Òta mgbọ me mkpulu kè Asa
16
Me òso akọp acha ita me gweregwen me lek mkpulu kè Asa, Basa ogwu ubọọn̄ Ijeren onenijibi akọn̄ inin̄ Juda, mè isinama mgban ikana ama Rama, isa ikwek ido kè Asa ogwu ubọọn̄ Juda, inyi ebi ene ekakọt ìnan̄a isibi, mè ekakọkọt si ìraka ìnin̄.2 Asa onenikpulu alata araran̄ mè alata okuket òkup me emen uwu isun̄-inu cha me Uwu Mbuban Okumugwem mè echi òkup me emen uwu ogwu ubọọn̄ isa iria ijet Ben-Adadi ogwu ubọọn̄ Aram me Damasikọs ere îkupbe ikikpulu, mè itumu inyi ibe, 3 “Emi melek kwun̄ mîkaan̄ mgbaan̄-nchieek, kubọk nte n̄a melek nte kwun̄ si ekaan̄be. Kpọ alata okuket mè alata araran̄ ire echi nriabe ijet owu. Nye lek gwak mgbaan̄-nchieek kwun̄ melek kè Basa ogwu ubọọn̄ Ijeren, inyi inan̄a ifo, mè ijuuk emi itele.”
4 Ogwu ubọọn̄ Ben-Adadi ochechieek melek kè Asa, mè iniria ebi ibot akọn̄ kan̄ ibe esi etim akọn̄ me lek ebi Ijeren. Ema esisi, mè itim ikpan̄ ama Ijon, mè Dan, mè Aben Mayim,a mè otutuuk ama isun̄ inu ebi otoko kè Nafitali. 5 Mgbọ Basa onọbe inu yi òrọrọ, itetele inanama Rama, mè igwu ikom ifo Tirija. 6 Ogwu ubọọn̄ Asa oraria otutuuk ebirieen̄ Juda isi Rama, ema ekpukpulu otutuuk ewuuk mè uti cha geelek Basa okisa inama mgban ama ya. Ogwu ubọọn̄ Asa onenisa ewuuk cha melek uti cha inama Geba òkup me agan̄ Benjamin, mè inama si Mijipa.
7 Me ike mgbọ ya, Anani ogwu òmọọn̄ inu onunu me lek kè Asa ogwu ubọọn̄ Juda, mè initumu inyi ibe, “Mije owu osabe ogwu ubọọn̄ Aram itoon̄ ejit, òkasa Okumugwem Awaji kwun̄ ìtoon̄ ejit, ebi akọn̄ ogwu ubọọn̄ Aram mînwọnọ owu me ubọk. 8 Ìre òkayaka ìkeek ebi akọn̄ Etiopia mè ebi akọn̄ Libiya ìsasa ikpele urum akọn̄ melek ogbogbo uji akọn̄ òwawa enenen cha inu? Ire, mije owu osabe Okumugwem itoon̄ ejit, ikakana ema itap owu me ubọk, owu otitim ikpan̄ ema. 9 Kpọ, chieen̄ Okumugwem ìkikukup mgbọ geelek me lek otutuuk ene me linyọn̄, inyi ọmọ itap unye me emen ebi geelek otutuuk ejit kiban̄ okupbe me lek kan̄. Me lek inu yi owu orọbe, owu orọ burubut inu. Mije keya, bene me mgbọ keyi, akọn̄ akọn̄ okup inyi owu.”
10 Asa onanaan̄ ejit enenen inyi ogwu òmọọn̄ inu ya mije inu yi îtumube, mè inisa me unaan̄-ejit ya itet ogwu òmọọn̄ inu ya itap me mkpọn. Me emen mgbọ ya si, ibebene ikitutuku usini ebi ene ikpak ikpak.
11 Otutuuk inu òrọrọ me ukot mkpulu kè Asa, bene me ibebene si re itata kan̄, mîge otutuuk itap me emen ikpa mfufuk echi ebi ubọọn̄ Juda mè ebi ubọọn̄ Ijeren. 12 Me òso akọp acha ita mè onaan̄ge me lek mkpulu kè Asa, ijo orukan̄ ge orọrọ ọmọ me ukot iba kan̄. Ubọk geelek orukan̄ ya onyebe enenen, Asa ìkaweek ntap-ubọk me ubọk Okumugwem, kpan̄asi ikeya, ikekisi iweek ntap-ubọk me ubọk ebi ofia gaalek. 13 Asa onenikwu ifo igọọk ebi nte nte kan̄ me òso akọp acha ini mè ge me lek mkpulu kan̄. 14 Ebeben ọmọ ifuun̄ me emen udọn̄-ufuun̄ îrọkọbe isun̄ inyi lek kan̄ me ama kè Debit. Emaan̄ ọmọ me inyọn̄ m̀kpata egwookbe owuwa chieen̄ aran̄ utop olu me inyọn̄, mè igwook si esese ugwun̄ ekisa irọ inyi nkwukwu ene ikajọ, mè isọk ikpele ukan̄ isasa inyi ọmọ umin.