Mikaya îben nriran ikeme Eyabu
18
Jiosefat onenibọọn̄ ubọọn̄ enenen mè ikaan̄ si umin. Inenido gwun̄ kè Eyabu inyi gwun̄ kan̄, ọmọ mè Eyabu ekakana ugot. 2 Mgbọ acha inen mè inen orakabe, Jiosefat onenisi ikpọ Eyabu me Sameria. Eyabu okpakpan̄ owuwa arọọn̄ mè eriembuuk isa ibọkọ ọmọ mè ebi melek kan̄ itap, mè iniriaak ibe inigọọk ọmọ isi itim akọn̄ me ama Ramot òkup me Giliadi. 3 Eyabu ogwu ubọọn̄ Ijeren onenido Jiosefat ogwu ubọọn̄ Juda ibe, “Ìre owu môgọọk emi isi akọn̄ me ama Ramot me Giliadi?”Jiosefat ofọfọọk ibe, “Iin̄ ma! Emi melek kwun̄ ìre ge, ebi n̄a si melek ebi kwun̄ ìre ge. Eji mêgọọk owu igbaan̄ isi akọn̄ ya.” 4 Jiosefat onenitumu inyi ogwu ubọọn̄ Ijeren ibe, “Dasi week-nu nkeek Okumugwem òfo me lek.”
5 Ogwu ubọọn̄ Ijeren onenititiin̄ ebi nriran òsoso efit ene ini, mè inido ema ibe, “Ìre eji esi akọn̄ me lek ebi ama Ramot òkup me Giliadi, sà ìre eji ekasi?”
Ema efọfọọk ibe, “Ogwu ubọọn̄ si, ke Awaji môkana ama ya itap owu me ubọk.”
6 Ire, Jiosefat onenido ibe, “Ìre kpunu ogwu nriran Okumugwem si me ere yi, ogwu eji mêkọtbe ido ikọ me otu?”
7 Ogwu ubọọn̄ Ijeren ofọfọọk Jiosefat ibe, “Îkaan̄ si ogwu enerieen̄ ge ogwu eji mêkọtbe ido ida Okumugwem inan̄a me otu, ire, emi ǹchacha ene ya, mije, ìkakiben ata nriran ìnyi emi, ìkire ijo ijo mgbọ geelek. Erieen̄ kan̄ ìre Mikaya gwun̄ kè Imila.”
Jiosefat onenifọọk ibe, “Ogwu ubọọn̄, katumu ikeya.”
8 Ogwu ubọọn̄ Ijeren onenigwen ogwu ibot ikwaan̄ kan̄ ge iria ibe, “Si sa Mikaya gwun̄ kè Imila na mgbọ keyi mgbọ keyi.”
9 Me ike mgbọ ya, Eyabu ogwu ubọọn̄ Ijeren mè Jiosefat ogwu ubọọn̄ Juda mîtap ofọnti ubọọn̄ kiban̄, mè isiki ikweek irek, kpa ogwu me inyọn̄ ogboon̄ ubọọn̄ kan̄, me ere igen̄ akpa òkup me otunchit ama Sameria. Ebi nriran cha ekekiben nriran me isi kiban̄ me ere ya. 10 Ogwu nriran ge ekigwen Jedikaya gwun̄ kè Kenayana osasa okwukwut irọ owuwa iko ibot anam, mè ikitumu ibe, “Okumugwem ìtumu ibe ikeyi: ‘Iko chi ke owu obosa igoon̄ ebi Aram igwook, mege owu môkpan̄be otutuuk kiban̄ isan̄a.’ ”
11 Otutuuk ebi nriran kechilọ ekekiben nriran, mè ikitumu si inu yaage ibe, “Ogwu ubọọn̄, si Ramot me Giliadi si tim kpan̄, ke Okumugwem môkana ama ya itap owu me ubọk.”
12 Ogwu osat ya eriabe ibe isi igwen Mikaya otutumu inyi Mikaya ibe, “Kpọ, otutuuk ebi nriran kechilọ ekiben otu nriran yaage ibe ke inu môje ijaan̄ me lek ogwu ubọọn̄. Mun̄ ibe ke ikọ kwun̄ îlibi si ìkike melek ikọ kiban̄. Osire, tumu inu òbotop ogwu ubọọn̄ ejit.”
13 Ire, Mikaya ofọfọọk ọmọ ibe, “Kè lek ugwem Okumugwem! Ikọ geelek Okumugwem obe emi ntumu, eya ke mbatumu.”
14 Mgbọ Mikaya onube inire, Eyabu ogwu ubọọn̄ onenido ọmọ ibe, “Mikaya, tumu-nu! Ìre eji esi etim akọn̄ me lek ama Ramot me Giliadi, sà ìre ekasi?”
Mikaya ofọfọọk ọmọ ibe, “Ogwu ubọọn̄, ìsi ìsi ìtim ìkpan̄, ke Okumugwem môkana ama ya itap enyi me ubọk.”
15 Ogwu ubọọn̄ onenibe ọmọ, “Ìre mgbọ inen ke mbakitumu inyi owu ibe, osikitumu ikọ me erieen̄ Okumugwem inyi emi, kitumu atikọ gaalek?”
16 Mikaya ofọfọọk ibe, “Mmun̄ otutuuk ebi Ijeren eyiyalabe ichit inyọn̄ owuwa ogoon̄ kubọk arọọn̄ ikakaan̄ge ogwu òkikpukpo. Okumugwem onenitumu ibe, ‘Ife chi kpekaan̄ ogwu ibot. Tele mè ema egwu ekom, ogwu ikup, ifo uwu kan̄ me esuuk.’ ”
17 Ogwu ubọọn̄ Ijeren otutumu inyi Jiosefat ibe, “Ke ntumu inyi owu! Ene yi ìkakiben ata nriran ìbak emi mgbọ geege, ìkire ijo ijo mgbọ geelek!”
18 Mikaya okekitumu ifo isi ibe, “Eya orọ, gban̄ ikọ Okumugwem: Mmun̄ Okumugwem osikibe ikweek irek me inyọn̄ ogboon̄ ubọọn̄ kan̄, melek urum ebi osat emen inyọn̄ ekekebe ikana ọmọ me agan̄ ulom mè agan̄ ujit. 19 Okumugwem okekido ibe, ‘Ekene obosi ileke Eyabu, ogwu ubọọn̄ Ijeren, inyi ijibi akọn̄ isi itim me lek ama Ramot me Giliadi, mè isi ikwu me ere ya?’
“Bọkọbọkọ otu oninin̄, ge itọt ikeyi, ogwugwulọ òtọt ikilọ. 20 Me òta kan̄, erumun̄ ge oneninan̄a isibi ikeke me isi Okumugwem, mè itumu ibe, ‘Emi mâsi ileke.’
“Okumugwem onenido erumun̄ ya ibe, ‘Òborọrọ?’
21 “Erumun̄ ya ofọfọọk ibe, ‘Mâsi, mè ikana erumun̄ ofiaan̄ me otu otutuuk ebi nriran kan̄.’
“Okumugwem obebe ọmọ, ‘Ire ikeya, owu môkọt ileke ọmọ me atikọ. Si, mè rọ ikeya.’
22 “Eya orọ, mgbọ keyi, Okumugwem îtap erumun̄ ofiaan̄ me otu otutuuk ebi nriran kwun̄ chi. Okumugwem îtumu ifieek ibe ke jakajaka okup inyi owu.”
23 Jedikaya gwun̄ kè Kenayana ojeje inin̄ lek kè Mikaya, mè itap ọmọ ada me isi, mè ido ibe, “Ìre mgbọ owa ke Ekwukwu Okumugwem ojuuk emi itele, mè iyaka inikitumu ikọ inyi owu?”
24 Mikaya ofọfọọk ọmọ ibe, “Owu môriọọn̄ me usen ya, mgbọ owu môlibibe isi ilet lek me agwut eyi emen emen.”
25 Ogwu ubọọn̄ Ijeren onyinyi ida ibe, “Ìtet Mikaya ìsa ìgwu ìkom ìjet Amọn ogwu ibot mkpulu ama, mè Jowas gwun̄ ogwu ubọọn̄, 26 mè ìtumu ìnyi ibe ke ogwu ubọọn̄ ìbe ikeyi: ‘Ìtap ene yi me mkpọn, mè ìkinyi ọmọ fituru udun̄ ubọk melek mudim udun̄ ubọk gaalek mege mâkabe me utelelek.’ ”
27 Mikaya otutumu ibe, “Ire oka me utelelek, me atikọ, riọọn̄ ibe ke ìkare Okumugwem otumu ikọ yi inan̄a me otu n̄a,” mè inibe si, “Enyi otutuuk ebi ìkup me ere yi, ìtap iman̄ me lek ikọ yi ntumube!”
Eyabu îkwu me ama Ramot me agan̄ Giliadi
28 Ogwu ubọọn̄ Ijeren melek Jiosefat ogwu ubọọn̄ Juda eneninan̄a isi akọn̄ me ama Ramot me Giliadi. 29 Ogwu ubọọn̄ Ijeren otutumu inyi Jiosefat ibe, “Emi mânwene lek sabum ǹnin̄ isi akọn̄ ya. Ire, owu tap ofọnti ubọọn̄ kwun̄.” Ogwu ubọọn̄ Ijeren onwenwene lek kubọk ọmọ ìkare ogwu ubọọn̄, mè inan̄a isi itim akọn̄ ya.
30 Sabum akọn̄ ya obenebe, ogwu ubọọn̄ Aram înyi ebi ibot uji akọn̄ kan̄ ida ibe, “Ikatim akọn̄ me lek ene geelek, mè ìre ebi asasa, mè ìre ebi ilile. Ìtim me lek ogwu ubọọn̄ Ijeren gaalek.” 31 Mgbọ ebi ibot akọn̄ cha ìkikọp uji akọn̄ emun̄be Jiosefat, ema ebebe ke ìkpolọlọ ogwu ubọọn̄ Ijeren ire ogwa, mè ikana isi ikweek ọmọ ibetim ọmọ akọn̄ me lek. Ire, Jiosefat otataan̄ ukpo. Okumugwem otatap ubọk inyi. Sa me ikeya, Awaji odada isi ife cha isan̄a ọmọ me lek. 32 Mgbọ ebi ibot uji akọn̄ cha emun̄be ibe ke ìkare ogwu ubọọn̄ Ijeren, ema egwugwu ikom, kpeyaka igọọk ọmọ.
33 Me ekakpọge chieen̄, ogwu akọn̄ Aram ge obebene ogbaan̄ kan̄, mè ikpọkpọ isook itap me etete ene. Oraan̄ ya okpọkpọ isi itet Eyabu ogwu ubọọn̄ Ijeren, mè igwọt itibi agbagba ofọnti akọn̄ kan̄. Ogwu ubọọn̄ otutumu inyi ogwu òkikọp uji akọn̄ kan̄ ibe, “Gwu uji kana, mè kọp emi sibi me isi akọn̄, ke mben unan.” 34 Mîtim akọn̄ otutuuk egwe usen ya. Otutuuk mgbọ ya, ebebieen̄ ogwu ubọọn̄ ikaan̄ me emen uji akọn̄ kan̄ iyaka isi ikpọ agan̄ ebi akọn̄ Aram ekupbe. Me agan̄ ikakwun̄ usen ya, ikwukwu.