Orukan̄ kè Ejikaya
20
Me ike mgbọ ya, Ejikaya onenirọn̄ orukan̄, mè ibokwu. Ogwu nriran Asaya gwun̄ kè Amọs onenisi lek kan̄, mè itumu inyi ọmọ ibe, “Okumugwem ìbe owu: Nen̄e uwu kwun̄ sun̄, mije, owu mônikwu. Lek kwun̄ ìkponye.”2 Ejikaya oyayaka isi ijeen̄ agba uwu, mè iriaak Okumugwem ibe, 3 “Jei Okumugwem, soso, keek ubọk nsabe iluk ugwem melek kwun̄ me otutuuk ejit n̄a mè otutuuk atikọ, mè ikirọ inu ònwọnwọn me chieen̄ kwun̄.” Ejikaya obubumu ito, mè ito ito enenen.
4 Sabum Asaya obonan̄a ije isibi ire oyet egep eyi etete me uwu ogwu ubọọn̄, Okumugwem otutumu inyi ibe: 5 “Gwu kom si tumu nyi Ejikaya, ogwu òkikpulu ebi n̄a, ibe, ‘Okumugwem, Awaji nte nte kwun̄ Debit ìtumu ibe ikeyi: Nra inọ uriaak kwun̄ mè imun̄ mun̄ ito kwun̄. Mâgwa owu. Me òso usen ita, bene me chereyi, owu môje isi Uwu Mbuban Okumugwem. 6 Mâtap akọp mè acha go isọkọ me lek acha ugwem kwun̄. Mânyan̄a owu melek ama yi isibi me ubọk ogwu ubọọn̄ Asiria. Emi mâkwek ama yi lek, mije n̄a mè mije kè Debit ogwu ikwaan̄ n̄a.’ ”
7 Asaya onenitumu inyi ebi ikwaan̄ ogwu ubọọn̄ ibe, “Ìgbeme mfut figi, mè ìkọk.” Egbegbeme mfut figi ikọk, mè isa itoon̄ me lek okporotu cha òkup Ejikaya me lek, lek onyenye.
8 Sabum mgbọ yi, Ejikaya îdo Asaya ibe, “Kpasi inu ijejeen̄ ke mbasa iriọọn̄ ibe ke Okumugwem môgwa emi, ke mâkọt ije isi Uwu Mbuban Okumugwem me òso egwe ita bene me mgbọ keyi?”
9 Asaya ofọfọọk ibe, “Inu ijejeen̄ eyi Okumugwem obonyi owu, inyi owu òsa òriọọn̄ ibe ke Okumugwem môrọ otu ikọ kan̄ iso, ìre ikeyi: Ìre ogugo ura ìbojeje inyi isi akọp otitop, sà ìre ìbokpekpebe inyi udun̄ akọp otitop? Eyi owa ke oweek?”
10 Ejikaya ofọfọọk ibe, “Ogugo ura ijeje inyi isi akọp otitop ìre mfufet inu. Kpan̄asi ikeya, rọ ibe ikpebe inyi udun̄ akọp otitop.”
11 Asaya ogwu nriran oneniriaak uriaak igwen Okumugwem, Okumugwem orọrọ inyi ogugo ura ògwogwook me lek obeek kè Ayaji ikpebe inyi udun̄ akọp otitop.
Ogwu ubọọn̄ Babilọn îria ene inu me lek kè Ejikaya
12 Me ike mgbọ ya, ogwu ubọọn̄ Babilọn, Merodak Baladan gwun̄ kè Baladan, oneniria ikpa etip mè iche uche igbaalek ijet Ejikaya, mije, înọ ibe Ejikaya îfiak orukan̄. 13 Ejikaya obọbọkọ ebi osat cha itap, mè isa ema isi ijeen̄ otutuuk inu ubọọn̄ òkup me uwu isun̄-inu kan̄. Îjeen̄ ema alata okuket, mè alata araran̄, mè inu ekisa irọ inorie itop, mè atalek aran̄ unye otu ewe, mè uwu nroon̄ akọn̄ kan̄, mè otutuuk inu ubọọn̄ kan̄ geelek. Kpunu inu geege òkup me uwu kan̄ mè ìre me otutuuk ido kan̄ eyi Ejikaya ìkajeen̄ ema.
14 Asaya ogwu nriran onenisi lek ogwu ubọọn̄ Ejikaya, mè ido ibe, “Ìre keke ke ife cha etumu inyi owu? Ìre ema enan̄a me ere owa inu?”
Ejikaya ofọfọọk ibe, “Ema enan̄a me ujọn̄ọ ere. Enan̄a me Babilọn inu.”
15 Ogwu nriran ya onenido ibe, “Keke ke ema emun̄ me uwu kwun̄?”
Ejikaya obebe, “Ema mîmun̄ otutuuk inu òkup me uwu n̄a. Kpunu inu geege me lek inu ubọọn̄ n̄a eyi ǹkajeen̄ ema.”
16 Asaya onenitumu inyi Ejikaya ibe, “Gban̄ ikọ Okumugwem otumube: 17 Mgbọ òkinu mgbọ mêkpulube otutuuk inu òkup me uwu kwun̄, mè otutuuk echi ebi nte nte kwun̄ ekukọbe ititiin̄ isun̄ mege inire cherekeyi, isa ifon Babilọn. Inu geege ìkposik. Emi Okumugwem ntumu. 18 Usini me lek bọn kwun̄, ebi owu môboon̄be, ebi ebemaan̄ inyi owu, mêkpulu si ema isa ifon. Ema mênenisi ikana ebi ikwaan̄ ebi esan̄abe òsok me uwu ogwu ubọọn̄ Babilọn.”
19 Ejikaya ofọfọọk Asaya ibe, “Ikọ Okumugwem eyi owu otumube înwọn.” Ọmọ ìtumu ikeya, mije, nkeek kan̄ ìre ke esuuk mè utelelek môkup me ukot eyi kan̄.
20 Otutuuk ofifi inu òrọrọ me ukot mkpulu kè Ejikaya, mè otutuuk unye ikwaan̄ îrọbe, mè udọn̄ mun̄ îrọkọbe, mè okolo eyi îtibibe inyi mun̄ ikilibi me emen inin̄ emen ama, mîge otutuuk itap me emen ikpa mfufuk echi ebi ubọọn̄ Juda. 21 Ejikaya onenikwu ifo igọọk ebi nte nte kan̄. Manasi ogwu gwun̄ onenikana ubọọn̄ me irek kan̄.