwu ikwaan̄ Awaji ya, mè ichit afọn̄ ikwek, mè inan̄a isibi.

22 Ineniria ikwaan̄ ijet ogwu olom ibe, “Nye lek ria ogwu ikwaan̄ ge, mè inyinya akpan ge jet emi, inyi ǹgwat lek ǹlibi ǹsi lek ogwu ikwaan̄ Awaji ya, mè ǹgwu ǹkom ǹka.”

23 Ogwu olom ododo ibe, “Keke orọ obosi lek kan̄ chereyi? Ìkare usen ijọk Aya Onyan̄, ìkarere si Usen Mbuban.”

Ogwu nwa ofọfọọk ibe ke kpunu ufialek.

24 Ogwu enenwaan̄ ya obọbọp inu ikweek-irek me inyọn̄ inyinya akpan ya, mè itumu inyi ogwu ikwaan̄ kan̄ ya ibe, “Kpọkpọ kọp je! Kakiket ukot mije n̄a, îtata ǹtutumu inyi owu.” 25 Inenikọp mege inire ogoon̄ Kamen ere ogwu ikwaan̄ Awaji ya okupbe.

Mgbọ ogwu ikwaan̄ Awaji ya okupbe me ujọn̄ọ ere imun̄ ogwu enenwaan̄ ya, itutumu inyi Geyaji ogwu ikwaan̄ kan̄ ibe, “Kpọ! Ogwu enenwaan̄ Sunem ya ire ogwulọ òkinu! 26 Libi si kweek ogwu enenwaan̄ ya me oniin̄, mè do riọọn̄ mè ìre inu îjaan̄ me lek kan̄ mè ogwu olom, mè ogwu gwun̄ enerieen̄!”

Ogwu ikwaan̄ ya olilibi ire lek ogwu enenwaan̄ ya, mè ido. Ogwu enenwaan̄ ya ofọfọọk ibe ke kpunu ufialek.

27 Ogwu enenwaan̄ ya onenire lek ogwu ikwaan̄ Awaji me inyọn̄ ogoon̄ ya, mè igele igwook, mè itet ukot kè Ilaisia. Geyaji ojeje inu ibonibieen̄ ogwu enenwaan̄ ya isan̄a. Ire ogwu ikwaan̄ Awaji obebe ọmọ, “Juuk tele, ke ìkup me uga ufieejit! Ire, Okumugwem îlet emi inu ya me lek, ìkatumu inu geege ìnyi emi.”

28 Ogwu enenwaan̄ ya onenitumu inyi ogwu ikwaan̄ Awaji ibe, “Ogwu nte, ìre ndo owu gwun̄ enerieen̄? Ìre ǹkafat ìtumu ibe owu okarọ inu òborọ inyi ǹkaan̄ ikpọchieen̄ me ikike?”

29 Ilaisia otutumu inyi Geyaji ibe, “Mọnọ fanti tobo ofọnti inyọn̄ kwun̄ nye me ebon, mè mọnọ mkpat n̄a kaan̄ me ubọk, mè je. Ire ochichini ene me oniin̄, katọp amọn. Ogwu itọp owu amọn, kachieek. Osire uwu ya, sa mkpat n̄a toon̄ me isi gwun̄ enerieen̄ ya.”

30 Ire, nga gwun̄ ya obebe, “Kè lek ugwem Okumugwem, mè kè lek kwun̄, emi m̀kpatele owu ubọk me lek!” Eya orọ, Ilaisia onanan̄a ikeke, mè igọọk ogwu enenwaan̄ ya ije.

31 Geyaji oraraka ema, mè idasi isi ire, mè isa mkpat ya itoon̄ me isi gwun̄ enerieen̄ ya, ire, gwun̄ ya ìkasan̄a amọn, ìkasisik lek. Igwugwu ikom inu inikweek Ilaisia, mè ikpa inyi ibe ke gwun̄ enerieen̄ ya ìkabolo chieen̄.

32 Mgbọ Ilaisia orebe uwu ya, imumun̄ nkwukwu gwun̄ ya olaakbe me inyọn̄ mkpilaak kan̄. 33 Ilaisia oraraka inin̄ uwu ya, mè ichit isotu ikwek lek kan̄ melek gwun̄ ya me emen uwu, mè iriaak uriaak igwen Okumugwem. 34 Inenene inyọn̄ mkpilaak ya, mè ilaak inyana me inyọn̄ gwun̄ ya, mè itoon̄ otu kan̄ me otu gwun̄ ya, mè itoon̄ chieen̄ kan̄ me chieen̄ gwun̄ ya, mè itoon̄ ubọk kan̄ me ubọk gwun̄ ya. Ike înyanabe lek kan̄ me inyọn̄ gwun̄ ya, akpalek gwun̄ ya okekiyok. 35 Inanan̄a ikeke, mè ikije ikana me emen agwut ya, ije inyi isi, oje onyi udun̄, mè ikpọk isi inene inyọn̄ mkpilaak ya, mè ikpọk ilaak inyana me inyọn̄ gwun̄ ya. Gwun̄ ya osesen esen mgbọ jaaba, mè ichili chieen̄.

36 Ilaisia onenigwen Geyaji, mè iria ibe isi igwen ogwu enenwaan̄ Sunem ya ibe inu, Geyaji osisi igwen. Ogwu enenwaan̄ ya onunu, Ilaisia otutumu inyi ibe, “Ben gwun̄ kwun̄!” 37 Ogwu enenwaan̄ ya onunu, mè igele igwook me ukot kè Ilaisia, mè itọbọ ibot me ijọn̄, mè iben ogwu gwun̄ isa ije isibi.

38 Ilaisia onenigwu ikom isi Giligan. Me ike mgbọ ya akan̄ ọmọ òwa me agan̄ ya. Usini ebi otu ogbo ebi nriran enunu lek kè Ilaisia, Ilaisia onenitumu inyi ogwu ikwaan̄ kan̄ ibe, “Sa otin̄ ilile tem usun̄ nyi ebi otu ogbo ebi nriran chi.”

39 Ene ge me lek ebi nriran cha onenije inin̄ otu oron ibosi isan̄a sọn̄ inwan̄ usun̄, mè inimun̄ olik ogbokot oron me ere ya, mè inisan̄a ogbokot cha, mè ifan̄a otu utọn̄ ofọnti kan̄, mè itap ijot emen isa ika. Mgbọ îrebe uwu, isesek ogbokot cha itap me emen otin̄ usun̄ ya. Kpunu ogwu òrọriọọn̄ inu ogbokot ya orebe. 40 Enenichibi usun̄ ya iyiyik inyi ebi ife cha ibe erie. Ire, ogwu ichak usun̄ ya me otu, îra itaan̄ ukpo ibe, “Ogwu ikwaan̄ Awaji, mkpa ire eyi me emen otin̄ yi-o!” Ema kpekọt irie inorie ya.

41 Ilaisia obebe enyi ọmọ akpa ekọkọk, mè ibọkọ itọp igwook me emen otin̄ ya, mè inibe, “Ìchibi ìnyi ebi ene erie.” Ebi ife cha ererie. Kpunu inu geege me emen otin̄ ya òtatap ene unan me lek.

42 Usen ge, ogwu enerieen̄ ge ònan̄a me ama Baali-Salisa onenisa akọp owut fituru iba esabe adasi mfut akpa balì irọ ijet ogwu ikwaan̄ Awaji. Îsa si ayaya akpa igbaalek inu. Ilaisia otutumu inyi ogwu ikwaan̄ kan̄ ibe, “Sa nyi ebi ene erie!”

43 Ogwu ikwaan̄ kan̄ onenido ọmọ ibe, “Sọntiik inorie keyi ìbojeje iso efit ene?”

Ire, Ilaisia ofọfọọk ibe, “Sa nyi ema erie, mije, Okumugwem ìtumu ibe, ‘Ema mêrie, mè irie isik.’ ” 44 Ogwu ikwaan̄ kan̄ ya osasa fituru cha inyi ebi ife cha. Ema ererie ijot, usini osisik si, kubọk Okumugwem otumube.