Orukan̄ kè Ejikaya
38
Me ike mgbọ ya, Ejikaya onenirọn̄ orukan̄, mè ibokwu. Ogwu nriran Asaya gwun̄ kè Amọs onenisi lek kan̄, mè itumu inyi ọmọ ibe, “Okumugwem ìbe owu: Nen̄e uwu kwun̄ sun̄, mije, owu mônikwu. Lek kwun̄ ìkponye.”2 Ejikaya oyayaka isi ida agba uwu, mè iriaak Okumugwem ibe, 3 “Jei Okumugwem, soso, keek ubọk nsabe iluk ugwem melek kwun̄ me otutuuk ejit n̄a mè otutuuk atikọ, mè ikirọ inu ònwọnwọn me chieen̄ kwun̄.” Ejikaya obubumu ito, mè ito ito enenen.
4 Okumugwem otutumu inyi Asaya ibe: 5 “Si tumu nyi Ejikaya ibe, ‘Okumugwem, Awaji nte nte kwun̄ Debit, ìtumu ibe ikeyi: Nra inọ uriaak kwun̄, mè imun̄ mun̄ ito kwun̄. Mâtap akọp mè acha go isọkọ me lek acha ugwem kwun̄. 6 Mânyan̄a owu melek ama yi isibi me ubọk ogwu ubọọn̄ Asiria. Emi mâkwek ama yi lek.
7 “ ‘Inu ijejeen̄ eyi emi Okumugwem mbanyi owu, inyi owu òsa òriọọn̄ ibe ke emi mârọ use yi nchieekbe owu iso ìre ikeyi: 8 Mârọ inyi ogugo ura ògwogwook me lek obeek kè Ayaji iso akọp otitop iyaka ikpebe inyi udun̄ akọp otitop cha.’ ” Ikeya si, ogugo ura ya okpekpebe inyi udun̄ akọp otitop.
Ejikaya îtọn̄ Awaji
9 Mgbọ Ejikaya ogwu ubọọn̄ Juda ofiakbe orukan̄, lek oyakabe inye, igege okwa ibe:
10 Emi m̀be, “Ìre me etete usen ugwem n̄a
ke emi mbafat ininan̄a ije
ukot ukot ifo otunchit ama ekwukwu;
menibọkọ emi acha ugwem n̄a echi òsisik?
11 Emi m̀be ke m̀kpayaka ikpọk imun̄ Okumugwem;
iin̄, Okumugwem, me linyọn̄ ebi ìkup me ugwem;
ke m̀kpayaka irieen̄ chieen̄ me lek ebilene,
m̀kpayaka ikup me etete ebi ìgat ugwem.
12 Mîjibi ugwem n̄a imaan̄,
mè ibọkọ ugwem n̄a isan̄a emi me ubọk,
kubọk uwu ọfọ ogwu òkpukpo arọọn̄;
Awaji îkat ugwem n̄a igba,
kubọk ogwu òchak ekwut okat ekwut igba,
mè ifieek emi isan̄a me lek agbasi ichak ekwut;
me mgbidim mgbọ, kubọk ewelegwe re ikakwun̄,
owu osasa ugwem n̄a ire okputut.
13 Ǹtetet lek n̄a ikaan̄ mege iwele egwe;
ọmọ ofafaan̄ emi otutuuk ukwuuk isan̄a me lek,
kubọk egbe àtat ofaan̄ ukwuuk me lek anam;
me mgbidim mgbọ, kubọk ewelegwe re ikakwun̄,
owu osasa ugwem n̄a ire okputut.
14 Nsan̄a amọn agagawaji mè ìre amọn aba mbese,
ntaan̄ ito ekerekwukwu.
Chieen̄ îwọ emi inyi ibebene ifo inyọn̄.
Ǹkup me emen ujaralek; jei Ogwukaan̄-ene nin̄ emi lek!
15 “Keke ke mbayaka itumu ni?
Ọmọ otumu ikọ inyi emi,
ọmọ me lek kan̄ orọ inu yi.
Mâsiki lek ikiluk ugwem otutuuk acha ugwem n̄a,
mije uga ujaralek òkup emi me ejit.
16 Ogwukaan̄-ene, inu kechi ke ebilene ekisa iluk,
sa me lek inu chi si ke
ekwukwu n̄a okaan̄ ugwem.
Owu otap emi ayaya unye me emen,
mè itele ibe emi ǹgat ugwem.
17 Me atikọ, uga ujaralek ya ìnu inyi emi,
inyi ǹsa me ikeya ǹkaan̄ esuuk.
Sa me imumechieen̄ kwun̄ ke
owu onyan̄a emi isibi me udọn̄ mkpa;
owu obieen̄ otutuuk ijo inu n̄a ikana ito me udun̄ kwun̄.
18 Ama ekwukwu ìkpokọt ibe owu onirọ,
mkpa me lek kan̄ ìkpokọt itọn̄ owu,
Ebi ìninin̄ udọn̄ mkpa
kpebekọt ikpọ chieen̄ ibe owu ogbe utoon̄-ejit.
19 Ebi ìkup me ugwem, ebi ìkup
me ugwem ere ebi ìkitọn̄ owu,
kubọk nkirọ me cherekeyiyi.
Ebi ute ekikpa inyi nsabọn kiban̄
ibe ke owu ogbe utoon̄-ejit.
20 “Okumugwem înyan̄a emi,
eya orọ eji mêkwak uneen̄ isa ikọt okwa
otutuuk usen geelek me ugwem kiji
me emen Uwu Mbuban Okumugwem.”
21 Me mgbọ Asaya olookbe Ejikaya etip Okumugwem ya, ìtumu ibe, “Ìkọk mfut figi, mè ìsa ìtoon̄ me chieen̄ okporotu ya ìbọp, ke lek kan̄ mônye.”
22 Mgbọ ya, Ejikaya îdo ibe, “Ìre keke obore inu ijejeen̄ ibe ke emi mânan̄a ikeke ije isi Uwu Mbuban Okumugwem?”