Asa înen̄e inu isun̄
15
Ekwukwu Awaji oneninu me lek kè Ajariya gwun̄ kè Odedi. 2 Inanan̄a ije isi lek kè Asa, mè itumu inyi ibe, “Owu Asa mè otutuuk ebi Juda mè ebi Benjamin ìgban̄ utọn̄! Okumugwem òwa melek kinyi, ire enyi ikup melek kan̄. Ire enyi iweek ọmọ, enyi mêweek ọmọ imun̄. Ire, ire enyi ijit ọmọ itele, ọmọ si môjit enyi itele. 3 Ebi Ijeren mîkup ijọn̄ọ mgbọ kpeyaka ikitọbọ ebum inyi atata Awaji ya, kpekaan̄ ogwu ngwugwa òkijeen̄ ema inu, kpekakaan̄ si Ikan Awaji. 4 Ire, mgbọ ufialek okemebe ema, ema egwugwu ikom iweek Okumugwem, Awaji ebi Ijeren, mè iweek ọmọ imun̄. 5 Me emen mgbọ cha, kpekikọt isi ije me utelelek, mije, ufialek mè wọlọwọlọ ìninin̄ ijot me lek otutuuk ebi ìluk me lek ijọn̄ yi. 6 Ido ge ìkijijaka ofifi ido, ama ge ìkijijaka si ofifi ama, mije, Awaji ìsasa esese chieen̄ ùrioon̄ ikitap ufialek ijot otutuuk ere. 7 Ire enyi, ìtet lek ìnye, ikachieek ibe lek iwọ enyi, ke mêkpe enyi mkpukpe ubọk ikwaan̄ kinyi.”8 Mgbọ Asa onọbe ikọ nriran cha ogwu nriran Ajariya gwun̄ kè Odedi otumube, itetet lek inye, mè isi ijijaka mkpọmfaka òchichaka inu cha isan̄a me otutuuk Juda mè Benjamin mè ama echi ema ebọkọbe me akọn̄ me ijọn̄ ogoon̄ ogoon̄ ebi otoko kè Iferem, mè ikpọk inama si ntook ngwugwa Okumugwem eyi òkup me isi irak oyet Uwu Mbuban Okumugwem.
9 Inenititiin̄ otutuuk ebi otoko kè Juda, mè otoko kè Benjamin, melek ebi ìnan̄a me otoko kè Iferem, mè otoko kè Manasi, mè otoko kè Simiọn ebi ìluk me etete kiban̄. Owuwa ene mînan̄a me Ijeren ikana igọọk ọmọ mgbọ ema emun̄be ibe ke Okumugwem Awaji kan̄ òwa melek kan̄.
10 Ema etitiin̄ me Jeruselem me òso onyan̄ ita, me òso akọp mè acha go me lek mkpulu kè Asa. 11 Me usen ya, ema esasa efit eriembuuk jaaba, mè obop arọọn̄ mè ebot jaaba me lek anam ema ekpulube me akọn̄ igwa ngwugwa inyi Okumugwem. 12 Ema enenikaan̄ mgbaan̄-nchieek ibe ke ema mêsa otutuuk ejit kiban̄ mè ugwem kiban̄ ikitọbọ ebum inyi Okumugwem Awaji ebi nte nte kiban̄. 13 Ema mîchieek ibe, ene geelek òjijit itọtọbọ ebum inyi Okumugwem, Awaji ebi Ijeren, ke ebekpakpan̄ ene ya, mè ìre ogwu ilile mè ìre ogwu sọntiik, mè ìre enerieen̄ mè ìre enenwaan̄. 14 Ema enenigbaan̄ inyan̄a ibot inyi Okumugwem isasa irọ mgbaan̄-nchieek kiban̄ inye, mè ikidimi ere, mè ikitaan̄ ukpo, mè ikiwut otita mè odu isa ikirie ijọk. 15 Otutuuk ebi Juda ebebele ejit me lek inyan̄a-ibot ya, mije, ema esa otutuuk ejit kiban̄ inyan̄a ibot ya. Ema enenisa me otutuuk ulọk kiban̄ iweek Awaji, mè iweek ọmọ imun̄. Okumugwem onyinyi ema utelelek me agan̄ geelek.
16 Ogwu ubọọn̄ Asa osasan̄a si Maaka nga nte kan̄ me irek kan̄ kubọk nga ogwu ubọọn̄, mije îgwuun̄be òchichaka inu uti yọk Asera. Asa ochocho uti yọk nga ogwu ubọọn̄ ya ito, mè isọp ikpukpuku, mè ikpulu isi iwọp me iteke Kidọrọn. 17 Ubọk geelek ibe ke Asa ìkajijaka isi-ijọn̄ cha òkup me Ijeren ìsan̄a, ire, Asa ìsasa me otutuuk ejit kan̄ ikeke inye melek Okumugwem me otutuuk usen ugwem kan̄. 18 Isasa otutuuk nroon̄ ikwaan̄ alata okuket mè alata araran̄ melek ofifi nroon̄ ikwaan̄ cha echi ogwu ute ofakabe itap me ubọk Okumugwem, melek echi ọmọ me lek kan̄ si ofakabe itap me ubọk Okumugwem, isa initap me emen Uwu Mbuban Awaji.
19 Otutuuk mgbọ cha, mege inire òso akọp acha ita mè go me lek mkpulu kè Asa, akọn̄ geege ìkayaka ìtim me Juda ofifi.