4 Jowas onenitumu inyi ebi ngwugwa ibe, “Ìbọkọ ikpoko geelek esabe inu me Uwu Mbuban Okumugwem kubọk inyinyi òkup mbuban, mè otitip etipbe me ene me ene, mè echi ebi ene esabe irọ inyan̄a-ibot iso, mè ikpoko geelek esabe inu me Uwu Mbuban me ata ejit. 5 Ogwu ngwugwa geelek ibọkọ ikpoko me ubọk ebi ìkisa inyinyi kiban̄ ijet ọmọ. Ikpoko cha geelek ebọkọbe, esa eneen̄ inu geelek òfafiat me Uwu Mbuban.”

6 Ire, mege ogwu ubọọn̄ Jowas okpulube iso akọp acha iba mè ita, ebi ngwugwa kpeneen̄ inu òfafiat me lek Uwu Mbuban. 7 Ogwu ubọọn̄ Jowas onenigwen Jeyoyada ogwu ngwugwa melek ebi ngwugwa kechilọ, mè inido ema ibe, “Keke orọ enyi kpeneen̄ ere òfafiat me lek Uwu Mbuban? Bene me mgbọ keyi, ikayaka ìbọkọ ikpoko me ubọk ebi ìkisa inyinyi kiban̄ ijet enyi ìsa ìkirọ ufialek akpalek kinyi ofifi. Ikpoko geelek enyi ebọkọbe, ìnyi mè esa esi ikwaan̄ me lek Uwu Mbuban.” 8 Ebi ngwugwa echechieek ibe ke ema kpebeyaka ibọkọ ikpoko me ubọk ebi ene, ke ema si kpebesa ubọk kiban̄ irọ ikwaan̄ me lek Uwu Mbuban.

9 Jeyoyada ogwu ngwugwa onenimọnọ okop ge, mè itibi udọn̄ me inyọn̄, mè iben iniyik me agba lek ntook, me agan̄ ulom, me ere ekiraka inin̄ emen Uwu Mbuban Okumugwem. Otutuuk ikpoko geelek ebi ene esabe inu me Uwu Mbuban Okumugwem, ebi ngwugwa ìkibem otunchit mîra ikibọkọ itap me emen okop ya. 10 Ema isimun̄ ibe ke ikpoko òkup me emen okop ya îra iwa, ogwu uti ikpa ogwu ubọọn̄ mè ogwu òban Awaji mîra inu inifuk otu ifuk ikpoko cha enyibe me Uwu Mbuban Okumugwem, mè ititiin̄ isun̄. 11 Otu ifuk ikpoko geelek etumube ifieek, mîra initọ inyi ebi ìkikpọ chieen̄ me lek ikwaan̄ Uwu Mbuban Okumugwem ya, ebiba mîra inisa inyi ebi usọ ikwaan̄ uti, mè ebi ìnama uwu ìkisi ikwaan̄ me lek Uwu Mbuban Okumugwem, 12 mè ebi ìkinama mgban, mè ebi ìkibak ewuuk. Mîsa si usini me lek ikpoko cha ilep uti, mè ewuuk ebabala, echi mêsabe ikpọk inama ere òfafiat me lek Uwu Mbuban Okumugwem.

13 Kpesa ikpoko ebi ene esabe inu irọ okwa alata okuket, mè sisini ekisa ikpaan̄ ekwut mkpukan̄, mè okwa inyan eje, mè ebi kè otita, mè ìyaka ire ebi kè nroon̄ ikwaan̄ Uwu Mbuban Okumugwem echi alata araran̄ mè echi alata okuket. 14 Ekpekpe ikpoko cha inyi ebi ikwaan̄, inyi ema esa erọ ikwaan̄ me ere òfafiat me lek Uwu Mbuban. 15 Ìkakup me uyọt ibe ekegwen ebi ibot ikwaan̄ ebi ekinyi ikpoko ibe esa ekpe ebi ikwaan̄ ibe enerọ ifuk, mije, ema ìre ebi ìgbegbe utoon̄-ejit me inu geelek ema ekirọ. 16 Ikpoko ngwugwa awọ mè ikpoko ngwugwa ijo inu, kpekisa inu me Uwu Mbuban Okumugwem, eya ìkup inyi ebi ngwugwa.

17 Me ike mgbọ ya, Ajayen ogwu ubọọn̄ Aram ojijibi akọn̄ initim me Gat, mè ibọkọ ama ya, mè inikana isi ida Jeruselem ibosi itim akọn̄ si me lek. 18 Mgbọ Jowas ogwu ubọọn̄ Juda onọbe, itititiin̄ otutuuk inu mbuban echi ebi nte nte kan̄ Jiosefat, mè Jeyoram, mè Ayajaya, ebi ubọọn̄ ìdadasi ikpulu Juda efakabe itap me ubọk Awaji, mè echi ọmọ me lek kan̄ ofakabe itap me ubọk Awaji, mè ichiaan̄ si otutuuk alata araran̄ òkup me ere isun̄-inu me Uwu Mbuban Okumugwem, mè echi òkup me uwu ogwu ubọọn̄ igbaalek, mè iria otutuuk ijet Ajayen ogwu ubọọn̄ Aram. Ajayen obọbọkọ, mè inan̄a itele Jeruselem.

19 Otutuuk ofifi inu òrọrọ me ukot mkpulu kè Jowas, mè otutuuk inu îrọbe, mîge otutuuk itap me emen ikpa mfufuk echi ebi ubọọn̄ Juda. 20 Ebi ibot ikwaan̄ kan̄ enenitọt otitọt mkpa ikeme ọmọ, mè ikpan̄ ọmọ me Bet Milo, me oniin̄ òkikwala isibi isi Sila. 21 Erieen̄ ebi ibot ikwaan̄ kan̄ ebi ìkpakpan̄ ọmọ ìre Josabadi gwun̄ kè Simeyat, mè Jeyosabadi gwun̄ kè Someri. Mgbọ îkwube, ebeben isi ifuun̄ me ere efuun̄be ebi nte nte kan̄ me ama kè Debit. Amajiya ogwu gwun̄ onenikana ubọọn̄ me irek kan̄.