2 Îkaan̄ mgbọ ge usini ebi akọn̄ Aram esibe enun̄unun̄, mè itet sọn̄ gwun̄ enenwaan̄ Ijeren ge isa ika. Gwun̄ ya onenikisi ikwaan̄ inyi nwa kè Nieman. 3 Usen ge, gwun̄ enenwaan̄ yi onenitumu inyi ogwu nga uwu kan̄ ibe, “Mebe ke nte uwu n̄a îsi isi imun̄ ogwu nriran òkup me Sameria, kè ogwu nriran ya ògwa inyakpa nte uwu n̄a òta!”

4 Nieman onenisa ikọ gwun̄ enenwaan̄ Ijeren ya otumube isi ikpa inyi ogwu nte uwu kan̄, ogwu ubọọn̄ Aram. 5 Ogwu ubọọn̄ Aram obebe ọmọ, “Bem lek, mè na si! Mâge ikpa inyi ogwu ubọọn̄ Ijeren.” Nieman obebem lek, mè inan̄a ije. Îsa akọp obop ikpoko alata okuket ita, mè obop ikpoko alata araran̄ gweregwen, mè akọp chieen̄ ofọnti ikaan̄ me ubọk isi ije ya. 6 Inenisa ikpa ya ijet ogwu ubọọn̄ Ijeren. Ege me ikpa ya ibe, “Ǹsa ikpa yi iria Nieman ogwu ikwaan̄ n̄a ijet owu, ibe owu ògwa orukan̄ inyakpa òkup ọmọ me lek.”

7 Mgbọ ogwu ubọọn̄ Ijeren ofukbe ikpa ya, isasa me unaan̄-ejit itaba ofọnti òkup ọmọ me lek igwak, mè ibe, “Ìre emi ìre Awaji ogwu òbokọt ikpan̄ ene, mè iyaka irọ inyi igat ugwem? Ogwu ubọọn̄ yi ìjeje iria ogwu inyakpa ijet emi ibe emi ǹgwa mọnọ? Ìfat ìkpọ-nu ike ogwu ubọọn̄ yi onikiweek emi ikọ me lek!”

8 Ilaisia ogwu ikwaan̄ Awaji oneninọ ibe ke ogwu ubọọn̄ Ijeren îgwak ofọnti me lek, mè iniria etip ijet ikido ibe: “Ìre keke orọ ogwakbe ofọnti kwun̄? Ria ene ya jet emi, inyi iriọọn̄ ibe ke ogwu nriran òwa me Ijeren.” 9 Nieman onenisa otutuuk inyinya kan̄, mè uji akọn̄ kan̄ inu inikeke me otu isotu uwu kè Ilaisia. 10 Ilaisia oraria ogwu osat ge ibe isi itumu inyi Nieman ibe, “Si rọn̄ gwọk lek kwun̄ mgbọ jaaba me okwaan̄ Jodan, ke akpalek kwun̄ môkpọk ikup ubọk îkupbe me adasi mgbọ, mbuban mônenita owu me lek.”

11 Nieman onanaan̄ ejit, mè ije inan̄a, mè ikibe, “Ǹkikeek ibe ke ìbokpọkpọ inan̄a isibi inikeke me isi n̄a, mè igwen erieen̄ Okumugwem Awaji kan̄, mè iwuwum ubọk kan̄ me ere inyakpa cha okupbe, otutuuk môtata. 12 Ìre mun̄ okwaan̄ Abana mè okwaan̄ Fapa òkup me Damasikọs ìkafat ìnwọn ìgak otutuuk mun̄ geelek òkup me Ijeren? Ìre kpamakọt isi irọn̄ me emen kiban̄ igwọk lek, mè lek n̄a òtana?” Isasa me unaan̄-ejit igwu ikom ikije ifo.

13 Ebi ikwaan̄ kan̄ esisi itumu inyi ọmọ ibe, “Ogwu nte uwu, mebe ke ogwu nriran ya ìbe owu òrọ ikpele inu ge, ìre owu kpomorọ ni? Ire ikeya, eyi îtumube ibe owu òsi ògwọk lek, inyi mbuban ita owu me lek, îgbe ibe owu òrọ ike îtumube.” 14 Mije keya, Nieman onenikwala isibi isi irọn̄ mgbọ jaaba me emen mun̄ okwaan̄ Jodan, ike ogwu ikwaan̄ Awaji ya otumube, akpalek kan̄ onenikup kubọk akpalek gwun̄ aya, mbuban otata ọmọ me lek.

15 Nieman onenigwu ikom inu me lek kè Ilaisia ogwu ikwaan̄ Awaji, ọmọ mè otutuuk ebi ikwaan̄ kan̄, mè inikeke me isi kan̄, mè itumu inyi ibe, “Mgbọ keyi ke nriọọn̄ ibe ke kpunu Awaji me otutuuk linyọn̄, ilọ me Ijeren gaalek. Soso, nye lek bọkọ sọntiik inyinyi keyi me ubọk ogwu usun̄ kwun̄.”

16 Ogwu nriran ya ofọfọọk ibe, “Kè lek ugwem Okumugwem ogwu nkisi ikwaan̄ inyi, m̀kpabọkọ inu geege.” Nieman orariaak igak ibe ibọkọ, ìkachieek ibọbọkọ.

17 Nieman onenitumu inyi Ilaisia ibe, “Ire owu òkpobọkọ, soso tele ibe enyi emi, ogwu usun̄ kwun̄, achiaan̄ ijọn̄ kinyi, eyi inyinya mgbidim ukot iba môkọtbe iben, inyi ǹsa m̀fo. Mije, emi ogwu usun̄ kwun̄, m̀kpayaka ikpọk ikigwa ngwugwa ewọwọp iriọk, mè ofifi chieen̄ ngwugwa geelek, inyi ebi kè ofifi awaji, ilọ me lek Okumugwem gaalek. 18 Gaalek kè Okumugwem itele ijo inu ge yi mege inyi emi: Ikaan̄ mgbọ nte uwu n̄a ogwu ubọọn̄ isije inin̄ uwu yọk Rimọn, òre awaji ebi Aram, ibosi itọbọ ebum, mè itet emi me ubọk me mgbọ îkitọbọ ebum, emi si ngọgọọk ọmọ igbaan̄ itọbọ ebum, soso, kè Okumugwem itele inu keyi inyi emi ogwu usun̄ kwun̄.”

19 Ilaisia onenibe ọmọ, “Fo me esuuk.”

Nieman onanan̄a ikije inin̄ oniin̄ ifo. Ijeje sọnja me oniin̄, 20 Geyaji gwun̄ uwu kè Ilaisia ogwu ikwaan̄ Awaji onenitumu inyi lek kan̄ ibe, “Nte uwu n̄a îfat itele ibe Nieman ogwu Aram yi ifo me ikike, ìkabọkọ inu geege me lek inu cha îsabe inu. Kè lek ugwem Okumugwem, m̀balilibi igọọk me oniin̄, mè isi ibọkọ sọntiik inu me ubọk kan̄.”

21 Geyaji onenilibi igọọk Nieman me oniin̄. Mgbọ Nieman oraan̄be chieen̄ me udun̄, mè imun̄ Geyaji okilibi inu me udun̄ kan̄, iyayaka ikeke, mè inan̄a me emen uji akọn̄ kan̄ isibi ijọn̄, mè ikije ikweek Geyaji, mè inido ibe, “Ìre otutuuk inu înwọn?”

22 Geyaji ofọfọọk ibe, “Otutuuk inu înwọn. Ire, nte uwu n̄a oria emi inu ibe emi ǹnentumu ǹnyi owu ibe ke ebi nriran iba ìnan̄a me otu ogbo ebi nriran ìkup me inyọn̄ ijọn̄ ogoon̄ ogoon̄ otoko kè Iferem mînu ichen me lek kan̄ mgbọ keyi mgbọ keyi. Eya orọ, mè owu òche obop ikpoko alata okuket ita mè chieen̄ ekwut mè ofọnti iba ònyi ọmọ, inyi ọmọ isa inyi ife cha.”

23 Nieman onenibe ọmọ, “Kpunu ufialek! Bọkọ obop ikpoko alata okuket gweregwen.” Itutumu ikọ inwene Geyaji ejit, Geyaji obọbọkọ. Enenitap obop ikpoko alata okuket gweregwen cha me emen akpa iba melek ofọnti iba cha me emen akpa iba, mè iria ebi ikwaan̄ kan̄ ene iba ibe eben esa eje me isi kè Geyaji. 24 Mgbọ ema ejebe inire inyọn̄ okpurukpu ere Ilaisia olukbe, Geyaji obọbọkọ akpa cha me ubọk ebi ikwaan̄ iba cha, mè iben itap me emen uwu, mè ibe ema efon, ema enanan̄a ifon. 25 Mgbọ îjebe isi lek kè Ilaisia ogwu ute-uwu, Ilaisia ododo ọmọ ibe, “Ònan̄a me ere owa, Geyaji?”

Geyaji ofọfọọk ibe, “Ogwu nte, ogwu usun̄ kwun̄ ìkasi ere geege.”

26 Ire Ilaisia obebe ọmọ, “Ìre òkariọọn̄ ibe ke ekwukwu n̄a òwa melek kwun̄ mgbọ ogwu enerieen̄ ya ogwube ikom inan̄a me emen uji akọn̄ kan̄ isibi inikweek owu? Ìre mgbọ keyi ore mgbọ ebebọkọ ikpoko mè ofọnti, melek uko olifu, mè uko gerep, mè arọọn̄ mè ebot, mè eriembuuk, mè ebi usun̄ ebirieen̄ mè ebibaan̄ ni? 27 Kpọ, orukan̄ inyakpa kè Nieman môkana itet owu, mè itet si ebi owot iman kwun̄ mege ire mgbọ geelek.” Sabum Geyaji oninan̄a me isi kè Ilaisia isibi, inyakpa îbaan̄ ichit ọmọ lek. Lek kan̄ okekitana kubọk abalara.