Josaya înen̄e inu isun̄ itat
34
Josaya ìre acha jeeta mgbọ îkanabe ogwu ubọọn̄, mè ikup me Jeruselem ikpulu akọp acha ita mè ge. 2 Josaya îrọ inu òtatat me chieen̄ Okumugwem, mè iluk ugwem kan̄ igọọk otutuuk ubọk Debit ogwu ute ukot ikaan̄ olukbe. Ìkagwaka ìnan̄a ìtele ugwem kè Debit me agan̄ geege.3 Me òso acha jeeta me mkpulu kan̄, mgbọ îrebe si sọn̄ gwun̄, ibebene ikiweek Awaji kè Debit nte nte kan̄. Me òso akọp mè acha iba me lek mkpulu kan̄, ibebene ikisan̄a isi-ijọn̄ cha mè uti yọk Asera cha mè mkpọmfaka cha, echi ekọkọ mè echi etọtọkọ isan̄a me ido Juda mè ama Jeruselem. 4 Josaya onyinyi ida, egbugbugbọ otutuuk ntook enamabe inyi ebi kè Baali cha igwook, mè igwak otutuuk ntook nsensi cha òkup me inyọn̄ kiban̄ cha isan̄a kpai. Enenisọp otutuuk uti yọk Asera cha igwook, mè itọọn̄ otutuuk mkpọmfaka cha, echi ekọkọ mè echi etọtọkọ, ikpukpuku, mè ikpulu mkpukpuku kiban̄ cha isi igwook me inyọn̄ udọn̄-ufuun̄ ebi mgbọ ìkigwa ngwugwa inyi ema cha. 5 Josaya okpukpulu ukwuuk ebi ìkigwa ngwugwa inyi mkpọmfaka cha iwọp me inyọn̄ ntook ngwugwa cha, mè isa me ikeya igwọk lek ido Juda mè ama Jeruselem, inyi itana me isi Awaji. 6 Me ama ebi otoko kè Manasi, mè echi ebi otoko kè Iferem, mè echi ebi otoko kè Simiọn, mege isi ire ama ebi otoko kè Nafitali, mè otutuuk asabọn ama òkukup ikana ama chi, 7 Josaya ìsisi, mè igwak otutuuk ntook geelek, mè isọp otutuuk uti yọk Asera geelek igwook, mè itọọn̄ otutuuk mkpọmfaka geelek ikpukpuku, mè igwak otutuuk ntook nsensi geelek igwook me otutuuk ido Ijeren. Mgbọ îjijakabe inu chi isan̄a, inenigwu ikom ika inu Jeruselem.
8 Me òso akọp mè acha jeeta me mkpulu kè Josaya, mgbọ îgwọkbe lek otutuuk ido melek Uwu Mbuban isan̄a, inenisan̄a Safan gwun̄ kè Ajaliya mè Maseya ogwu ibot mkpulu ama, mè Jowa gwun̄ kè Jowayaji ogwu uti ikpa, ibe esi ekpọk enama ere ògbugbugbọ me lek Uwu Mbuban Okumugwem Awaji kan̄.
9 Ebi ife chi eneninu me lek kè Ilikiya ogwu òban Awaji, mè inikana ikpoko ebi ene esabe inu me Uwu Mbuban Awaji inyi. Ikpoko cha ìre echi ebi otoko kè Libai ebi ìkibem otu isotu ebọkọbe me ubọk ebi otoko kè Manasi, mè ebi otoko kè Iferem, mè ubọk otutuuk ebi Ijeren ebi ekpulube isik me akọn̄, mè ubọk ebi otoko kè Juda, mè ebi otoko kè Benjamin, mè ubọk ebi ama Jeruselem. 10 Enenikana ikpoko cha itap me ubọk ebi etobe me ibot ikwaan̄ eberọ me lek Uwu Mbuban Okumugwem. Ife chi esasa ikpoko cha ikikpe ebi ikwaan̄ ìkikpọk inama ere ògbugbugbọ me lek Uwu Mbuban ya, mè ikinen̄e isun̄. 11 Ema mîsa si okpọkọ me lek ikpoko cha inyi ebi usọ ikwaan̄ uti mè ebi ìnama uwu, ibe esa elep ewuuk ebalabe lek, mè uti ntọọk mè mgbugban echi mêsabe ikpọk inama uwu cha òkup me lek Uwu Mbuban echi ebi ubọọn̄ Juda ukot òraraka etelebe inyi igbugbọ.
12 Ebi ikwaan̄ cha enenigwuun̄ chieen̄ irọ ikwaan̄ kiban̄ ijaan̄. Jayat, mè Obidaya, ebi otoko kè Libai ìnan̄a me owot iman kè Merari; mè Jekaraya, mè Mesulam, ebi otoko kè Libai ìnan̄a me owot iman kè Koyat, ere ebi ibot ìkikpọ chieen̄ me lek ebi ikwaan̄ cha. Ofifi ebi otoko kè Libai, otutuuk kiban̄ ebi usọ nkwukwak, 13 ke eto ibe ekekpọ chieen̄ me lek ebi ikwaan̄ ubọk geelek, mè ere si ebi ibot ìkikpọ chieen̄ me lek otutuuk ebi ikwaan̄ ìkirọ chieen̄ ikwaan̄ geelek. Usini ebi otoko kè Libai si ere ebi ìge ikpa, mè ebi ibot ikwaan̄, mè ebi ìkibem otunchit Uwu Mbuban.
Mîmun̄ Ikpa Ikan Okumugwem
14 Me mgbọ ekisan̄a ikpoko esun̄be me Uwu Mbuban Okumugwem isibi, Ilikiya ogwu ngwugwa onenimun̄ Ikpa Ikan Okumugwem eyi òje me ubọk kè Mosis. 15 Ilikiya onenigwen Safan ogwu uti ikpa itumu inyi ibe, “Na, na kpọ! Mmun̄ lek Ikpa Ikan Okumugwem me emen Uwu Mbuban.” Inenikana ikpa ya inyi Safan.
16 Safan osasa ikpa ya ijet ogwu ubọọn̄, mè itumu inyi ibe, “Otutuuk ikwaan̄ onyibe ebi ikwaan̄ kwun̄, ema mêkirọ. 17 Ema mîsan̄a ikpoko òkup me Uwu Mbuban Okumugwem, mè isa ikana itap me ubọk ebi ibot ikwaan̄ mè ebi ìkirọ ikwaan̄.” 18 Safan ogwu uti ikpa onenitumu inyi ogwu ubọọn̄ ibe ke Ilikiya ogwu ngwugwa înyi ọmọ ikpa ge, mè inichili ikpa ya ifuk me isi ogwu ubọọn̄.
19 Mgbọ yaage ogwu ubọọn̄ onọbe ikọ ònan̄a me emen Ikpa Ikan ya, isasa me ufieejit itaba ofọnti òkup ọmọ me lek igwak, 20 mè inigwen Ilikiya, mè Ayikam gwun̄ kè Safan, mè Abidọn gwun̄ kè Maika,a mè Ajaya ogwu uti ikpa kan̄, mè initumu inyi ema ibe: 21 “Ìsi ìdo ida Okumugwem me ibot n̄a mè ibot ebi ìsisik me Ijeren melek Juda òfo me lek inu òkup me emen ikpa yi eyi emun̄be. Mije, unaan̄-ejit Okumugwem îmin enenen me lek kiji bak me lek ebi nte kiji kperọ ikọ Okumugwem, kubọk egebe me emen ikpa yi.”
22 Ilikiya mè ebi ogwu ubọọn̄ oriabe igbaalek kan̄ enanan̄a isi itumu ikọ melek ogwu nriran Uluda, nwa kè Salum gwun̄ kè Tokeyat,b gwun̄ gwun̄ kè Asara.c Salum yi ore ogwu òkikpọ chieen̄ me lek ere ekisun̄ ofọnti ikwaan̄ me Uwu Mbuban. Uluda ìluk me ayaya agan̄ me Jeruselem, eyi ekigwen Agan̄ Òso Iba.
23 Uluda onenitumu inyi ema ibe: “Okumugwem, Awaji ebi Ijeren ìtumu ibe ikeyi: Ìsi ìtumu ìnyi ogwu òraria enyi inu me lek n̄a ibe, 24 ke Okumugwem ìtumu ibe ikeyi: ‘M̀basasa ufialek inikeme ere yi mè ebi ìluk me emen kan̄, otutuuk ufieek-otu cha kubọk egebe me emen ikpa ya efukbe inyi ogwu ubọọn̄ Juda ke mbasa ikeme ema. 25 Mije, ema mîyaak emi, mè iyaka ikisi iwọp nsensi inyi ebi kè ofifi awaji, mè isa ijo irọrọ kiban̄ cha irọ ibe ejit inaan̄ emi enenen me lek ere yi. Unaan̄-ejit n̄a me lek kiban̄ ìkposiki.’ 26 Ìtumu ìnyi ogwu ubọọn̄ Juda ogwu òraria enyi inu ibe enyi enedo otu Okumugwem ibe, ‘Òfo me lek ikọ ya onọbe, Okumugwem, Awaji ebi Ijeren ìbe ikeyi: 27 Mije owu ofieekbe ejit, mè igele lek isiki me isi Awaji, mè itaba ofọnti òkup owu me lek igwak, mè ito ito me isi n̄a, mgbọ owu onọbe ikọ emi Awaji ntumube ikeme ere yi mè ebi ìluk me emen kan̄, emi si nra inọ ida ito kwun̄. Emi Okumugwem ntumu. 28 Eya orọ, owu òkposa chieen̄ kwun̄ imun̄ otutuuk ufialek cha mbaria itap me ere yi. Mâtele ibe owu òkwu òfo ògọọk ebi nte nte kwun̄, mè eben owu efuun̄ me esuuk.’ ”
Ebi osat cha esasa etip ya ifo isi ilook ogwu ubọọn̄.
29 Ogwu ubọọn̄ onenigwen otutuuk ebi ugane Juda melek Jeruselem ititiin̄, 30 mè inisa otutuuk ebi ido Juda, mè otutuuk ebi Jeruselem, melek ebi ngwugwa, mè ebi otoko kè Libai, mè otutuuk ebi ene, ebi asasa melek ebi ilile, igbaalek kan̄ ije isi Uwu Mbuban Okumugwem. Inenifuk otutuuk ikọ egebe me emen Ikpa Inyan̄a-ibot ya emun̄be me Uwu Mbuban Okumugwem isibi inyi ema otutuuk ene enọ. 31 Ogwu ubọọn̄ oneninene ikeke me irek unye kan̄ kubọk ogwu ubọọn̄, me ebon atà me emen Uwu Mbuban, mè ikpọk irọ ayaya inyan̄a-ibot me isi Okumugwem, ibe ke ọmọ môgọọk Okumugwem, mè ikirọ ikọ îtọbe, mè inu geelek înyibe ida ibe erọ, mè ikirọ si orọmijọn̄ Okumugwem me otutuuk ejit kan̄ mè otutuuk efuuk kan̄, mè ikirọ otutuuk otu inyan̄a-ibot Okumugwem, kubọk egebe me emen Ikpa Ikan ya.
32 Ogwu ubọọn̄ onenirọ ibe otutuuk ebi ìkup me Jeruselem, mè ebi otoko kè Benjamin ebọkọ si inyan̄a-ibot ya etap. Ebi Jeruselem si echechieek, igọọk me lek inyan̄a-ibot Awaji, òrere Awaji ebi nte nte kiban̄.
33 Josaya ogwu ubọọn̄ osasan̄a otutuuk òchichaka inu cha geelek isan̄a me otutuuk inyọn̄ ijọn̄ ebi Ijeren, mè irọ inyi otutuuk ebi ìluk me Ijeren ekeriaak Okumugwem Awaji kiban̄. Me otutuuk mgbọ ọmọ okupbe me ugwem, ebi Ijeren kpelọlọ ikekitọbọ ebum inyi Okumugwem Awaji ebi nte nte kiban̄.