2 Etip onenilook Jiosefat ibe, “Urum akọn̄ òmimin enenen òkinan̄a me Edọm me usaba okwaan̄ Uchi inu ibonitim owu akọn̄ me lek. Kpọ, ema mîra irere Asasọn Tema (òrere Engedi) isan̄a.” 3 Ukpook otetet Jiosefat, itetet lek inye iweek nteme me otu Okumugwem. Inyinyi ida ibe otutuuk ebi Juda enin̄ ijin-otu. 4 Ebi Juda enenigbaan̄ ititiin̄ ikiweek ntap-ubọk me ubọk Okumugwem. Ebi ene enanan̄a me otutuuk ama geelek òkup me Juda inu inigọọk iweek nteme me otu Okumugwem.

5 Jiosefat onanan̄a ikeke me etete ogbogbo ebi ido Juda mè ebi ama Jeruselem cha me ere ya ema etitiin̄be me isi ayaya oyet egep Uwu Mbuban Okumugwem, 6 mè iniriaak uriaak ibe: “Jei Okumugwem Awaji ebi nte nte kiji, ìre ìkafat ìre owu ore Awaji òkup me inyọn̄? Îre owu okikpulu otutuuk ido geelek òkup me linyọn̄. Owu omin, mè ikaan̄ unye, kpunu ene geege òbokọt ikeke ida owu. 7 Jei Awaji kiji, ìre ìkare owu orieen̄ ebi ìdadasi iluk me inyọn̄ ijọn̄ yi isan̄a me isi ebi kwun̄ Ijeren, mè inisa ijọn̄ yi ikana inyi bọn kè Ebereyam ogwu unene kwun̄ ire mgbọ geelek? 8 Ebi kwun̄ mîluk me inyọn̄ ijọn̄ yi, mè inama Uwu Mbuban ere ekimin Erieen̄ kwun̄, mè itumu ibe, 9 ‘Mgbọ geelek ùrioon̄ isinu inikeme eji, mè ìre akọn̄ eyi itip-oyerebet, mè ìre ijo orukan̄, mè ìre akan̄, mè eji isinu inikeke me isi kwun̄, me isi Uwu Mbuban keyi, ere ekimin Erieen̄ kwun̄, ito ito igwen owu me emen ufialek kiji, ke owu mônọ eji ida, mè inyan̄a eji isibi.’

10 “Ire, mgbọ keyi, kpọ-nu ebi Amọn, mè ebi Mowabu, mè ebi ogoon̄ Seya, ebi owu okachieekge ibe ebi Ijeren etim akọn̄ me lek me mgbọ ebi Ijeren ekinan̄a me Ijipiti isibi, sa me ikeya, ebi Ijeren ejeje inan̄a me lek kiban̄, kpejijaka ema. 11 Mgbọ keyi, kpọ ubọk ife chi ebenisa ijo inu ikpe eji me lek ata inu eji erọbe! Kpọ ubọk ema enube ibenirieen̄ eji isan̄a me lek ìrot kiji eyi owu onyibe eji! 12 Jei Awaji kiji, ìre owu òkpofat isibi ema oyerebet me ibot? Mije, eji kpekaan̄ unye geege isasa ikọt ikeke ida urum ife chi ìwawa ikeyi, ebi ìsasa akọn̄ inu ibenitim me lek kiji. Eji kperọriọọn̄ si inu eji eberọ. Otutuuk chieen̄ kiji ìkup me lek kwun̄.”

13 Otutuuk ebi Juda mè ebi nwa kiban̄ mè bọn kiban̄ melek asasa nsabọn kiban̄ ekpọkpọ ikeke ikeya me isi Okumugwem.

14 Ekwukwu Okumugwem oneninin̄ emen kè Jayajien gwun̄ kè Jekaraya, gwun̄ kè Benaya, gwun̄ kè Jeyien, gwun̄ kè Mataniya, ogwu otoko kè Libai, ogwu owot iman kè Asafu, me etete ogbogbo ebi ene cha.

15 Jayajien onenitumu ibe: “Ogwu ubọọn̄ Jiosefat, mè otutuuk ebi Juda mè ebi ìluk me Jeruselem, ìgban̄ utọn̄! Okumugwem ìkitumu inyi enyi ibe ikeyi: ‘Ikatet ukpook, ikasisik ejit mije urum ebi akọn̄ chi ìwawa enenen, mije, akọn̄ yi ìkakup ìnyi enyi, ìkup inyi Awaji. 16 Iyakwut, ìjibi akọn̄ ìsibi ìsi ìkweek ema. Ema ebeje inene me utibi ogoon̄ òkup me udun̄ ama Jiji. Enyi mêmun̄ ema me ibot iteke ijọn̄ òkup me emen èwê Jeruwen. 17 Ìkare enyi ebetim akọn̄ keyi. Ìmọnọ irek kinyi, mè ìkeke ìnye, mè ìkpọ unyan̄a Okumugwem obonyan̄a enyi isibi, enyi ebi Juda mè ebi ama Jeruselem. Ikatet ukpook, ikasisik ejit! Iyakwut, ìje ìsibi ìsi ìchichini ema. Okumugwem òwa melek kinyi.’ ”

18 Jiosefat ogegele igwook, mè ikana isi ichit me ijọn̄. Otutuuk ebi Juda mè ebi ama Jeruselem enanan̄a irọn̄ me ijọn̄ si, mè itọbọ ebum inyi Okumugwem. 19 Usini ebi otoko kè Libai ebi owot iman kè Koyat mè ebi owot iman kè Kora enanan̄a ikeke, mè ibene ikitọn̄ Okumugwem, Awaji ebi Ijeren me atalek unye ida.

20 Me ofit iwele kan̄, me ata otu ewelegwe, ema enanan̄a ije ikisi emen èwê Tekowa. Sabum ema enije, Jiosefat okekeke, mè itumu inyi ema ibe, “Enyi ebi Juda mè ebi ama Jeruselem, ìgban̄ utọn̄! Ìkaan̄ ichechieek me lek Okumugwem Awaji kinyi, ke ọmọ môbene enyi igwuun̄. Ìkaan̄ si ichechieek me lek ebi nriran kan̄, ke inu môje ijaan̄ enyi me lek.” 21 Jiosefat melek ebi ife cha enenitọt otitọt. Mgbọ etọtbe isan̄a, inenigobo ebi ìbekọt okwa itọn̄ Okumugwem, mije, ọmọ îkup mbuban me oniin̄ òkup òrirọ òrirọ. Ema ekekidimi okwa ikije me isi ebi akọn̄ ikibe:

22 Ike ema ekikọt okwa itọn̄ ya isa ikitọn̄ Okumugwem, Okumugwem otatap wọlọwọlọ me etete ebi akọn̄ Amọn, mè ebi akọn̄ Mowabu, mè ebi akọn̄ ogoon̄ Seya ebi ìjijibi akọn̄ inu ibenitim me Juda, akọn̄ orerie ife cha. 23 Ebi akọn̄ Amọn mè ebi akọn̄ Mowabu egbagbaan̄ ubọk itim akọn̄ me lek ebi akọn̄ ogoon̄ Seya, mè ikpan̄ ema isan̄a kpai, ene geege ìkasik. Mgbọ ekpan̄be ebi akọn̄ ogoon̄ Seya isan̄a, ema agan̄ iba cha enikana isi ida lek kiban̄, mè ikpan̄ si lek kiban̄ isan̄a kpai.

24 Mgbọ ebi Juda ejebe inire ere ema mêkọtbe ibene chieen̄ imun̄ ikpele urum akọn̄ ebi ochicha kiban̄ cha me emen èwê, ema eyaka inimun̄ gaalek nkwukwu ene nkwukwu ene elilambe ichit otutuuk inyọn̄ ijọn̄ ere ya. Kubọk ene geege ikeyi, ìkanwọnọ. 25 Jiosefat mè ebi melek kan̄ enunu ibenifum inu me oyet akọn̄ ya, mè inimun̄ ogbogbo inu, melek nkwukwu ene, mè inu unye otu ewe, mè ibene ikikpulu isa ifon. Inu mfum cha îwa enenen igak ema ikpukpulu. Ema esa otuuk kè usen ita ikpulu inu mfum cha, mije inu cha owabe enenen. 26 Me òso usen ini, ema enenigbaan̄ ititiin̄ me iteke Beraka, mè ikup me ere ya ikitọn̄ Okumugwem. Îre mije keyi ke ekigwen ere ya iteke Beraka^a mege inire cherekeyi.

27 Otutuuk ebi Juda mè ebi ama Jeruselem enenigwu ikom ikiwulu òkô ika inu Jeruselem, Jiosefat okekije me isi kiban̄. Ema otutuuk ekekinwọọn̄ unwọọn̄, mije, Okumugwem îrọ inyi ema enwọọn̄ unwọọn̄ me ibot ebi ochicha kiban̄. 28 Ema ininin̄ Jeruselem, eraraka isi yaage ifo Uwu Mbuban Okumugwem, mè ikikwak uneen̄ ile mè uneen̄ olik ita, mè ikiwut otita isa ikinwọọn̄ unwọọn̄.

29 Ukpook Awaji oninin̄ ijot emen ebi mkpulu ebi ofifi ido cha geelek mgbọ ema enọbe ibe Okumugwem îtim akọn̄ me lek ebi ochicha ebi Ijeren. 30 Sa me ikeyi, mkpulu kè Jiosefat okukup me esuuk, mije, Awaji kan̄ înyi ọmọ utelelek me agan̄ geelek.

31 Ikeya ke Jiosefat osa ikpulu Juda. Jiosefat ìre akọp acha ita mè go mgbọ îkanabe ogwu ubọọn̄, mè ikup me Jeruselem ikpulu akọp acha iba mè go. Erieen̄ ogwu uga ìre Ajuba, gwun̄ kè Siliyi. 32 Jiosefat ìje me akpat ukot ogwu ute Asa, ìkatele mgbọ geege. Sa me ikeya, îrọ inu òtatat me chieen̄ Okumugwem. 33 Ire, ìkagbugbọ isi-ijọn̄ cha. Ebi ene kpesa si otutuuk ejit kiban̄ inyi Okumugwem Awaji ebi nte nte kiban̄.

34 Otutuuk ofifi inu òrọrọ me ukot mkpulu kè Jiosefat, bene me ibebene si re òta, egege otutuuk iso me emen ikpa mfufuk kè Jewu gwun̄ kè Anani, echi îgebe me emen ikpa mfufuk ebi ubọọn̄ Ijeren.

35 Ike mgbọ okije, Jiosefat ogwu ubọọn̄ Juda oneninin̄ unene melek kè Ayajaya ogwu ubọọn̄ Ijeren, ogwu òkirọ inu ikpak, 36 mè igọọk igbaan̄ itọt inanama owuwa uji ile ebekisa isi ewe me Tasis. Ema mînama si uji ile cha me Esiọn Geberi. 37 Elieja gwun̄ kè Dodabayu ogwu Maresa oneniben nriran ikeme Jiosefat ibe, “Mije owu onin̄be unene melek kè Ayajaya, Okumugwem môjijaka inu geelek owu orọbe.” Uji ile cha okpukpukpuku igwook, kpeyaka ikọt ikọp isi ewe me Tasis.