Jeyoram îkana ogwu ubọọn̄ Juda
21
Jiosefat onenikwu ifo igọọk ebi nte nte kan̄, ebeben ifuun̄ me ere efuun̄be ebi nte nte kan̄ me ama kè Debit. Jeyoram ogwu gwun̄ onenikana ubọọn̄ me irek kan̄. 2 Ebi ngwan̄ kè Jeyoram gwun̄ kè Jiosefat ìre Ajariya, mè Jeyen, mè Jekaraya, mè Ajariayu, mè Maiken, mè Sefatiya. Ebibi otutuuk ere bọn kè Jiosefat ogwu ubọọn̄ Juda.a 3 Jiosefat înyi ema owuwa inu alata okuket mè alata araran̄, mè owuwa inu unye otu ewe, mè inyi ema si ama mgban akọn̄ cha òkup me Juda, inyi ema ere ebi ibot me ama cha ge ge. Ire, mkpulu ido Juda ke îyaka itap me ubọk kè Jeyoram, mije, ọmọ ore adasi gwun̄ enerieen̄ kan̄.4 Jeyoram onenibọkọ irek mkpulu ogwu ute ikikpulu. Mgbọ îtetbe irek mkpulu ya ikaan̄ inye, isasa oge akọn̄ ikpan̄ otutuuk ebi ngwan̄ isan̄a, mè ikpan̄ si usini ebi ibot mkpulu Ijeren igbaalek. 5 Jeyoram ìre akọp acha ita mè iba mgbọ îkanabe ogwu ubọọn̄, mè ikup me Jeruselem ikpulu acha jeeta. 6 Jeyoram îrọ ijo ugwem yaage ebi ubọọn̄ Ijeren erọbe, kubọk ebi uwu kè Eyabu erọbe, mije, gwun̄ enenwaan̄ kè Eyabu ore nwa kan̄. Îrọ ijo inu me chieen̄ Okumugwem. 7 Ire, Okumugwem ìkaweek ijijijaka uwu kè Debit, mije inyan̄a-ibot înyan̄abe melek kè Debit, mè itumu ibe ke ọmọ môrọ inyi otitọn̄ eyi mkpulu kè Debit melek ebi owot iman kan̄ ibia ire mgbọ geelek.
8 Me ukot kè Jeyoram ke ebi ido Edọm efieek inan̄a me irak mkpulu ido Juda, mè inito ubọọn̄ eyi kiban̄. 9 Jeyoram osasa ebi ibot akọn̄ kan̄ melek otutuuk uji akọn̄ kan̄ igbaalek ijibi akọn̄ isi ere ya. Ebi Edọm ererieen̄ akọn̄ ikana ọmọ melek ebi ibot uji akọn̄ kan̄ okokop. Me eririeen̄, ema ejijibi akọn̄ inin̄ lek ebi Edọm, mè ibum itibi orieen̄ akọn̄ kiban̄, mè ilibi ifon. 10 Sa me ikeya ke Edọm obum isibi me irak ubọk ebi Juda mege inire cherekeyi.
Emen mgbọ ya si ke ama Libina obum si isibi me irak ubọk ebi Juda, mije Jeyoram otelebe Okumugwem Awaji ebi nte nte kan̄. 11 Jeyoram înama si isi-ijọn̄ me inyọn̄ ogoon̄ cha òkup me Juda, mè isa me ikeya irọ ibe ebi Jeruselem eketọbọ ebum enyi mkpọmfaka, mè irọ si ibe ebi ido Juda eje elọ.
12 Jeyoram onenibọkọ ikpa etip ònan̄a me ubọk kè Ilaija ogwu nriran eyi òkitumu ibe:
“Okumugwem Awaji kè Debit nte kwun̄ ìtumu ibe ikeyi: ‘Owu òkaluk ugwem kubọk nte kwun̄ Jiosefat olukbe, mè ìre ubọk Asa ogwu ubọọn̄ Juda olukbe. 13 Kpan̄asi ikeya, owu òyaka ikirọ ijo ugwem yaage ebi ubọọn̄ Ijeren erọbe, mè irọ inyi ebi Juda mè ebi Jeruselem ekana egọọk ebi kè ofifi awaji kubọk ebi uwu kè Eyabu erọbe. Ògak ge, ebi ngwan̄ kwun̄, ìrere ebi uwu nte kwun̄, ebi ìnwọnwọn igak owu, owu otet ikpan̄. 14 Eya orọ, Okumugwem mônisulu ebi ido kwun̄ ikpele osusut, mè isulu si bọn kwun̄, mè ebi nwa kwun̄, mè otutuuk inu geelek okaan̄be. 15 Owu me lek kwun̄, owu môbene ikifiak ikpele ijo orukan̄ owot eyi ìkakita, eyi òbokininọọn̄ owu usen geelek, mege nkat kwun̄ môgbukube isibi.’ ”
16 Okumugwem onenirọ inyi ebi Filisia mè ebi Arabu ebi ìluluk igbet Etiopia enetim akọn̄ me lek kè Jeyoram. 17 Ema ejijibi akọn̄ initim me Juda, mè ibum inin̄, mè ifum inu geelek emun̄be me uwu ogwu ubọọn̄, mè ikpulu ebi bọn ebirieen̄ mè ebi nwa igbaalek. Gwun̄ kan̄ geege ìkasik ìnyi ọmọ, ilọ me lek kè Jeyowayajib ogwu òrere ijija ichit.
18 Mgbọ eya orakabe, Okumugwem oraria ijo orukan̄ owot eyi kpekikọt igwa itap me owot kè Jeyoram. 19 Orukan̄ ya okpọkpọ ikifieek inyi isi. Me òta òso acha iba, nkat kè Jeyoram ogbugbuku isibi, ikwukwu melek ikpele unaan̄. Ebi ido kan̄ kpesọk ukan̄ inyi ọmọ isasa irọ mkpa kan̄ imin, kubọk erọbe inyi ebi nte nte kan̄.
20 Jeyoram ìre akọp acha ita mè iba mgbọ îkanabe ubọọn̄, mè ikup me Jeruselem ikpulu acha jeeta, mè ikwu. Kpunu ene geege òtoto ito mkpa kan̄. Ebeben ifuun̄ me ama kè Debit, ire, kpefuun̄ ọmọ me ere ekifuun̄ ebi ubọọn̄.