5 Eya orọ, Okumugwem osasa orukan̄ inyakpa igwook me lek ogwu ubọọn̄, esasan̄a ọmọ isibi me etete ebi ene isi isun̄ me uwu ge, ọmọ gaalek. Ifafiak orukan̄ ya mege ire usen îkwube. Enenisa Jotam ogwu gwun̄ ito me ibot uwu ogwu ubọọn̄, mè ikana otutuuk ido itap me ubọk, ibe ikikpulu.

6 Otutuuk ofifi inu òrọrọ me ukot mkpulu kè Ajariya, mè otutuuk inu îrọbe, mîge otutuuk itap me emen ikpa mfufuk echi ebi ubọọn̄ Juda. 7 Ajariya onenikwu ifo igọọk ebi nte nte kan̄, ebeben ifuun̄ me ere efuun̄be ebi nte nte kan̄ me ama kè Debit. Jotam ogwu gwun̄ onenikana ubọọn̄ me irek kan̄.

8 Me òso akọp acha ita mè jeeta me lek mkpulu kè Ajariya ogwu ubọọn̄ Juda, Jekaraya gwun̄ kè Jerobuwam onenikana ogwu ubọọn̄ Ijeren me Sameria, mè ikpulu ido Ijeren onyan̄ gweregwen. 9 Jekaraya orọrọ ijo inu me chieen̄ Okumugwem, kubọk ebi nte nte kan̄ erọbe. Ìkasan̄a lek ìsan̄a me lek ijo inu cha Jerobuwam gwun̄ kè Nebat orọbe, eyi îrọbe inyi ebi Ijeren erọ ijo inu.

10 Salum gwun̄ kè Jabes onenito okpin inyi Jekaraya, mè ikpan̄ ọmọ me isi otutuuk ene, mè inikana ubọọn̄ me irek kan̄. 11 Otutuuk ofifi inu òrọrọ me ukot mkpulu kè Jekaraya, mîge otutuuk itap me emen ikpa mfufuk echi ebi ubọọn̄ Ijeren. 12 Sa me ikeyi, ikọ Okumugwem otumube inyi Jewu onenirọ iso. Okumugwem ìtumu inyi Jewu ibe ikeyi: “Ebi owot iman kwun̄ ebekikweek me inyọn̄ ogboon̄ ubọọn̄ Ijeren ikikpulu mege isi ire òso ukot ini.”

13 Salum gwun̄ kè Jabes ìkana ogwu ubọọn̄ Ijeren me òso akọp acha ita mè onaan̄ge me lek mkpulu kè Ujaya^a ogwu ubọọn̄ Juda, mè ikup me Sameria ikpulu onyan̄ ge gaalek. 14 Menayem gwun̄ kè Gadi oneninan̄a me Tirija inu me Sameria, mè inikpan̄ Salum gwun̄ kè Jabes me ere ya, mè inikana ubọọn̄ me irek kan̄.

15 Otutuuk ofifi inu òrọrọ me ukot mkpulu kè Salum, melek ijo otitọt îtọtbe ikeme ene, mîge otutuuk itap me emen ikpa mfufuk echi ebi ubọọn̄ Ijeren.

16 Mgbọ Menayem onan̄abe me Tirija ikije isibi, ebi ama Tifisa kpechieek igwugwuku otunchit ama kiban̄ inyi. Mije keya, ititim akọn̄ me lek ama ya, mè ikpan̄ otutuuk ebi ama ya, mè ichiin̄ owot ebi nwa-owot geelek ibak me emen ama ya, mè ikpan̄ si ebi ìluk me asabọn ama òkukup me emen okike ijọn̄ ama ya.

17 Me òso akọp acha ita mè onaan̄ge me lek mkpulu kè Ajariya ogwu ubọọn̄ Juda, Menayem gwun̄ kè Gadi onenikana ogwu ubọọn̄ Ijeren, mè ikup me Sameria ikpulu akọp acha. 18 Menayem orọrọ ijo inu me chieen̄ Okumugwem. Me otutuuk mkpulu kan̄, ìkasan̄a lek ìsan̄a me lek ijo inu cha Jerobuwam gwun̄ kè Nebat orọbe, eyi îrọbe inyi ebi Ijeren erọ ijo inu.

19 Me ike mgbọ ge, Tigilat-Pilesa^b ogwu ubọọn̄ Asiria onenijibi akọn̄ initim me Ijeren. Menayem osasan̄a akọp obop kilo alata okuket inyi, inyi igọọk ọmọ ikeke, mè ibieen̄ ọmọ inye, mè ekakọt ìsan̄a ọmọ me mkpulu. 20 Menayem ìtetet ebi ene me unye-ubọk ibọkọ ikpoko ya, ene geelek òbọbọọn̄ ubọọn̄ ìtip akọp ikpoko alata okuket go, inyi esa enyi ogwu ubọọn̄ Asiria. Sa me ikeyi, ogwu ubọọn̄ Asiria ogwugwu ikom ifo, ìkayaka ìkup ìtim akọn̄ me ido Ijeren.

21 Otutuuk ofifi inu òrọrọ me ukot mkpulu kè Menayem, mè otutuuk inu îrọbe, mîge otutuuk itap me emen ikpa mfufuk echi ebi ubọọn̄ Ijeren. 22 Menayem onenikwu ifo igọọk ebi nte nte kan̄. Pekaya ogwu gwun̄ onenikana ubọọn̄ me irek kan̄.

23 Me òso akọp acha go me lek mkpulu kè Ajariya ogwu ubọọn̄ Juda, Pekaya gwun̄ kè Menayem onenikana ogwu ubọọn̄ Ijeren, mè ikup me Sameria ikpulu Ijeren acha iba. 24 Pekaya orọrọ ijo inu me chieen̄ Okumugwem. Ìkatele ijo ugwem yaage Jerobuwam gwun̄ kè Nebat orọbe, eyi îrọbe inyi ebi Ijeren erọ ijo inu. 25 Ene ge me lek ebi ibot ikwaan̄ kan̄ ekigwen Peka gwun̄ kè Remaliya, onenito okpin inyi ọmọ, mè inisa akọp ebirieen̄ go, ebi Giliadi, igbaalek kan̄ isi inin̄ emen uwu akọn̄ òkup me lek uwu ogwu ubọọn̄ me Sameria, mè ikpan̄ Pekaya, mè ikpan̄ si Arigobu melek Arie igbaalek. Sa me ikeyi ke Peka okpan̄ Pekaya, mè inikana ubọọn̄ me irek kan̄.

26 Otutuuk ofifi inu òrọrọ me ukot mkpulu kè Pekaya, mè otutuuk inu îrọbe, mîge otutuuk itap me emen ikpa mfufuk echi ebi ubọọn̄ Ijeren.

27 Me òso akọp acha go mè iba me lek mkpulu kè Ajariya ogwu ubọọn̄ Juda, Peka gwun̄ kè Remaliya onenikana ogwu ubọọn̄ Ijeren, mè ikup me Sameria ikpulu Ijeren akọp acha iba. 28 Peka orọrọ ijo inu me chieen̄ Okumugwem. Ìkasan̄a lek me lek ijo inu cha Jerobuwam gwun̄ kè Nebat orọbe, eyi îrọbe inyi ebi Ijeren erọ ijo inu.

29 Îre me ukot kè Peka ogwu ubọọn̄ Ijeren ke Tigilat-Pilesa ogwu ubọọn̄ Asiria okpọk inu initim akọn̄ me Ijeren, mè ibọkọ ama Ijon, mè Aben Bet Maaka, mè Janowa, mè Kedes mè Asọru. Îbọkọ si agan̄ Giliadi mè agan̄ Galili, igbaalek otutuuk ijọn̄ ebi owot iman kè Nafitali, mè ikpulu ebi ama cha me usun̄ akọn̄ isi igwook me Asiria.

30 Osiya gwun̄ kè Ela onenito okpin inyi ogwu ubọọn̄ Peka gwun̄ kè Remaliya, mè itet ikpan̄, mè ikana ubọọn̄ me irek kan̄ me òso akọp acha iba me lek mkpulu kè Jotam gwun̄ kè Ujaya ogwu ubọọn̄ Juda.

31 Otutuuk ofifi inu òrọrọ me ukot mkpulu kè Peka, mè otutuuk inu îrọbe, mîge otutuuk itap me emen ikpa mfufuk echi ebi ubọọn̄ Ijeren.

32 Me òso acha iba me lek mkpulu kè Peka gwun̄ kè Remaliya ogwu ubọọn̄ Ijeren, Jotam gwun̄ kè Ujaya onenikana ogwu ubọọn̄ Juda. 33 Jotam ìre akọp acha iba mè go mgbọ îkanabe ogwu ubọọn̄, mè ikup me Jeruselem ikpulu akọp mè acha gweregwen. Erieen̄ ogwu uga ìre Jerusa gwun̄ kè Jadọk. 34 Jotam îrọ inu òtatat me chieen̄ Okumugwem, kubọk Ujaya ogwu ute orọbe. 35 Ire, kpegbugbọ isi-ijọn̄ cha. Ebi ene ekpọkpọ ikisi igwa si ngwugwa, mè ikiwọp nsensi me isi-ijọn̄ cha. Îre Jotam okpọk inama Otunchit Agan̄ Inyọn̄ me lek Uwu Mbuban Okumugwem.

36 Otutuuk ofifi inu òrọrọ me ukot mkpulu kè Jotam, mè otutuuk inu îrọbe, mîge otutuuk itap me emen ikpa mfufuk echi ebi ubọọn̄ Juda. 37 Îre me ukot kan̄ ke Okumugwem obene iria Rejin ogwu ubọọn̄ Aram, mè Peka gwun̄ kè Remaliya, ibe ejibi akọn̄ esa enetim me ido Juda. 38 Jotam onenikwu ifo igọọk ebi nte nte kan̄, ebeben ifuun̄ me ere efuun̄be ebi nte nte kan̄ me ama kè Debit ogwu ute. Ayaji ogwu gwun̄ onenikana ubọọn̄ me irek kan̄.