Manasi îkana ogwu ubọọn̄ Juda
33
Manasi ìre akọp mè acha iba mgbọ îkanabe ogwu ubọọn̄, mè ikup me Jeruselem ikpulu akọp acha go mè go. 2 Manasi orọrọ ijo inu me chieen̄ Okumugwem, mije îrọbe ojelek mbuban inu cha echi ebi ido ere cha erọbe eyi Okumugwem obakbe me lek irieen̄ ema isan̄a me lek ijọn̄ ya mgbọ ebi Ijeren ekinu. 3 Manasi îkpọk inama otutuuk isi-ijọn̄ cha echi Ejikaya ogwu ute ogbugbọbe igwook, mè ikpọk inama ntook inyi Baali, mè igwuun̄ si uti yọk Asera, mè ikitọbọ ebum inyi otutuuk ntoronyan̄ òkup me akpa isinyọn̄, mè ikisi ikwaan̄ inyi. 4 Înama si owuwa ntook ngwugwa me emen Uwu Mbuban Okumugwem, òrere ere ya Okumugwem otumube ibe ke îre ere ebekimin Erieen̄ kan̄ me Jeruselem ire mgbọ geelek. 5 Înama si owuwa ntook inyi otutuuk ntoronyan̄ òkup me akpa isinyọn̄ me emen oyet egep iba òkup me Uwu Mbuban Okumugwem. 6 Îwọp si bọn ebirieen̄ kan̄ me ukan̄ isa igwa ngwugwa me iteke Ben Inọm, mè ikido ido-inu, mè ikitet ǹcha, mè ikisi ido ido-inu me ubọk ebi nriran ekwukwu jom-jòm mè ebi yọk-ofia. Manasi îrọ ogbogbo ijo inu me chieen̄ Okumugwem, mè isa me ikeya irọ Okumugwem inaan̄ ejit enenen.7 Îsa mkpọmfaka eyi îrọbe initap me emen Uwu Mbuban, òrere ere Okumugwem otumube inyi Debit mè ogwu gwun̄ Solomọn ibe, “Îre me emen Uwu Mbuban keyi, mè emen ama Jeruselem eyi ngobobe inyi lek n̄a me etete otutuuk otoko ebi Ijeren, ke ebekimin Erieen̄ n̄a isi ire mgbọ geelek. 8 Ire gaalek ke ebi Ijeren mêgbala chieen̄ ikirọ inu geelek nnyibe ema ida ibe ekerọ, òrere isusun̄ otutuuk Ikan mè orọmijọn̄ mè ikọ geelek ntọbe inan̄a me otu kè Mosis, emi m̀kpayaka ikpọk itele ibe ukot kiban̄ inan̄a me inyọn̄ ijọn̄ yi eyi nnyibe ebi nte nte kiban̄.” 9 Ire, Manasi osasa ebi Juda mè ebi ama Jeruselem ije ilọ oniin̄, ema erọrọ ijo inu igak ubọk ebi ofifi ido erọbe, eyi Okumugwem obakbe me lek ijijaka ido cha isan̄a mgbọ ebi Ijeren ekinu.
10 Okumugwem otutumu ikọ inyi Manasi mè ebi kan̄, ire, kpegban̄ utọn̄. 11 Eya orọ, Okumugwem osasa ebi ibot akọn̄ ogwu ubọọn̄ Asiria initim ebi Juda akọn̄ me lek. Ife cha etetet Manasi me agam, mè isa ukọọk ikpat itibi inwọm kan̄, mè isa mkpọn ekwe ibọp ọmọ ikam, mè isa ọmọ ifo Babilọn. 12 Me emen ujaralek kan̄, ibọbọnọ lek iweek ntap-ubọk Okumugwem Awaji kan̄, mè isiki lek enenen me isi Awaji ebi nte nte kan̄. 13 Mgbọ îriaakbe uriaak, mè ibeek Okumugwem mbeek me ubọk, Okumugwem onọnọ mbeek kan̄, mè isa ọmọ igwu ikom ika inu Jeruselem, mè ikpọk iyaka irek ubọọn̄ kan̄ inyi. Manasi oneniriọọn̄ ibe ke Okumugwem ore Awaji me atikọ.
14 Ike mgbọ okije, Manasi onanama mgban agan̄ udun̄ ama kè Debit me agan̄ ichep-ura ogbuuruk Giyọn me emen iteke, isi ire lek otunchit Irin̄, mè isa ikeya isi ikat ikana orioon̄ Ofen. Înama mgban ya ibene enenen, mè ito ebi ibot akọn̄ me otutuuk ama mgban akọn̄ geelek òkup me Juda.
15 Inenisan̄a otutuuk awaji ebi ofifi ido cha isan̄a, mè isan̄a si mkpọmfaka ya îtapbe me emen Uwu Mbuban Okumugwem ya isan̄a, mè igbugbọ otutuuk ntook ngwugwa cha echi înamabe me inyọn̄ ogoon̄ ere Uwu Mbuban Okumugwem okupbe me Jeruselem, mè ikpulu otutuuk inu cha itọọn̄ ifiin̄ me udun̄ ama. 16 Inenikpọk inama ntook Okumugwem, mè ikigwa ngwugwa esuuk, mè ngwugwa onirọ me inyọn̄ ntook ya, mè itumu inyi ebi Juda ibe eketọbọ ebum enyi Okumugwem, Awaji ebi Ijeren. 17 Ubọk geelek, ebi ene ekpọkpọ ikigwa si ngwugwa me isi-ijọn̄ cha. Ire, ema ekigwa ngwugwa cha inyi Okumugwem Awaji kiban̄.
18 Otutuuk ofifi inu òrọrọ me ukot mkpulu kè Manasi, mè uriaak kan̄ îriaakbe inyi Awaji kan̄, mè ikọ geelek ebi ìmọọn̄ inu etumube inyi ọmọ me erieen̄ Okumugwem, Awaji ebi Ijeren, mîge otutuuk itap me emen ikpa mfufuk echi ebi ubọọn̄ Ijeren. 19 Otutuuk uriaak kè Manasi, mè ike Awaji ofọọkbe ọmọ otu, mè otutuuk ijo inu îrọbe melek otutuuk mkpaka-ibot îkpakabe, mè otutuuk ere cha înamabe isi-ijọn̄, mè igwuun̄ uti yọk Asera melek mkpọmfaka cha, sabum înisiki lek mè igwu ikom, mîge otutuuk itap me emen ikpa mfufuk ebi ìmọọn̄ inu.a 20 Manasi onenikwu ifo igọọk ebi nte nte kan̄, ebeben ifuun̄ me emen uwu ubọọn̄ kan̄. Amọn ogwu gwun̄ onenikana ubọọn̄ me irek kan̄.
Amọn îkana ogwu ubọọn̄ Juda
21 Amọn ìre akọp acha iba mè iba mgbọ îkanabe ogwu ubọọn̄, mè ikup me Jeruselem ikpulu acha iba. 22 Amọn orọrọ ijo inu me chieen̄ Okumugwem, kubọk nte kan̄ Manasi orọbe. Amọn ìkigwagwa ngwugwa inyi otutuuk mkpọmfaka cha Manasi ogwu ute orọbe, mè ikitọbọ ebum inyi. 23 Amọn ìkasiki lek kan̄ me isi Okumugwem kubọk Manasi ogwu ute orọbe. Kpan̄asi ikeya, Amọn ìkpọkpọ itet lek inye ikirọ ijo inu.