Jewu îkpan̄ owot iman kè Eyabu isan̄a
10
Me ike mgbọ ya, Eyabu îkaan̄ akọp bọn ebirieen̄ jaaba me Sameria. Jewu onenige ikpa iria ijet me Sameria, inyi ebi ibot ama Jesereli, mè ebi ugane ama, mè ebi ìkikpọ chieen̄ me lek bọn kè Eyabu. Inu îgebe me ikpa ya ìre ikeyi: 2 “Enyi ebi ìkikpọ chieen̄ me lek bọn owot iman ogwu ubọọn̄, otutuuk uji akọn̄, mè inyinya, mè ama mgban akọn̄, mè otutuuk nroon̄ akọn̄ ìkup enyi me ubọk. Ikpa yi isirere enyi ubọk, 3 ìkpọ me etete bọn ebirieen̄ kè Eyabu ogwu ubọọn̄, mè ìmọnọ ene ge ògbegbe isa irọ ubọọn̄ me irek ogwu ute, mè ìbem lek ititim akọn̄ ibot owot iman kè Eyabu nte uwu kinyi.”4 Mgbọ ife cha ebọkọbe ikpa cha, ukpook otetet ema enenen, ema ekekitumu ibe, “Ire otuuk kè ebi ubọọn̄ iba kpekọt ikeke ida ọmọ, ìre eji ebejeje ikọt ikeke ida?”
5 Ogwu ibot uwu ogwu ubọọn̄, mè ogwu ibot mkpulu ama, mè ebi ugane ama, mè ebi ìkikpọ chieen̄ me lek bọn kè Eyabu eneniria etip ijet Jewu ibe, “Eji otutuuk ene ìre ebi usun̄ kwun̄. Eji kpebeto ubọọn̄ geege. Ikaan̄ inu ònwọnwọn me chieen̄ kwun̄, rọ.”
6 Jewu onenige òso ikpa iba ijet ema ibe, “Ire enyi ikeke inyi emi, mè ibem lek igbagban̄ ida ikọ n̄a, ìsa ibot bọn ebirieen̄ ebi owot iman nte uwu kinyi ìkaan̄ me ubọk ìna ìnimun̄ emi me Jesereli me ike mgbọ keyi me iyakwut.”
Akọp bọn ebirieen̄ jaaba kè Eyabu ogwu ubọọn̄ cha ekup me ubọk ebi isi ene me ama Sameria, îre ebiba ekikpukpo ema. 7 Mgbọ ikpa ya orebe ife chi ubọk, ema etetet akọp bọn ebirieen̄ jaaba ogwu ubọọn̄ ikpan̄, mè ikpulu ibot kiban̄ itaak me emen okwun isa iria ijet Jewu me Jesereli. 8 Ogwu osat onenisa etip inilook Jewu ibe ke mîsa ibot bọn ogwu ubọọn̄ cha inu.
Jewu onyinyi ida ibe ekpulu etitiin̄ me èdọ iba me agba lek otunchit ama mege ire ewelegwe.
9 Me ewelegwe ofit iwele kan̄, Jewu onanan̄a isibi, mè ikeke me isi otutuuk ebi ene, mè itumu inyi ema ibe, “Ubọk kinyi îtana. Îre emi nto okpin inyi nte uwu n̄a, mè ikpan̄ si ọmọ. Ire, ndo enyi nu, ìre ekene okpan̄ ebibi? 10 Me atikọ, ìriọọn̄ ibe ke otutuuk ikọ Okumugwem otumube ibak owot iman kè Eyabu ìborọrọ iso, ke geege ìkpolọ. Okumugwem îra irọ inu îtumube inan̄a me otu kè Ilaija ogwu ikwaan̄ kan̄ iso.” 11 Jewu onenikpan̄ otutuuk ebi owot iman kè Eyabu ìsisik me Jesereli, mè ikpan̄ si otutuuk ebi ibot ikwaan̄ kan̄, mè ebi unene kan̄, mè ebi ngwugwa kan̄. Ìkatele ibe ene geege isik me ugwem me erieen̄ kè Eyabu.
Jewu îkpan̄ owot iman kè Ayajaya
12 Jewu onanan̄a me Jesereli ikije isi Sameria. Mgbọ îjebe ire Bet Ekedi ere ebi òkpukpo arọọn̄ ekinititiin̄, 13 imumun̄ usini ebi owot iman kè Ayajaya ogwu ubọọn̄ Juda, mè ido ema ibe, “Enyi ìre ebi owa?”
Ife cha efọfọọk ibe, “Eji ìre ebi owot iman kè Ayajaya ogwu ubọọn̄, eji enu ibenitọp bọn ebirieen̄ ogwu ubọọn̄ mè ebi owot iman nga ogwu ubọọn̄ amọn.”
14 Jewu onyinyi ebi ikwaan̄ kan̄ ida ibe etet ife cha me agam. Etetet ema, akọp ebirieen̄ ini mè iba, mè isa ema isi ikpan̄ me agba lek udọn̄ mun̄ Bet Ekedi. Kpetele ene geege me ugwem.
Mîkpan̄ otutuuk ebi owot iman kè Eyabu ìsisik
15 Jewu oneninan̄a me ere ya ikije, mè inichichini Jeyonadabu gwun̄ kè Rekabu me oniin̄. Jeyonadabu ìbonunu me lek kè Jewu. Jewu otọtọp ọmọ amọn, mè inido ibe, “Ìre ejit kwun̄ îje ìkike melek n̄a kubọk ejit n̄a ojebe melek kwun̄?”
Jeyonadabu ofọfọọk ọmọ ibe, “Iin̄!”
Jewu obebe, “Ire ikeya, nyi emi ubọk.” Jeyonadabu onyanyana ubọk inyi Jewu, Jewu otataba ọmọ itap me emen uji akọn̄ kan̄. 16 Jewu otutumu inyi Jeyonadabu ibe, “Na, na gọọk emi je, inyi owu òmun̄ ulọk nkaan̄be me lek Okumugwem.” Jeyonadabu onenigọọk Jewu igbaan̄ ikọp me emen uji akọn̄ kè Jewu isi Sameria.
17 Mgbọ ema erebe Sameria, Jewu okpakpan̄ otutuuk ebi owot iman kè Eyabu ìsisik me ere ya, mè isa me ikeya ichep otutuuk uwu kè Eyabu isan̄a, ike Okumugwem otumube inan̄a me otu kè Ilaija.
Jewu îkpan̄ ebi ikwaan̄ Baali
18 Jewu onenititiin̄ ama, mè initumu inyi ema ibe, “Eyabu ìriaak Baali sọntiik, ire, Jewu ìborariaak Baali igak ikeya. 19 Mgbọ keyi, ìgwen otutuuk ebi nriran Baali, mè ebi ìkiban Baali, mè otutuuk ebi ngwugwa Baali ìnititiin̄ me ere keyi, ene geege ikalọ inunu, mije, îre uga ngwugwa ke mbagwa inyi Baali. Ogwu ilọ inunu, ebekpakpan̄.” Ire Jewu ìkiweek ileleke ebi ikwaan̄ Baali inititiin̄, mè ikpan̄ ema isan̄a.
20 Jewu onyinyi ida ibe, “Ìgwen ntitiin̄ òkup mbuban ìnyi Baali.” Ema egwegwen. 21 Jewu oraria etip ikana otutuuk Ijeren igwen otutuuk ebi ìkiban Baali, ema otutuuk enunu iso, ene geege ìkasik. Ema eninin̄ ijot uwu Baali dum dum, ibene me ibot agan̄ ge isi ichak me agan̄ keyilọ. 22 Jewu onenitumu inyi ogwu òkikpọ chieen̄ me lek ere isun̄ ofọnti ibe, “Si kpulu ofọnti ikwaan̄ sibi nyi otutuuk ebi ìkiban Baali.” Ene ya osasan̄a ofọnti ikwaan̄ isibi inyi ema.
23 Jewu mè Jeyonadabu gwun̄ kè Rekabu eneninin̄ emen uwu Baali ya. Jewu onenitumu inyi ebi ìkiban Baali ibe, “Ìgwuun̄ chieen̄ ìkpọ ìkana emen uwu yi, mè ìmun̄ ibe ke ogwu ikwaan̄ Okumugwem geege ìkakup me etete kinyi, ìmun̄ ibe ke îre ebi ìkiban Baali gaalek ekup.” 24 Ife cha eninin̄ ijot emen uwu ya, mè ikigwa ngwugwa ewọwọp iriọk melek owuwa ofifi chieen̄ ngwugwa inyi Baali. Sabum mgbọ yi, Jewu îto akọp ebirieen̄ jeeta ikana me oyet, mè itumu inyi ema ibe, “Ìkpakpan̄ otutuuk ife chi ìsan̄a. Ogwu itele mè ene ge me lek kiban̄ inwọnọ, ugwem ene ya môgọọk me useen̄!”
25 Mgbọ Jewu ogwabe ngwugwa ewọwọp iriọk ya isan̄a, inenisi inyi ebi mbem mè ebi ibot ikwaan̄ ebi îtobe me oyet cha ida ibe: “Ìnin̄ ìsi ìkpan̄ ife cha, ikachieek ibe ene geege inwọnọ.” Ema esasa oge akọn̄ inin̄ isi ikpan̄ ife cha igwook, mè ikpulu nkwukwu kiban̄ itọọn̄ isibi, mè iraka inin̄ agwut emen emen isi yọk uwu Baali ya. 26 Ema eneniben ewuuk mbuban cha me uwu Baali isibi ito me oyet, mè itap ukan̄ iwọp. 27 Ema mîjijaka ewuuk mbuban kè Baali, mè igbugbọ uwu Baali igwook. Ebi ene eyaka inisa ere ya irọ ere ine ifin, mege inire chereyi.
28 Ikeyi ke Jewu osa ijijaka Baali isan̄a me Ijeren, kpeyaka ikitọbọ ebum inyi. 29 Ire, Jewu ìkasan̄a lek ìsan̄a me lek ijo inu cha Jerobuwam gwun̄ kè Nebat orọbe, eyi îrọbe inyi ebi Ijeren erọ ijo inu, mije ema egọọkbe isi itọbọ ebum inyi mkpọmfaka eriembuuk alata araran̄ cha me Beten mè Dan.
30 Okumugwem onenitumu inyi Jewu ibe, “Eyi owu orọbe inu òtatat me chieen̄ n̄a, mè irọ owot iman kè Eyabu inu mbenbe me ejit ibak ema, owu orọ ijaan̄. Eya orọ, ebi owot iman kwun̄ ebekikweek me inyọn̄ ogboon̄ ubọọn̄ Ijeren ikikpulu mege isi ire òso ukot ini.” 31 Ire, Jewu ìkagbala chieen̄ ìgọọk Ikan Okumugwem, Awaji ebi Ijeren me otutuuk ejit kan̄, ìkatetele ijo inu cha Jerobuwam gwun̄ kè Nebat orọbe, eyi îrọbe inyi ebi Ijeren erọ ijo inu.
32 Me ike mgbọ ya, Okumugwem onenibene ikikpọkọ oke ijọn̄ ebi Ijeren ifele. Ajayen onenitim akọn̄ ikpan̄ ebi Ijeren, me owuwa agan̄, 33 bene me agan̄ mbum-ura okwaan̄ Jodan, mè otutuuk ijọn̄ Giliadi (agan̄ ebi otoko kè Gadi, mè Ruben, mè Manasi), ibene me Aroweri me iteke ijọn̄ okwaan̄ Anọn isi igwook me Giliadi mè Basan.
34 Otutuuk ofifi inu òrọrọ me ukot mkpulu kè Jewu, mè otutuuk unye ikwaan̄ îrọbe, mè inu îrọbe, mîge otutuuk itap me emen ikpa mfufuk echi ebi ubọọn̄ Ijeren.