Jiosefat îkana ogwu ubọọn̄ Juda
17
Jiosefat gwun̄ kè Asa onenikana ubọọn̄ me irek kè Asa. Jiosefat otetet lek inye ikeke ida ebi Ijeren. 2 Jiosefat ìgwogwook ebi akọn̄ me otutuuk ama mgban akọn̄ geelek òkup me Juda, mè isa si owuwa ama me Juda irọ okwukwek akọn̄, mè irọ si ikeya me ama ebi otoko kè Iferem echi ogwu ute Asa obọkọbe me akọn̄.3 Okumugwem okukup melek kè Jiosefat, mije, me okpatu mgbọ me mkpulu kan̄, îluk ugwem kan̄ itat kubọk ogwu ute Debit olukbe. Ìkatọbọ ebum ìnyi Baali. 4 Kpan̄asi ikeya, ìkitọbọ ebum inyi Awaji kè nte kan̄, mè ikisun̄ ikan kan̄ geelek. Ìkarọ ubọk irọ-inu ebi Ijeren. 5 Okumugwem onenirọ ibe mkpulu ido Juda ikeke inye me ubọk kè Jiosefat. Otutuuk ebi Juda ekekiche owuwa uche inyi Jiosefat, isasa me ikeya ibọọn̄ ubọọn̄ enenen, mè ikaan̄ umin. 6 Isasa otutuuk ugwem kan̄ inyi Okumugwem. Îgwak si isi-ijọn̄ geelek melek uti yọk Asera geelek isan̄a me Juda.
7 Me òso acha ita me mkpulu kan̄, ineniria ebi ikwaan̄ kan̄, Ben-Ayin, mè Obidaya, mè Jekaraya, mè Netanen, mè Mikaya, ibe esi ejeen̄ Ikan Awaji me otutuuk ama ile geelek me Juda. 8 Îria si usini ebi otoko kè Libai ibe egọọk ema esi. Ebi otoko kè Libai ebi îriabe ìre Semaya, mè Netaniya, mè Jebadiya, mè Asayen, mè Semiramot, mè Jeyonatan, mè Adonija, mè Tobija, mè Tobu-Adonija, melek ebi ngwugwa, Elisama mè Jeyoram. 9 Ema esasa Ikpa Ikan Okumugwem ikaan̄ me ubọk isi ikijeen̄ inu ikana me ido Juda. Ema ejijijen̄e ikana otutuuk ama Juda, mè ijeen̄ ebi ene Ikan Awaji.
10 Ukpook Okumugwem oninin̄ ijot emen ebi ofifi ido cha òkukup ikana ido Juda, ema kpekọt ita ukpook me lek inu akọn̄ me lek kè Jiosefat. 11 Usini ebi Filisia esasa owuwa inyinyi melek alata okuket ijet Jiosefat kubọk ikpoko mkpulu. Ebi Arabu si esasa obop orie arọọn̄ jaaba mè efit jaaba, melek obop orie ebot jaaba mè efit jaaba ijet ọmọ.
12 Jiosefat okpọkpọ ikinye lek ifo isi. Înama ama mgban akọn̄ mè ama isun̄-inu ikana otutuuk Juda. 13 Îsun̄ inu owuwa owuwa me owuwa ama me Juda, mè isun̄ si owuwa ebi usọ akọn̄ ebi ìrọriọọn̄ ukot akọn̄ me Jeruselem. 14 Erieen̄ ebi kiban̄, kubọk egebe me otoko me otoko, ìre ikeyi:
Me otoko kè Juda, ebi ibot akọn̄ ìkikpulu obop obop ebi akọn̄:
Adina ore ogwu ibot, mè ikaan̄ efit obop ene ita ebi ìkaan̄ efuuk akọn̄ me irak kan̄;
15 Jeyoyanan ogwu ibot akọn̄ ogọọk, mè ikaan̄ efit obop ene iba mè akọp jeeta me irak kan̄.
16 Ogwu ògọgọọk ìre Amasiya gwun̄ kè Jikiri, ogwu òsa lek kan̄ inyi isisi ikwaan̄ Okumugwem. Amasiya ìkaan̄ efit obop ene iba me irak kan̄.
17 Me otoko kè Benjamin:
Eliada, ogwu usọ akọn̄, ìkaan̄ efit obop ene iba ebi ìriọọn̄ ukot akọn̄ ogbaan̄ mè agbọ me irak kan̄.
18 Ogwu ògọgọọk, òrere Jeyosabadi, ìkaan̄ efit obop ene mè akọp jeeta ebi ìkitim akọn̄, me irak kan̄.
19 Ebibi ere ebi ìkisi ikwaan̄ me irak ogwu ubọọn̄, kpefuk ebi îtobe ikana me ama mgban akọn̄ geelek me otutuuk Juda.