Jeyowayaji îkana ogwu ubọọn̄ Ijeren
13
Me òso akọp acha iba mè ita me lek mkpulu kè Jowas gwun̄ kè Ayajaya ogwu ubọọn̄ Juda, Jeyowayaji gwun̄ kè Jewu onenikana ogwu ubọọn̄ Ijeren me Sameria, mè ikpulu Ijeren akọp mè acha jaaba. 2 Jeyowayaji orọrọ ijo inu me chieen̄ Okumugwem, mije, ìkpọkpọ itet lek inye ikirọ ijo inu cha Jerobuwam gwun̄ kè Nebat orọbe, eyi îrọbe inyi ebi Ijeren erọ ijo inu. Ìkagwu ìkom ìtele ijo inu cha. 3 Okumugwem onanaan̄ ejit enenen inyi ebi Ijeren, mè ikpọkpọ ikikana ema itap me irak mkpulu kè Ajayen ogwu ubọọn̄ Aram, mè Ben-Adadi ogwu gwun̄ owuwa mgbọ.4 Jeyowayaji oneniriaak uriaak ikiweek ntap-ubọk Okumugwem. Okumugwem onọnọ ọmọ ida, mije îmun̄be tukutuku ogwu ubọọn̄ Aram okitutuku ebi Ijeren. 5 Okumugwem onenisan̄a ogwu unyan̄a ge isibi inyi ebi Ijeren, ogwu ònisan̄a ebi Ijeren isibi me irak ubọk ebi Aram. Ebi Ijeren enenikpọk ikiluk me uwu ọfọ kiban̄ kubọk adasi mgbọ. 6 Ire, ema kpesan̄a lek kiban̄ me lek ijo inu ebi uwu kè Jerobuwam, eyi Jerobuwam orọbe inyi ebi Ijeren erọ ijo inu. Ema ekpọkpọ ikirọ ijo inu cha. Uti yọk Asera ya egwuun̄be me Sameria ọmọ òwa okekebe.
7 Me atikọ, ogwu ubọọn̄ Aram îkpan̄ otutuuk ebi akọn̄ kè Jeyowayaji isan̄a, iyayaka inisik akọp ene go gaalek ebi ìkikọp inyinya, mè akọp uji akọn̄, mè akọp obop ebi akọn̄ ukot ukot.
8 Otutuuk ofifi inu òrọrọ me ukot mkpulu kè Jeyowayaji, mè otutuuk inu îrọbe, melek akọn̄ echi îtimbe, mîge otutuuk itap me emen ikpa mfufuk echi ebi ubọọn̄ Ijeren. 9 Jeyowayaji onenikwu ifo igọọk ebi nte nte kan̄, ebeben ifuun̄ me Sameria. Jeyowas ogwu gwun̄ onenikana ubọọn̄ me irek kan̄.
Jeyowas îkana ogwu ubọọn̄ Ijeren
10 Me òso akọp acha ita mè jaaba me lek mkpulu kè Jowas ogwu ubọọn̄ Juda, Jeyowas gwun̄ kè Jeyowayaji onenikana ogwu ubọọn̄ Ijeren me Sameria, mè ikpulu Ijeren acha gweregwen. 11 Jeyowas orọrọ ijo inu me chieen̄ Okumugwem. Ìkatele ijo ugwem yaage Jerobuwam gwun̄ kè Nebat orọbe, eyi îrọbe inyi ebi Ijeren erọ ijo inu. Ìkpọkpọ itet lek inye ikirọ ijo ugwem ya inyi isi.
12 Otutuuk ofifi inu òrọrọ me ukot mkpulu kè Jeyowas, mè otutuuk inu îrọbe, mè ikwaan̄ unye îsibe, melek akọn̄ îtimbe me lek kè Amajiya ogwu ubọọn̄ Juda, mîge otutuuk itap me emen ikpa mfufuk echi ebi ubọọn̄ Ijeren. 13 Jeyowas onenikwu ifo igọọk ebi nte nte kan̄, ebeben ifuun̄ me Sameria me ere ekifuun̄ ebi ubọọn̄ Ijeren. Jerobuwam ogwu gwun̄ onenikana ogwu ubọọn̄ me irek kan̄.
Òta nriran Ilaisia obenbe
14 Sabum mgbọ yi, îkaan̄ mgbọ ge, mgbọ Ilaisia okupbe me ijọn̄ orukan̄ eyi îfiakbe ikwu, Jeyowas ogwu ubọọn̄ Ijeren onenisi ikpọ Ilaisia me ijọn̄ orukan̄ ya, mè ikito ito mije kan̄ ibe, “Nte n̄a! Nte n̄a! Jei, uji akọn̄ ebi Ijeren mè ebi ìkikọkọp!”
15 Ilaisia onenitumu inyi ọmọ ibe, “Sa ogbaan̄ ge melek owuwa oraan̄ na-nu.” Isasa inu. 16 Ilaisia onenitumu inyi ogwu ubọọn̄ Ijeren ibe, “Mọnọ ogbaan̄ ya tet kaan̄ me ubọk.” Ogwu ubọọn̄ omọmọnọ ogbaan̄ ya itet ikaan̄. Ilaisia onenisa ubọk kan̄ itoon̄ me inyọn̄ ubọk ogwu ubọọn̄.
17 Inenitumu ibe, “Gwuku otu nruruk agan̄ mbum-ura.” Ogwu ubọọn̄ ogwugwuku. Itutumu inyi ibe, “Sook!” Ogwu ubọọn̄ ososook. Ilaisia otutumu ibe, “Oraan̄ ntim-mkpan̄ Okumugwem ire eya! Oraan̄ ntim-mkpan̄ eyi enyi ebetim ikpan̄ ebi Aram ire eya! Enyi ebejijijaka ema isan̄a kpai me Afek.”
18 Ilaisia onenitumu inyi ogwu ubọọn̄ ibe, “Kpulu oraan̄ cha kaan̄.” Ogwu ubọọn̄ oteteen̄ oraan̄ cha ikaan̄. Ilaisia otutumu inyi ogwu ubọọn̄ ibe, “Sa oraan̄ cha sulu me ijọn̄.” Isasa isulu me ijọn̄ mgbọ ita, mè itet ikaan̄. 19 Ilaisia ogwu ikwaan̄ Awaji onanaan̄ ejit inyi, mè ibe ọmọ, “Mebe ke owu osulu ijọn̄ ya iso mgbọ go mè ìre mgbọ gweregwen, kè enyi etim ekpan̄ ebi Aram, mè ejijaka ema èsan̄a kpai. Ire, mgbọ keyi, mgbọ ita gaalek ke enyi ebetim ikpan̄ ebi Aram.”
20 Ilaisia onenikwu, efufuun̄.
Me ukot mgbọ ya, urum ebi inọ afa Mowabu mîkinu ido Ijeren me ibebene acha geelek. 21 Usen ge ebi Ijeren ebenbe nkwukwu ene kiban̄ ge ibesa isi ifuun̄, ema emumun̄ usini urum ebi inọ afa ekanabe isibi. Me ufieek-owot, ema ebeben nkwukwu ene ya itọp itap me emen udọn̄ ere efuun̄be Ilaisia. Nkwukwu ene ya osisi ichak me lek ukwuuk kè Ilaisia, ogwu ene ya ojojomo, mè inan̄a ikeke ikeke me ukot iba kan̄.
22 Ajayen ogwu ubọọn̄ Aram îtutuku ebi Ijeren me otutuuk ukot mkpulu kè Jeyowayaji. 23 Ire, Okumugwem onenirọ ebi Ijeren nsan, mè ikaan̄ ata ejit me lek kiban̄, mè initap ubọk inyi ema mije inyan̄a-ibot înyan̄abe inyi Ebereyam, mè Ajiki mè Jekọp. Mege inire cherekeyi, ìkaweek ibe ejijaka ema esan̄a, ìkarerieen̄ si ema ìsan̄a me isi kan̄.
24 Ajayen ogwu ubọọn̄ Aram onenikwu, Ben-Adadi ogwu gwun̄ onenikana ubọọn̄ me irek kan̄. 25 Jeyowas gwun̄ kè Jeyowayaji okpọkpọk ibọkọ Ben-Adadi gwun̄ kè Ajayen ama kiban̄ cha echi Ben-Adadi otimbe akọn̄ ibọkọ me ubọk ogwu ute Jeyowayaji. Jeyowas ìtim ikpan̄ Ben-Adadi mgbọ ita, mè isa me ikeya ibọkọ otutuuk ama ebi Ijeren cha.