Ayaji îkana ogwu ubọọn̄ Juda
16
Me òso akọp acha go mè iba me lek mkpulu kè Peka gwun̄ kè Remaliya ogwu ubọọn̄ Ijeren, Ayaji gwun̄ kè Jotam onenikana ogwu ubọọn̄ Juda. 2 Ayaji ìre akọp acha iba mgbọ îkanabe ogwu ubọọn̄, mè ikup me Jeruselem ikpulu akọp mè acha gweregwen. Ire, ìkarọ inu òtatat me chieen̄ Okumugwem Awaji kan̄ kubọk ogwu ute Debit orọbe. 3 Îrọ ijo ugwem yaage ebi ubọọn̄ Ijeren erọbe. Ògak ge, îwọp ogwu gwun̄ enerieen̄ me ukan̄ isa igwa ngwugwa inyi mkpọmfaka igọọk me lek mbuban orọmijọn̄ ebi ofifi ido cha ebi Okumugwem orieen̄be isan̄a me lek ijọn̄ ya mgbọ ebi Ijeren ekinu. 4 Îkisi igwa ngwugwa, mè ikiwọp si nsensi me isi-ijọn̄ cha, mè inyọn̄ orioon̄ geelek, mè irak agọọk uti geelek òsasan agọọk.5 Rejin ogwu ubọọn̄ Aram mè Peka gwun̄ kè Remaliya ogwu ubọọn̄ Ijeren enenijibi akọn̄ inu me lek kè Ayaji me Jeruselem, mè inikpa mbin akọn̄ ikana Ayaji me emen ama Jeruselem. Ire, kpekọt itim ikpan̄ ọmọ. 6 Îre mgbọ ya ke Rejin ogwu ubọọn̄ Aram orieen̄ ebi Juda ìkiluk me Elat isibi, mè inikpọk ibọkọ ama ya inyi Edọm. Ebi Edọm eneninin̄ Elat iluk, mè ibia mege inire cherekeyi.
7 Ayaji oneniria osat isi lek kè Tigilat-Pilesa ogwu ubọọn̄ Asiria, isi itumu inyi ibe ikeyi: “Emi ìre ogwu usun̄ kwun̄, mè ire si gwun̄ kwun̄. Nye lek na nyan̄a emi sibi me ubọk ogwu ubọọn̄ Aram mè ogwu ubọọn̄ Ijeren, ebi ìnunu inikitim emi akọn̄ me lek.” 8 Ayaji okpukpulu alata okuket mè alata araran̄ òkup me Uwu Mbuban Okumugwem mè echi òkup me ere isun̄-inu me uwu ogwu ubọọn̄, mè isa iria ijet ogwu ubọọn̄ Asiria kubọk uche. 9 Ogwu ubọọn̄ Asiria ochechieek inyi, mè inijibi akọn̄ isi Damasikọs, mè ibọkọ, mè ikpulu ebi ama ya me usun̄ akọn̄ ya isa isi igwook me Kiri, mè ikpan̄ ogwu ubọọn̄ Rejin.
10 Ogwu ubọọn̄ Ayaji onenisi Damasikọs isi imun̄ Tigilat-Pilesa ogwu ubọọn̄ Asiria. Me Damasikọs ya, imumun̄ ntook ngwugwa ge îmabe, mè iniria ogugo ntook ya melek nteme ubọk ebesa inama ntook ya ijet Uraya ogwu ngwugwa, mè inyi ida ibe enama. 11 Uraya ogwu ngwugwa oneninama ntook ngwugwa ya igọọk me lek otutuuk ngwugwat cha ogwu ubọọn̄ Ayaji oriabe inan̄a me Damasikọs ijet ọmọ, mè inama isan̄a sabum ogwu ubọọn̄ Ayaji onigwu ikom inan̄a me Damasikọs ika. 12 Mgbọ ogwu ubọọn̄ onan̄abe me Damasikọs ika, mè inimun̄ ntook ya, ijeje inene inyọn̄, 13 mè igwa ngwugwa ewọwọp iriọk kan̄, mè ngwugwa akpa kan̄, mè ngwugwa miin̄ egwogwook kan̄, mè igwook eje anam ngwugwa esuuk kan̄ me inyọn̄ ntook ya. 14 Inenijibi ntook ngwugwa esabe ekwe irọ ya eyi òkup me isi Okumugwem isan̄a me isi Uwu Mbuban, me ere îkupbe me etete ayaya ntook kan̄ ya melek Uwu Mbuban, mè isa isi igwuun̄ me agan̄ inyọn̄ ayaya ntook kan̄ ya. 15 Ogwu ubọọn̄ Ayaji oneninyi Uraya ogwu ngwugwa ida ibe: “Me inyọn̄ ayaya ntook ya, òrere eyi ilile ya, ke owu obokigwa ngwugwa ewọwọp iriọk eyi ewelegwe, mè ngwugwa akpa eyi ikakwun̄, mè ngwugwa ewọwọp iriọk eyi ogwu ubọọn̄ melek ngwugwa akpa òje me lek, mè ngwugwa ewọwọp iriọk eyi otutuuk ebi ido melek ngwugwa akpa òje me lek, melek ngwugwa miin̄ egwogwook òje me lek. Inyọn̄ ayaya ntook yi si ke obokigwook otutuuk eje ngwugwa ewọwọp iriọk mè eje otutuuk ofifi chieen̄ ngwugwa geelek. Ire, ntook ngwugwa eyi ekwe ya ìbokup inyi emi mâsabe ikido nteme.” 16 Uraya ogwu ngwugwa orọrọ otutuuk inu cha ike ogwu ubọọn̄ Ayaji onyibe ọmọ ida.
17 Ogwu ubọọn̄ Ayaji oneniwaka okwukwek òkup me agba owot ngugọọn̄ ekwe echi ogwu ubọọn̄ Solomọn orọbe itap me Uwu Mbuban, mè ibeen̄ si okwa igwọk-lek cha isan̄a me inyọn̄ ngugọọn̄ ekpirikpo cha, mè iwaka si otin̄ ekwe ekigwen Okwaan̄ ya isan̄a me inyọn̄ udun̄ eriembuuk cha esabe ekwe si irom, mè iyaka inisa ewuuk ikike irak. 18 Îgbugbọ ochichit enamabe me emen Uwu Mbuban ere ogwu ubọọn̄ okikweek irek me Usen Mbuban, mè ichit si oniin̄ ogwu ubọọn̄ okije inan̄a me uwu ogwu ubọọn̄ inin̄ emen Uwu Mbuban. Ayaji ìrọ otutuuk inu chi, inyi ogwu ubọọn̄ Asiria ibele ejit me lek kan̄.