Ejikaya îkana ogwu ubọọn̄ Juda
29
Ejikaya ìre akọp acha iba mè go mgbọ îkanabe ogwu ubọọn̄, mè ikup me Jeruselem ikpulu akọp acha iba mè onaan̄ge. Erieen̄ ogwu uga ìre Abija gwun̄ kè Jekaraya. 2 Ejikaya îrọ inu òtatat me chieen̄ Okumugwem, kubọk Debit ogwu ute ukot ikaan̄ orọbe.Mîgwọk lek Uwu Mbuban
3 Me adasi onyan̄ me adasi acha me mkpulu kè Ejikaya, Ejikaya ochichili otutuuk isotu òkup me lek Uwu Mbuban Okumugwem cha, mè irọ ikwaan̄ me lek inen̄e isun̄. 4 Ejikaya onenigwen ebi ngwugwa mè ebi otoko kè Libai ititiin̄ me oyet egep òkup me agan̄ mbum-ura me Uwu Mbuban, 5 mè inibe ema, “Mgbọ keyi, ìgban̄ utọn̄, enyi ebi otoko kè Libai! Ìgwọk lek kinyi, mè ìgwọk si lek Uwu Mbuban Okumugwem Awaji ebi nte nte kinyi, mè ìsan̄a otutuuk òchichaka inu geelek ìsibi me emen. 6 Ebi nte nte kiji kpegbe utoon̄-ejit. Ema mîrọ ijo inu me chieen̄ Okumugwem Awaji kiji, mè ijit ọmọ itele, mè iyaak Uwu Mbuban Okumugwem, mè igba udun̄ ifit ọmọ. 7 Ema etatap akpo igon otutuuk afọn̄ isotu irak oyet Uwu Mbuban, mè igon otutuuk ikam, mè iwut otutuuk otitọn̄ òkup me Uwu Mbuban iniin̄. Kpeyaka ikiwọp nsensi, kpeyaka ikigwagwa si ngwugwa ewọwọp iriọk me ere mbuban inyi Awaji ebi Ijeren. 8 Eya orọ, Okumugwem onanaan̄ ejit enenen ikeme ebi Juda mè ebi ama Jeruselem, mè irọ ema ekana inu ukpook, mè inu urimi, mè inu ochak, kubọk enyi esabe chieen̄ kinyi imun̄. 9 Mije keya, ebi nte nte kiji mîkwaan̄ me otu oge akọn̄, mîkpulu bọn ebirieen̄ kiji mè bọn ebibaan̄ kiji mè ebi nwa kiji me usun̄ akọn̄ isa ifon. 10 Mgbọ keyi, ntumu ifieek ibe ke eji mênyan̄a ibot melek Okumugwem, Awaji ebi Ijeren, inyi iben uga unaan̄-ejit kan̄ isan̄a eji me lek. 11 Mgbọ keyi, bọn n̄a, ikayaka ìwuwele, mije, îre enyi ke Okumugwem ogobo inyi lek kan̄ ibe enekeke me isi kan̄ ekesi ikwaan̄ enyi ọmọ, mè ekegwa ngwugwa enyi ọmọ, mè ekewọp si nsensi enyi ọmọ”
12 Mgbọ Ejikaya otumube ikọ kan̄ isan̄a, ebi otoko kè Libai kechi ebebene ikwaan̄ mgbọ yaage:
me owot iman kè Koyat:
Mayat, gwun̄ kè Amasai, mè Juwen gwun̄ kè Ajariya;
me owot iman kè Merari:
Kis gwun̄ kè Abidi, mè Ajariya gwun̄ kè Jeyalelen;
me owot iman kè Gasiọn:
Jowa gwun̄ kè Jima, mè Eden gwun̄ kè Jowa;
13 me owot iman kè Elisafan:
Simiri mè Jeyien;
me owot iman kè Asafu:
Jekaraya mè Mataniya;
14 me owot iman kè Eyiman:
Jeyen mè Simei;
me owot iman kè Jedutun:
Semaya mè Ujiyen.
15 Ema enenititiin̄ ebi ngwan̄ kiban̄, mè inigwọk lek kiban̄, mè inu inigwọk lek Uwu Mbuban Okumugwem ike ogwu ubọọn̄ onyibe ida, igọọk me lek nteme Okumugwem. 16 Ebi ngwugwa eninin̄ isi igwọk lek Uwu Mbuban Okumugwem me agan̄ emen. Ema esasan̄a otutuuk òchichaka inu geelek ema emun̄be me emen Uwu Mbuban Okumugwem isibi inigwook me eden̄ oyet egep Uwu Mbuban Okumugwem. Ebi ngwugwa enenikpulu otutuuk isa inan̄a isibi isi igwook me iteke Kidọrọn. 17 Ebi ngwugwa ebene mfaka igwọk lek ya me adasi usen me adasi onyan̄, mè inire irak oyet Uwu Mbuban Okumugwem me òso usen jeeta me onyan̄ ya, mè isa ofifi usen jeeta igwọk lek emen Uwu Mbuban Okumugwem me lek kan̄. Me òso akọp mè usen gweregwen eyi adasi onyan̄ ya, ema erọrọ ikwaan̄ ya isan̄a.
18 Ema enenisi ikpa inyi ogwu ubọọn̄ Ejikaya ibe, “Eji mîgwọk lek otutuuk emen Uwu Mbuban Okumugwem, mè igwọk lek ntook ngwugwa ewọwọp iriọk melek otutuuk nroon̄ ikwaan̄ òje me lek, mè igwọk si lek ikasi ekitoon̄ fituru mbuban melek otutuuk nroon̄ ikwaan̄ òje me lek. 19 Otutuuk nroon̄ ikwaan̄ echi ogwu ubọọn̄ Ayaji okpulube isibi me Uwu Mbuban Okumugwem mgbọ îrebe ubọọn̄ mè ikpaka ibot inyi Awaji, eji mînen̄e otutuuk isun̄, mè igwọk lek. Ema ekup me isi ntook Okumugwem mgbọ keyi.”
20 Me ata otu ewelegwe ofit iwele kan̄, ogwu ubọọn̄ Ejikaya otititiin̄ ebi ibot ikwaan̄ mkpulu ama, mè inisa ema igbaalek ije isi emen Uwu Mbuban Okumugwem. 21 Ema esasa eriembuuk jaaba, mè orie arọọn̄ jaaba, mè orie bọn arọọn̄ jaaba, mè orie ebot jaaba, igbaalek inu ibesa inigwa ngwugwa ijo inu me ibot mkpulu, mè ibot Uwu Mbuban, mè ibot ebi Juda. Ogwu ubọọn̄ oneninyi ebi owot iman kè Erọn ebi ngwugwa ida ibe esa anam cha egwa ngwugwa me inyọn̄ ntook Okumugwem. 22 Enenigwu eriembuuk cha, ebi ngwugwa enenisa eje anam cha inyan me lek ntook. Enenigwu si orie arọọn̄ cha, mè isa eje kiban̄ inyan me lek ntook ngwugwa, mè inigwu orie bọn arọọn̄ cha, mè isa si eje kiban̄ inyan me lek ntook ngwugwa. 23 Enenisa ebot cha ebesa igwa ngwugwa ijo inu inu me isi ogwu ubọọn̄ mè otutuuk ebi ido, ema etotoon̄ ubọk kiban̄ me lek. 24 Ebi ngwugwa egwugwu ebot cha, mè isa eje kiban̄ igwa ngwugwa ijo inu me inyọn̄ ntook isa irọ esuuk me ibot otutuuk ebi Ijeren, mije, îre me ibot otutuuk ebi Ijeren ke ogwu ubọọn̄ onyi ida ibe egwa ngwugwa ewọwọp iriọk melek ngwugwa ijo inu.
25 Ogwu ubọọn̄ onenito ebi otoko kè Libai me irek ikwaan̄ kiban̄ me emen Uwu Mbuban Okumugwem, mè itaak ema mkpamkpa mè uneen̄ ile mè uneen̄ ija me ubọk igọọk me ike ogwu ubọọn̄ Debit melek Gadi ogwu òmọọn̄ inu melek Netan ogwu nriran enyibe ida igọọk me ida Okumugwem onyibe inan̄a me otu ebi nriran kan̄. 26 Ebi otoko kè Libai enenikeke melek nkwukwak kè Debit me ubọk, ebi ngwugwa si ekekeke melek otita me ubọk.
27 Ejikaya oneninyi ida ibe egwa ngwugwa ewọwọp iriọk me inyọn̄ ntook. Mgbọ yaage ebenebe ikigwa ngwugwa ya, ebebene ikikọt okwa inyi Okumugwem, mè ikisa otita melek otutuuk nroon̄ ifit kè Debit ogwu ubọọn̄ Ijeren ikikwak itap me lek. 28 Otutuuk ebi ene egegele igwook me ijọn̄ ikitọbọ ebum inyi Awaji. Ebi ìkọt okwa ekekikọt, ebi ìwut otita ekekiwut. Ikeyi ke ema otutuuk erọ mege ire mgbọ egwabe otutuuk ngwugwa cha isan̄a.
29 Mgbọ egwabe ngwugwa chi isan̄a, ogwu ubọọn̄ mè otutuuk ebi ìkup me ere ya melek kan̄ egwogwook ekpe me ijọn̄, mè itọbọ ebum inyi Okumugwem. 30 Ogwu ubọọn̄ Ejikaya mè ebi ibot ikwaan̄ kan̄ eneninyi ebi otoko kè Libai ida ibe esa ikọ okwa kè Debit mè echi kè Asafu ogwu òmọọn̄ inu etọn̄ Okumugwem. Ema esasa me ubelejit ikikọt okwa itọn̄ Okumugwem, mè ikitọbọ ibot me ijọn̄, mè ikitọbọ ebum inyi ọmọ.
31 Ejikaya onenitumu inyi ebi ene ibe, “Mgbọ keyi, enyi mîra ifaka lek kinyi itap me ubọk Okumugwem. Eya orọ, ìsa ngwugwa kinyi melek inyinyi kinyi ìnu me Uwu Mbuban Okumugwem.” Otutuuk ebi ene esasa ngwugwa kiban̄ mè inyinyi kiban̄ inu. Ebi ejit kiban̄ otọbe inyi esasa ngwugwa ewọwọp iriọk inu.
32 Otu ifuk anam ngwugwa ebi ene esabe inu ibe esa egwa ngwugwa ewọwọp iriọk orere akọp eriembuuk jaaba, mè efit orie arọọn̄, mè efit orie bọn arọọn̄ iba. Otutuuk anam chi ke ema esa inu ibe esa egwa ngwugwa ewọwọp iriọk enyi Okumugwem. 33 Otu ifuk anam egbamabe lek isa igwa ngwugwa ìre efit orie eriembuuk gweregwen, mè arọọn̄ mè ebot obop ita. 34 Ire, ebi ngwugwa kpewa, eya orọ ema kpekọt inyiaan̄ ikpa me lek otutuuk anam ngwugwa ewọwọp iriọk cha. Mije keya, ebi ngwan̄ kiban̄, ebi otoko kè Libai, enenitap ubọk inyi ema mege erọbe ikwaan̄ ya isan̄a. Ema mîtap ubọk mege ire mgbọ ebi ngwugwa kechilọ egwọkbe lek isan̄a, mije, ebi otoko kè Libai mîgwat lek igwọk lek kiban̄ igak ebi ngwugwa. 35 Ngwugwa ewọwọp iriọk îwa enenen me usen ya, igbaalek okpọn̄ ekisa igwa ngwugwa esuuk, melek ngwugwa miin̄ egwogwook òje melek ngwugwa ewọwọp iriọk.