4 Ike mgbọ okije, Jowas onenitumu ifieek ibe ke ọmọ mônikpọk inama ere ògbugbugbọ me lek Uwu Mbuban Okumugwem. 5 Inenititiin̄ ebi ngwugwa mè ebi otoko kè Libai, mè ininyi ema ida ibe, “Ìje ìkana otutuuk ama Juda mgbọ keyi, mè ìbọkọ ikpoko otutuuk ebi Ijeren ekikpe me acha me acha, ìsa ìnikpọk ìnama ere ògbugbugbọ me lek Uwu Mbuban Awaji kinyi. Ìgwagwat lek ìrọ.” Ire, ebi otoko kè Libai kpegwat lek isi ikwaan̄ ya mgbọ yaage.

6 Ogwu ubọọn̄ onenigwen Jeyoyada ogwu ibot ebi ngwugwa ido ibe, “Ìre keke orọ owu òkanyi ebi otoko kè Libai ida ibe ebọkọ ebi Juda mè ebi Jeruselem otitip ido ya eyi Mosis ogwu ikwaan̄ Okumugwem mè otutuuk ebi ido Ijeren enyibe ida ibe ekebọkọ ekesa erọ ikwaan̄ me lek Atanga Inyan̄a-ibot?”

7 Ebi ìkigọọk Atalia, ijo enenwaan̄ ya, mîbum inin̄ emen Uwu Mbuban Awaji, mè ikpulu nroon̄ ikwaan̄ Uwu Mbuban Okumugwem cha òkup mbuban isa ikisi ikwaan̄ inyi Baali.

8 Ogwu ubọọn̄ oneninyi ida, enenigon okop ge, mè iben iyik me oyet me agba lek otunchit Uwu Mbuban Okumugwem. 9 Enenilook ikana ido Juda mè ama Jeruselem ibe otutuuk ene esa otitip ya, eyi Mosis ogwu ikwaan̄ Awaji onyibe ida me emen èwê ibe otutuuk ebi Ijeren ekekpe, enu enenyi Okumugwem. 10 Otutuuk ebi ibot mkpulu mè otutuuk ebi ido ebebele ejit, mè ikisa otitip kiban̄ initap me emen okop ya mege okop ya ojojot. 11 Ebi otoko kè Libai isisa okop ya ijet ebi ibot ikwaan̄ ogwu ubọọn̄, mè ema isimun̄ ibe ke ikpoko òkup me emen îwa, ogwu uti ikpa ogwu ubọọn̄ melek ogwu ikwaan̄ ogwu ibot ngwugwa mîra inigwook ikpoko cha isan̄a, mè iyaka isa okop ya inyi ibe esa esi eyik me irek kan̄. Ikeyi ke erọ me usen me usen, mè isa ikaan̄ ikpoko òwawa enenen. 12 Ogwu ubọọn̄ mè Jeyoyada enenisa ikpoko cha inyi ebi ìkirọ ikwaan̄ geelek eberọ me lek Uwu Mbuban Okumugwem. Enenikpe ebi usọ ikwaan̄ inama uwu, mè ebi usọ ikwaan̄ uti, mè ebi usọ ikwaan̄ okwukwut, mè ebi usọ ikwaan̄ ekwe, ibe enekpọk enama ere ògbugbugbọ me lek Uwu Mbuban Okumugwem.

13 Ebi ìkikpọ chieen̄ me lek ikwaan̄ ya egwugwuun̄ chieen̄ isi ikwaan̄ ya, ikwaan̄ ya ojeje ijaan̄ me ubọk kiban̄. Ema ekpọkpọk inama Uwu Mbuban Awaji ya ikpọ me lek ubọk îkupbe me adasi, mè irọ inyi inye enenen. 14 Mgbọ ikwaan̄ Uwu Mbuban ya otabe, enenisa ikpoko òsisik inu ininyi ogwu ubọọn̄ mè Jeyoyada. Esasa ikpoko cha irọ owuwa nroon̄ ikwaan̄ me Uwu Mbuban Okumugwem, nroon̄ ekisa isi chieen̄ ikwaan̄ geelek, mè nroon̄ ikwaan̄ ngwugwa ewọwọp iriọk, mè ebi kè nkọm, mè nroon̄ alata araran̄ mè echi alata okuket. Me otutuuk mgbọ Jeyoyada okupbe me ugwem, ekigwagwa ngwugwa ewọwọp iriọk mgbọ geelek me Uwu Mbuban Okumugwem.

15 Jeyoyada onenikan ijaan̄ lek, mè irie ugwem kan̄ ijot, mè inikwu mgbọ îsobe efit mè akọp acha ita. 16 Efufuun̄ ọmọ me etete ebi ubọọn̄ me ama kè Debit, mije, ọmọ îrọ ata inu me Ijeren, mè irọ inyi Awaji, mè irọ si me lek Uwu Mbuban Awaji.

17 Mgbọ Jeyoyada okwube iraka, ebi ibot mkpulu ido Juda enunu initọbọ ibot inyi ogwu ubọọn̄ Jowas, ogwu ubọọn̄ ogbagban̄ utọn̄ inyi ema. 18 Ebi Juda etetele Uwu Mbuban Okumugwem Awaji ebi nte nte kiban̄, mè isi ikitọbọ ebum inyi uti yọk Asera melek mkpọmfaka kan̄ cha. Awaji onanaan̄ ejit inyi ebi Juda mè ebi Jeruselem. 19 Okumugwem oraria ebi nriran ibe enerọ inyi ema egwu ekom eka egọọk ọmọ. Ebi nriran cha etataba ema ubọk me utọn̄, ire, ema kpechieek igbagban̄.

20 Ekwukwu Awaji oninin̄ emen kè Jekaraya gwun̄ kè Jeyoyada ogwu ngwugwa, inanan̄a ikeke me isi ebi Juda, mè inibe ema, “Awaji ìtumu ibe ikeyi: ‘Keke orọ mè enyi ejit irọrọ ikọ Okumugwem otọbe? Inu geege ìkpoje ijaan̄ enyi me lek. Mije enyi ejitbe Okumugwem, ọmọ si îjit enyi itele.’ ”

21 Ire, ema etoto okpin inyi Jekaraya, ike ogwu ubọọn̄ onyibe ida, mè isa ewuuk itọbọ ikpan̄ me emen egep Uwu Mbuban Okumugwem. 22 Ogwu ubọọn̄ Jowas ìkayaka ìkeek ata ejit eyi Jeyoyada nte kè Jekaraya okaan̄be me lek kan̄, kpan̄asi keya, itetet gwun̄ ogwu òrọrọ ọmọ ata inu ikpan̄. Mgbọ Jekaraya obokwu, itutumu ibe, “Kè Okumugwem imun̄, mè ido urieek.”

23 Me ibot acha ya, ebi akọn̄ Aram esasa akọn̄ inu me lek kè Jowas, mè inin̄ Juda mè Jeruselem, mè ikpan̄ otutuuk ebi ibot mkpulu isan̄a kpai, mè iria otutuuk inu geelek ema efumbe ijet ogwu ubọọn̄ kiban̄ me Damasikọs. 24 Ubọk geelek otu ifuk ebi akọn̄ Aram ebi ìnunu ikawage, Okumugwem okakana ebi akọn̄ ebi Juda ìwawa enenen igak eyi kiban̄ itap ema me ubọk, mije ebi Juda ejitbe Okumugwem Awaji ebi nte nte kiban̄. Jowas si obọbọkọ itip-oyerebet ògbegbe ọmọ. 25 Sabum ebi akọn̄ Aram ekinan̄a me Juda ifo, ema mîtap Jowas ikpele unan me lek. Ebi ibot ikwaan̄ kan̄ enenito okpin inyi ọmọ, mè ikpan̄ ọmọ me inyọn̄ mkpilaak kan̄, mije îkpan̄be gwun̄ kè Jeyoyada ogwu ngwugwa. Ebeben ọmọ ifuun̄ me ama kè Debit, ire, kpefuun̄ ọmọ me ere ekifuun̄ ebi ubọọn̄.

26 Ebi ìtoto okpin inyi Jowas ya ìre Jabadi gwun̄ kè Semeyat ogwu enenwaan̄ Amọn, mè Jeyosabadi gwun̄ kè Simirit ogwu enenwaan̄ Mowabu. 27 Mfufuk ofolek bọn kè Jowas, mè owuwa nriran ebenbe ikeme ọmọ, mè inu ofolek ike îkpọkbe inama Uwu Mbuban Awaji, mîge otutuuk itap me emen ikpa mfufuk ebi ubọọn̄. Amajiya ogwu gwun̄ onenikana ubọọn̄ me irek kan̄.