Ayaji îkana ogwu ubọọn̄ Juda
28
Ayaji ìre akọp acha iba mgbọ îkanabe ogwu ubọọn̄, mè ikup me Jeruselem ikpulu akọp mè acha gweregwen. Ire, ìkarọ inu òtatat me chieen̄ Okumugwem Awaji kan̄ kubọk ogwu ute Debit orọbe. 2 Ayaji îrọ ijo ugwem yaage ebi ubọọn̄ Ijeren erọbe, mè irọ si ebi kè mkpọmfaka inyi Baali. 3 Ayaji îwọp ngwugwa me iteke Ben Inọm, mè isa ebi bọn inyi ibe ewọp me ukan̄ esa egwa ngwugwa, igọọk me lek òchichaka inu cha ebi ofifi ido ekirọ, eyi òrọrọ Okumugwem orieen̄be ife cha isibi me ijọn̄ kiban̄ mgbọ ebi Ijeren ekinu. 4 Ayaji îgwa ngwugwa, mè iwọp nsensi me isi-ijọn̄ cha, mè inyọn̄ orioon̄, mè irak uti ile geelek òsasan otu agọọk.5 Eya orọ, Okumugwem Awaji kan̄ okakana ọmọ itap me ubọk ogwu ubọọn̄ Aram. Ebi akọn̄ Aram etitim akọn̄ ikpan̄ ọmọ, mè ikpulu owuwa ebi ene me usun̄ akọn̄ isa ifo ama Damasikọs.
Okumugwem îkana ọmọ itap si me ubọk ogwu ubọọn̄ Ijeren, Peka gwun̄ kè Remaliya, okpakpan̄ ebi kan̄ igwook nsebe nsebe. 6 Me usen ge gaalek, Peka gwun̄ kè Remaliya, ogwu ubọọn̄ Ijeren, ìkpan̄ ebi akọn̄ Juda efit obop mè akọp obop iba, otutuuk kiban̄ ebi ìriọọn̄ ukot akọn̄, mije ebi Juda etelebe Okumugwem Awaji ebi nte nte kiban̄. 7 Me emen akọn̄ ya, Jikiri ogwu usọ akọn̄ Iferem okpakpan̄ Maseya gwun̄ ogwu ubọọn̄, mè Ajirikam ogwu ibot ikwaan̄ uwu ogwu ubọọn̄, mè Elikana ogwu òso iba me irek mkpulu igọọk ogwu ubọọn̄. 8 Ebi Ijeren ekpukpulu ebi ngwan̄ kiban̄ efit obop ene iba, mè ebibaan̄ mè nsabọn ebirieen̄ mè nsabọn ebibaan̄, me usun̄ akọn̄. Ema mîfum si ogbogbo inu igbaalek, mè isa ifo Sameria.
9 Ire, îkaan̄ ogwu nriran Okumugwem ge me ama ya ogwu ekigwen Odedi. Mgbọ ebi akọn̄ Sameria ekika, ogwu nriran ya onanan̄a ije isi ikweek ema, mè itumu inyi ema ibe, “Okumugwem, Awaji ebi nte nte kinyi ìsa mije unaan̄-ejit ikana ebi Juda itap enyi me ubọk ibe enyi etim ekpan̄. Ire, enyi mîyaka isa me ijo ejit ikpan̄ ema nsebe nsebe, ire lek, ito kiban̄ orebe emen inyọn̄. 10 Mgbọ keyi, enyi eben me ejit isasa ebi ido Juda mè ebi ama Jeruselem, ebirieen̄ mè ebibaan̄, irọ usun̄ inyi lek kinyi. Sà enyi me lek kinyi ye? Ìre awọ ìkafat ìtet enyi si me isi Okumugwem Awaji kinyi? 11 Ìgban̄ utọn̄! Ìjuuk ebi ngwan̄ kinyi cha ebi enyi ekpulube me usun̄ akọn̄ ìtele, inyi egwu ekom efon, mije, uyok uyok unaan̄-ejit Okumugwem òwa me lek kinyi.”
12 Usini ebi ibot otoko kè Iferem, Ajariya gwun̄ kè Jeyoyanan, mè Berekaya gwun̄ kè Mesilemot, mè Jeyijikaya gwun̄ kè Salum, mè Amasa gwun̄ kè Adilai, enanan̄a ikeke, mè ikigugọlọ melek ebi ìnan̄a me isi akọn̄ ika cha, 13 mè itumu inyi ema ibe, “Ikalululuk ìsa ebi usun̄ akọn̄ cha ìnu me ere yi, ke awọ òwa me ibot kiji me isi Okumugwem. Ìre enyi ebesa ofifi ijo inu iyaka inisọkọ me lek echi eji ewuukbe lek irọ? Awọ òkup me ibot kiji îmin enenen. Eya orọ, uyok uyok unaan̄-ejit Okumugwem òwa me ibot ebi Ijeren.”
14 Ebi akọn̄ cha enenitele ebi usun̄ akọn̄ cha melek otutuuk inu cha ema efumbe me akọn̄ me isi ebi ibot mkpulu cha mè isi otutuuk ebi ene. 15 Ebirieen̄ ini cha ebakbe erieen̄ enenikpulu ebi usun̄ akọn̄ cha, mè iteen̄ ofọnti me lek inu mfum cha inyi ebi ìje ukpọk lek ibe etap. Mînyi ema ofọnti, mè ikpukot, mè inorie, mè miin̄, mè iken ema aran̄ me chieen̄ unan kiban̄. Enenitoon̄ ebi kpeyaka ikaan̄ efuuk me inyọn̄ inyinya akpan, mè inisa ema otutuuk ije iban isi ire Jeriko, ama asaak asaak, inyi efon egọọk ebi kiban̄. Ema me lek kiban̄ enenigwu ikom me Jeriko ifo Sameria.
16 Me emen mgbọ ya, ogwu ubọọn̄ Ayaji oneniria etip ijet ogwu ubọọn̄ Asiria ibe initap ubọk inyi ọmọ. 17 Ebi Edọm ekpọkpọk inu initim akọn̄ me Juda, mè ikpulu ebi ene me usun̄ akọn̄ isa ifo. 18 Me ike mgbọ yaage si, ebi Filisia ejijibi akọn̄ inin̄ owuwa ama òkup me lek orioon̄ ebon ogoon̄, mè emen èwê agan̄ osiki Juda, mè ibọkọ ama Bet Semes, mè Ajalọn, mè Gederot, mè Soko melek asabọn ama òkup ikana, mè Timina melek asabọn ama òkup ikana, mè Gimijo melek asabọn ama òkup ikana, mè iluk ibia me otutuuk ere cha. 19 Awaji ìsulu ebi Juda osusut bak me lek kè Ayaji ogwu ubọọn̄ Juda,a mije, Ayaji îkpaka ibot enenen inyi Okumugwem, ìkakọt si ìgban ebi Juda ibe ekayaka ìrọ ijo inu ema ekirọ. 20 Tigilat-Pilesa ogwu ubọọn̄ Asiria onunu me lek kè Ayaji, ire, ìkatap ubọk ìnyi Ayaji. Kpan̄asi ikeya, ìyaka initatap Ayaji ufialek me lek. 21 Ayaji okpukpulu inu me emen Uwu Mbuban Okumugwem mè uwu ogwu ubọọn̄, mè ibọkọ inu me ubọk ebi ibot mkpulu Ijeren igbaalek, isa iche inyi ogwu ubọọn̄ Asiria ya. Ire, echicha ìkatap ubọk geege ìnyi ọmọ.
22 Mgbọ otutuuk ufialek chi okikeme Ayaji, mgbọ keya ke Ayaji okpọkpọ itet ejit inye ikije ikeme Okumugwem igak adasi mgbọ. 23 Îkigwa ngwugwa inyi awaji ebi Damasikọs cha ebi mgbọ ìtitim akọn̄ ikpan̄ ọmọ, mije, ìkikeek ibe, “Îre ebi kè awaji ebi Aram ekitap ubọk inyi ebi Aram. Eya orọ, mâkigwa ngwugwa inyi awaji cha, inyi ema eketap si ubọk enyi emi.” Ire, awaji cha enenikana inu òrọrọ inyi ọmọ inan̄a irọn̄, mè irọ si inyi otutuuk ido Ijeren inan̄a irọn̄.
24 Ayaji otitiin̄ otutuuk nroon̄ ikwaan̄ òkup me Uwu Mbuban Awaji, mè itọọn̄ ema ibak isan̄a, mè igon otutuuk isotu òkup me lek Uwu Mbuban Okumugwem ikam, mè ininama ntook esese awaji inyi lek kan̄ me otutuuk ntutun̄ ere geelek me Jeruselem. 25 Înama isi-ijọn̄ me otutuuk ama geelek me Juda, ere ebekiwọp ngwugwa inyi ebi kè ofifi awaji, mè isa me ikeya irọ ibe Okumugwem Awaji ebi nte nte kan̄ inaan̄ ejit enenen.
26 Otutuuk ofifi inu òrọrọ me ukot mkpulu kè Ayaji, mè otutuuk ugwem kan̄, bene me ibebene si re òta, mîge otutuuk itap me emen ikpa mfufuk echi ebi ubọọn̄ Juda mè ebi ubọọn̄ Ijeren. 27 Ayaji onenikwu ifo igọọk ebi nte nte kan̄, ebeben ifuun̄ me ama Jeruselem. Ire, kpefuun̄ ọmọ me ere ekifuun̄ ebi ubọọn̄ Ijeren. Ejikaya ogwu gwun̄ onenikana ubọọn̄ me irek kan̄.