Jeyoyada onenitumu inyi ema ibe, “Îre gwun̄ ogwu ubọọn̄ obokpulu, kubọk Okumugwem ochieekbe use òfo me lek owot iman kè Debit. 4 Inu enyi eberọ ìre ikeyi: Enyi ebi ngwugwa mè ebi otoko kè Libai, enyi isinu ikwaan̄ me Usen Mbuban, ìfele lek kinyi irek ita. Irek ge môkup me otutuuk isotu ikibem; 5 irek ge môkup me uwu ogwu ubọọn̄ ikibem, irek ge òsisik môkup me Otunchit Ọdọ. Otutuuk ebi ofifi ene mênenikup me otutuuk oyet egep Uwu Mbuban Okumugwem. 6 Ikatele ibe ene geege iraka inin̄ emen Uwu Mbuban Okumugwem, îtata ebi ngwugwa mè ebi otoko kè Libai ebi ìkup me ikwaan̄, mije ema egwọkbe lek, mè ikup me mbuban. Otutuuk ebi ofifi ene ebekup me irek ikwaan̄ Okumugwem otapbe ema me ubọk ibe ekerọ. 7 Enyi ebi otoko kè Libai ìkeke ìkana ogwu ubọọn̄ okokop, melek nroon̄ akọn̄ me ubọk kinyi. Ene geelek òninin̄ Uwu Mbuban, ìkpan̄. Ìkup melek ogwu ubọọn̄ mgbọ geelek, me ere geelek ìbosi.”

8 Ebi otoko kè Libai mè otutuuk ebi ido Juda erọrọ otutuuk inu cha kubọk Jeyoyada ogwu ngwugwa onyibe ema ida. Ogwu ikup, ìje melek ebi ikwaan̄ ìkup me irak kan̄ ebi ìkup me ikwaan̄ me Usen Mbuban, mè ebi kpekup me ikwaan̄ me Usen Mbuban, mije, Jeyoyada ìkatele ibe ene geege ikakup. 9 Jeyoyada onenikpulu otunwa kè Debit ogwu ubọọn̄, mè agbọ ilile mè agbọ ijija, echi òkup me Uwu Mbuban Awaji, isa itaak me ubọk ebi ibot akọn̄ cha ìkikpulu efit efit ebi akọn̄. 10 Inenito otutuuk ene me irek kiban̄, ogwu ikup melek nroon̄ akọn̄ kan̄ me ubọk. Ema ekekeke ikana ogwu ubọọn̄ okokop, ibene me utọn̄ Uwu Mbuban agan̄ inyọn̄ isi ire utọn̄ agan̄ osiki, me agba lek ntook ngwugwa mè agba lek Uwu Mbuban me lek kan̄.

11 Jeyoyada mè ebi bọn enenisan̄a Jowas gwun̄ ogwu ubọọn̄ isibi inu, mè inikwuun̄ ọmọ okpibot ubọọn̄, mè iniben Ikpa Ikan ikana itap ọmọ me ubọk, mè irọ ọmọ ubọọn̄, mè itọkọ ọmọ aran̄ me ibot. Otutuuk ene edidimi ukpo unwọọn̄ ikibe, “Ogwu ubọọn̄, luk ugwem jọn̄ọ!”

12 Mgbọ yaage Atalia onọbe ebi ene ekitaan̄ ukpo unwọọn̄ ya, mè ikilibi ikana ere ikinwọọn̄ ogwu ubọọn̄, inanan̄a ije inu me lek ife cha me ere Uwu Mbuban. 13 Ikpọkpọ, mè imun̄ Jowas ogwu ubọọn̄ okekebe me agba lek atà ere ebi ubọọn̄ ekikeke, me agba isotu Uwu Mbuban. Ebi ibot akọn̄ mè ebi ìkiwut otita ekekeke me agba lek ogwu ubọọn̄, otutuuk ebi ido ekekibele ejit, mè ikiwut otita. Ebi ìkọt okwa ekekikọt okwa, mè ikikwak nkwukwak, ebi ene ekekichieek igwook. Atalia otataba ofọnti òkup ọmọ me lek igwak, mè ikitaan̄ ukpo ibe, “Mîgwak ido! Mîgwak ido!”

14 Jeyoyada ogwu ngwugwa oraria ebi ibot akọn̄ ìkikpulu efit efit ebi akọn̄, ebi ìkikpọ chieen̄ me lek ebi akọn̄ me ere ya ibe: “Ìsan̄a ogwu enenwaan̄ ya ìsan̄a me etete ebi akọn̄. Ene geelek òjeje igọọk ọmọ, ìcho ìfiin̄. Ikakpan̄ ogwu enenwaan̄ ya me emen Uwu Mbuban Okumugwem.” 15 Etetet Atalia mgbọ îjebe ire Otunchit Inyinya eyi òkup me lek uwu ogwu ubọọn̄, mè ikpan̄ ọmọ me ere ya.

16 Jeyoyada onenigbaan̄ inyan̄a ibot melek otutuuk ebi ido Juda melek ogwu ubọọn̄ ibe ke ema mêkana ebi eyi Okumugwem. 17 Ema otutuuk enenigbuku isi lek uwu yọk Baali, mè igbugbọ igwook me ijọn̄, mè igbugbọ si ntook kan̄ geelek melek mkpọmfaka kan̄ geelek, mè itet Matan ogwu ngwugwa Baali ikpan̄ me isi ntook cha.

18 Jeyoyada onenikana ikwaan̄ Uwu Mbuban Okumugwem itap me ubọk ebi ngwugwa, ìrere ebi otoko kè Libai, ebi Debit okanabe ikwaan̄ Uwu Mbuban itap me ubọk. Îre ema ekigwa ngwugwa ewọwọp iriọk inyi Okumugwem kubọk egebe me Ikan kè Mosis ibe ekerọ, mè ekenwọọn̄ unwọọn̄, mè ekekọt okwa ike Debit odọmọbe ibe ekerọ. 19 Jeyoyada ìtoto ebi ìkibem ere iso otutuuk isotu otunchit geelek òkup me Uwu Mbuban Okumugwem, inyi ene geelek òkaan̄ orieen̄ me lek ikakọt ìraka ìnin̄.

20 Jeyoyada onenititiin̄ ebi ibot akọn̄ ìkikpulu efit efit ebi akọn̄, mè ebi ibot mkpulu, mè ebi ibot ikwaan̄ me ido, mè otutuuk ebi ido, mè inisan̄a ogwu ubọọn̄ me emen Uwu Mbuban Okumugwem isa ikwala isibi inu. Ema enenije itibi Otunchit Agan̄ Inyọn̄ ininin̄ emen uwu ogwu ubọọn̄, mè inibene ogwu ubọọn̄ itoon̄ me inyọn̄ ogboon̄ ubọọn̄. 21 Otutuuk ebi ido ererie ijọk. Jeruselem onenikup me esuuk, mije ekpan̄be Atalia.