Mîrọ Jewu ogwu ubọọn̄ Ijeren
9
Ilaisia ogwu nriran onenigwen ene ge me lek ebi otu ogbo ebi nriran, mè itumu inyi ibe, “Mọnọ fanti tobo ofọnti inyọn̄ kwun̄ kam, mè ben ifu aran̄ keyi kaan̄ me ubọk sa si ama Ramot me agan̄ Giliadi. 2 Osire, week Jewu gwun̄ kè Jiosefat, gwun̄ gwun̄ kè Nimsi, mun̄. Sa ọmọ je nan̄a me etete ebi melek kan̄, sa si nin̄ agwut emen emen ge me ere ya. 3 Ben ifu ya, mè kana aran̄ ya gwook me ibot kan̄, mè tumu nyi ibe, ‘Okumugwem ìtumu ibe ikeyi: Ntọkọ owu aran̄ me ibot ibe owu òre ogwu ubọọn̄ Ijeren.’ Osirọ isan̄a, chili afọn̄, mè libi ekot ekot ka, kakiket ukot!”4 Gwun̄ enerieen̄ ogwu nriran ya onanan̄a ije isi Ramot me Giliadi. 5 Mgbọ îrebe, imumun̄ ebi ibot akọn̄ egbaan̄be isiki ikweek, mè initumu ibe, “Owu ogwu ibot akọn̄, nkaan̄ etip inyi owu.”
Jewu onenido ibe, “Ekene ene me etete kiji ke etip ya okup inyi?”
Ifọfọọk ibe, “Ìkup inyi owu, ogwu ibot akọn̄.”
6 Jewu onanan̄a ikeke, mè isa ọmọ ije inin̄ emen uwu. Ogwu nriran ya obeben aran̄ ya igwook ọmọ me ibot, mè itumu inyi ibe, “Okumugwem, Awaji ebi Ijeren ìtumu ibe ikeyi: ‘Ntọkọ owu aran̄ me ibot isa irọ owu ogwu ubọọn̄ ebi Ijeren, ebi eyi Okumugwem. 7 Kpan̄ ebi uwu kè Eyabu nte uwu kwun̄, inyi mâsa me ikeyi ikpe ọmọ useen̄ eje ebi ikwaan̄ n̄a ebi nriran, mè eje otutuuk ebi ikwaan̄ Okumugwem cha ebi Jeseben okpan̄be. 8 Otutuuk uwu kè Eyabu môjijaka isan̄a. Mâkpan̄ otutuuk ebirieen̄ uwu kè Eyabu geelek isan̄a ire òta me otutuuk Ijeren, mè ìre usun̄ mè ìre bọn owot. 9 Mâchep uwu kè Eyabu ike nchepbe uwu kè Jerobuwam gwun̄ kè Nebat, mè uwu kè Basa gwun̄ kè Ayija. 10 Ire me lek kè Jeseben, ebi kè ibo ebegwak ọmọ itaka me inyọn̄ okpọkọ ijọn̄ ya me Jesereli, kpebefufuun̄.’ ” Itutumu ikọ yi isan̄a, igwugwuku afọn̄, mè inan̄a isibi, mè isa ekot ekot ilibi inan̄a.
11 Jewu oneninan̄a isibi inu me lek ebi ibot akọn̄ ebi melek kan̄. Ene ge onenido ọmọ ibe, “Ke otutuuk inu inwọn wa? Ogwu iraak ya ìnu inirọ keke melek kwun̄?”
Jewu ofọfọọk ibe, “Ke mbe enyi mîriọọn̄ ogwu ogwu enerieen̄ ya orebe, mè iriọọn̄ si ojelek inu îkitumu!”
12 Ema ebebe, “Ataak! Tumu-nu nyi eji.”
Jewu onenibe, “Ìgban̄, inu îtumube inyi emi ìre ikeyi: ‘Okumugwem ìbe: Ntọkọ owu aran̄ me ibot ibe owu òre ogwu ubọọn̄ ebi Ijeren.’ ”
13 Mgbọ yaage, ema ewọwọọk ofọnti inyọn̄ kiban̄ iwele itoon̄ me ukpọk ijọn̄ me inyọn̄ otitop ere Jewu oboje inene, mè iniwut otita, mè itaan̄ ukpo itumu ibe, “Jewu ore ogwu ubọọn̄!”
Jewu îkpan̄ Joram mè Ayajaya
14 Jewu gwun̄ kè Jiosefat, gwun̄ gwun̄ kè Nimsi, onenito okpin inyi Joram. (Mgbọ ya ore mgbọ Joram mè otutuuk ebi akọn̄ Ijeren esibe isi itim akọn̄ me lek kè Ajayen ogwu ubọọn̄ Aram me Ramot me agan̄ Giliadi, inyi Ajayen ikabọkọ ama ya. 15 Me ike mgbọ ya ke Joram okup me Jesereli, inyi unan ebi Aram etapbe ọmọ me lek me akọn̄ îtimbe me lek kè Ajayen ogwu ubọọn̄ Aram ya ita.) Jewu onenitumu inyi ebi ibot akọn̄ ebi melek kan̄ cha ibe, “Ire ikeya ke îkup enyi me lek, ene geege me etete kinyi ikanween̄ lek ìnan̄a me ama yi ìben inu yi ìsi ìkpa me Jesereli.” 16 Jewu oneninin̄ uji akọn̄ kan̄ ikọp isi Jesereli, mije, Joram ìkup me ere ya ikisiki efuuk. Ayajaya ogwu ubọọn̄ Juda îsi Jesereli si ibosi ikpọ Joram ogwu unan osakbe me lek.
17 Ogwu mbem okekeke me inyọn̄ uwu-oket ama Jesereli ibene chieen̄ imun̄ Jewu okinu melek urum akọn̄ kan̄, mè inyi ulook ibe, “Mmun̄ urum akọn̄ ge okinu.”
Ogwu ubọọn̄ onyinyi ida ibe, “Ìria ogwu akọn̄ inyọn̄ inyinya ge ibe ilibi isi iweek iriọọn̄ mè ìre ekinu me esuuk.”
18 Ogwu akọn̄ inyọn̄ inyinya ya onenikọp isi ikweek Jewu, mè inibe ọmọ, “Ogwu ubọọn̄ ìbe ikeyi: Ìre òkinu me esuuk?”
Jewu ofọfọọk ọmọ ibe, “Owu òbosa esuuk irọ keke? Kana fo agan̄ udun̄ gọọk emi je.”
Ogwu mbem onenilook ogwu ubọọn̄ ibe, “Ogwu osat ya îre lek kiban̄, ire ìkayaka ìgwu ìkom.”
19 Ogwu ubọọn̄ oneniyaka iria ogwu akọn̄ inyọn̄ inyinya ogwu òso iba. Isisi ichichini Jewu, mè ido ibe, “Ogwu ubọọn̄ ìbe ikeyi: Ìre òkinu me esuuk?”
Jewu ofọfọọk ọmọ si ibe, “Owu òbosa esuuk irọ keke? Kana fo agan̄ udun̄ gọọk emi je.”
20 Ogwu mbem onenilook si ogwu ubọọn̄ ibe, “Ogwu osat ya îre lek kiban̄, ire ìkayaka ìgwu ìkom. Ubọk ikọp uji ene ya ìbet lek ubọk ikọp uji kè Jewu gwun̄ kè Nimsi, ìkikọp iraak iraak.”
21 Ogwu ubọọn̄ Joram onyinyi ida ibe enen̄e uji akọn̄ esun̄ enyi ọmọ. Enenen̄e isun̄ inyi mgbọ yaage. Joram ogwu ubọọn̄ Ijeren mè Ayajaya ogwu ubọọn̄ Juda eneninan̄a ibesi ichichini Jewu me oniin̄, ogwu ikup ìkọp me uji akọn̄ eyi kan̄. Ema esisi ichichini melek kan̄ me oke ijọn̄ eyi mgbọ òrere ijọn̄ uko gerep kè Nebọt ogwu Jesereli. 22 Joram imumun̄ Jewu, idodo ibe, “Ìre ònu me esuuk, Jewu?”
Jewu ofọfọọk ibe, “Esuuk ìbojeje ikup, me ere nga kwun̄ Jeseben otapbe uriaak mkpọmfaka melek ifit ibọk ijot otutuuk ere?”
23 Joram ogwugwu isi ikom, mè ilibi inan̄a, mè ikitaan̄ ukpo itumu inyi Ayajaya ibe, “Ayajaya! Ebi òkpaka! Ebi òkpaka!”
24 Jewu otataba ogbaan̄ kan̄ itọ itat me etete oguga iba kè Joram, mè isook, oraan̄ ya ogwọgwọt inin̄ ọmọ ejit, inanan̄a irọn̄ me emen uji akọn̄ kan̄, mè ikwu. 25 Jewu otutumu inyi Bidika ogwu ibot uji akọn̄ kan̄ ibe, “Ben nkwukwu kan̄ tọp to me inyọn̄ ijọn̄ uko kè Nebọt ogwu Jesereli. Ke okeek mgbọ emi melek kwun̄ ekigbaan̄ ikọp uji akọn̄ igọọk Eyabu ogwu ute me udun̄, ikọ nriran ya Okumugwem otumube ibak Eyabu mgbọ ya ire eyi òkirọ iso. 26 Okumugwem ìtumu mgbọ ya ibe, ‘Mmun̄ eje kè Nebọt mè eje ebi bọn ebirieen̄ me iyakwut. Îre si me inyọn̄ ijọn̄ kè Nebọt yi ke mbarọ inyi owu òkpe useen̄ eje cha. Emi Okumugwem ntumu.’ Eya orọ, ben nkwukwu kan̄ tọp to me inyọn̄ ijọn̄ ya, ike Okumugwem otumube.”
27 Mgbọ Ayajaya ogwu ubọọn̄ Juda omun̄be inu ya òrọrọ, ililibi inin̄ oniin̄ Bet Agan.a Jewu ogọgọọk, mè ikitaan̄ ukpo itumu inyi ebi melek kan̄ ibe, “Ìkpan̄ ọmọ si!” Esosook ọmọ itap unan me lek me emen uji akọn̄ kan̄ mgbọ îkinene ifo Guru òkup me agba lek Ibelam. Ibeben unan ya me lek ilibi isi Megido, mè ikup me ere ya ikwu. 28 Ebi ibot ikwaan̄ kan̄ ebeben nkwukwu kan̄ me emen uji akọn̄ kan̄ isa ifo Jeruselem, mè isi ifuun̄ ọmọ me emen udọn̄-ufuun̄ kan̄ igba ebi nte nte kan̄ me ama kè Debit. 29 (Ayajaya ìkana ogwu ubọọn̄ Juda me òso akọp mè acha ge me lek mkpulu kè Joram gwun̄ kè Eyabu me Ijeren.)
Mîkpan̄ Jeseben
30 Jewu onenisi ire Jesereli. Mgbọ Jeseben onọbe ibe ke Jewu înu, ineniken tori me chieen̄, mè inen̄e ijeek ibot kan̄ isun̄ ijaan̄, mè initap chieen̄ me otu nruruk ge ikikpọ oyet. 31 Jewu irere otunchit uwu ogwu ubọọn̄, Jeseben otataan̄ ukpo itumu inyi ibe, “Ke ònu me esuuk-wa? Owu Jimiri keyi, òkpan̄ ogwu ute-uwu!”b
32 Jewu onenibene chieen̄ ikpọ otu nruruk ya, mè ikido ibe, “Ìre ekene okeke inyi emi? Ìre ekene ene?” Ebi ibot ikwaan̄ iba mè ìre ita ebi esan̄abe òsok etatap isi me otu nruruk ya ikikpọ Jewu me ijọn̄. 33 Jewu onyinyi ida ibe, “Ìtọp ogwu enenwaan̄ ya ìto me ijọn̄!” Ebeben Jeseben itọp ito me ijọn̄, eje kan̄ onyanyan igwook me lek mgban uwu ya, mè inyan si ire lek ebi kè inyinya òkitaba uji akọn̄ kè Jewu, inyinya cha ejajak nkwukwu kan̄ me ukot.
34 Jewu oraraka inin̄ emen uwu ogwu ubọọn̄, mè irie inorie, mè inwọ miin̄, mè ininyi ida ibe, “Ìben nkwukwu ogwu enenwaan̄ echobe ataak inyi ya ìsi ìfuun̄, mije, ọmọ ìre gwun̄ enenwaan̄ ogwu ubọọn̄.” 35 Ire, mgbọ esibe ibesi iben nkwukwu kan̄ ifuun̄, kpemun̄ nkwukwu kan̄, ilọ me lek ngigọ ibot, mè ukot iba mè akajit ubọk iba kan̄ gaalek. 36 Enenisi ikpa inu ya inyi Jewu. Jewu ofọfọọk ibe, “Inu yi ìre ikọ Okumugwem otumube inan̄a me otu ogwu ikwaan̄ kan̄, Ilaija ogwu Tisibe ibe, ‘Îre me inyọn̄ okpọkọ ijọn̄ ya me Jesereli ke ebi kè ibo ebegwak anam kè Jeseben itaka.’ 37 Ebegwagwak nkwukwu kè Jeseben iyiyala ikana inyọn̄ okpọkọ ijọn̄ ya me Jesereli kubọk ifin anam, ire lek, kpebekọt itumu ibe, ‘Kpọ Jeseben ire ogwu.’ ”