Jotam îkana ogwu ubọọn̄ Juda
27
Jotam ìre akọp acha iba mè go mgbọ îkanabe ogwu ubọọn̄, mè ikup me Jeruselem ikpulu akọp mè acha gweregwen. Erieen̄ ogwu uga ìre Jerusa gwun̄ kè Jadọk. 2 Jotam îrọ inu òtatat me chieen̄ Okumugwem, kubọk Ujaya ogwu ute orọbe. Ire, ìkanin̄ Uwu Mbuban ìsi ìrọ ikwaan̄ kubọk ogwu ute orọbe. Ubọk geelek si, ebi ene ekpọkpọ ikiluk si ijo ugwem. 3 Jotam îkpọk inama otunchit agan̄ Inyọn̄ eyi Uwu Mbuban Okumugwem, mè irọ si owuwa ikwaan̄ me lek mgban ama me agan̄ òkup me inyọn̄ orioon̄ Ofen. 4 Jotam înama owuwa ama ile me ijọn̄ ogoon̄ ogoon̄ ido Juda, mè inama si owuwa ama mgban akọn̄ mè uwu-oket me agan̄ emen oron.5 Jotam osisi itim akọn̄ me lek ogwu ubọọn̄ ebi Amọn, mè itim ikpan̄ ema. Me acha ya, ebi Amọn ekpekpe ọmọ ikpoko mkpulu, obop kilo alata okuket ita mè efit kilo ini, mè efie kilo akpa wit ge, mè efie kilo akpa balì ge. Ebi Amọn mîkpe si inu yaage me òso acha iba mè òso acha ita si.
6 Jotam okpọkpọ ikinye lek ifo isi, mije, îtet lek inye ikije itat me isi Okumugwem Awaji kan̄.
7 Otutuuk ofifi inu òrọrọ me ukot mkpulu kè Jotam, igbaalek otutuuk akọn̄ îtimbe, mè otutuuk ofifi inu geelek îrọbe, mîge otutuuk itap me emen ikpa mfufuk echi ebi ubọọn̄ Ijeren mè ebi ubọọn̄ Juda. 8 Jotam ìre akọp acha iba mè go mgbọ îkanabe ogwu ubọọn̄, mè ikup me Jeruselem ikpulu akọp mè acha gweregwen. 9 Jotam onenikwu ifo igọọk ebi nte nte kan̄, ebeben ifuun̄ me ama kè Debit. Ayaji ogwu gwun̄ onenikana ubọọn̄ me irek kan̄.