Mîkpọk inama mgban ama Jeruselem
3
Ikeyi ke ekpọk inama mgban ama Jeruselem: Eliasibu ogwu òban Awaji mè ebi ngwugwa ogbo kan̄, edasi ibene inama mgban ama ya. Ema eneninama otunchit Arọọn̄, mè ijeen̄ afọn̄ iso lek, mè ifaka itap me ubọk Awaji, mè inama mgban̄ ama ya mege isi ire lek Uwu-oket Efit, mè inama si isi ire lek Uwu-oket Ananeli, mè ifaka itap me ubọk Awaji. 2 Ebi Jeriko enenibọkọ me otubọk kiban̄ inama inyi isi. Jakuru gwun̄ kè Imiri onenibọkọ si me otubọk ebi Jeriko inama inyi isi.3 Bọn kè Asenaya enenikpọk inama otunchit Irin̄. Mînwunwaan̄ ogbugboon̄ ubọk afọn̄, mè ijeen̄ si otutuuk afọn̄ òje me lek, mè itap otutuuk m̀gba mè olọkọrọ òje me lek iso me irek kiban̄. 4 Meremot gwun̄ kè Uraya, gwun̄ kè Akoji onenibọkọ me otubọk bọn kè Asenaya inama inyi isi. Mesulam gwun̄ kè Berekaya gwun̄ kè Mesejaben onenibọkọ me otubọk kan̄. Jadọk gwun̄ kè Bayana onenibọkọ me otubọk kan̄ inama inyi isi. 5 Ebi ama Tekowa enenibọkọ me otubọk kan̄. Ire, ebi isi ile ama Tekowa kpechieek itatap lek me lek ikwaan̄ ya me irak ebi etobe ibe ekekpọ chieen̄ me lek ikwaan̄ ya.
6 Joyada gwun̄ kè Paseya, mè Mesulam gwun̄ kè Besodeya enenigbaan̄ ubọk ikpọk inama otunchit Jesana.a Mînwunwaan̄ ogbugboon̄ ubọk afọn̄, mè ijeen̄ si otutuuk afọn̄ òje me lek, mè itap otutuuk m̀gba mè olọkọrọ òje me lek iso me irek kiban̄. 7 Melatia ogwu Gibiọn, mè Jadọn ogwu Meronot, ìrere ebi Gibiọn mè Mijipa, ìkup me irak ogwu ibot mkpulu agan̄ usaba okwaan̄ Yuferetis, enenibọkọ me otubọk kiban̄. 8 Ujiyen gwun̄ kè Ariyaya, ene ge me lek ebi usọ ikwaan̄ alata araran̄, onenibọkọ me otubọk kiban̄ inama inyi isi. Ananiya, ene ge me lek ebi ìkirom aran̄ utop olu, onenibọkọ me otubọk kan̄ inama mgban Jeruselemb isi ire lek Uwele Mgban. 9 Refaya gwun̄ kè Uru, ogwu òkikpulu okpọkọ agan̄ ge me Jeruselem, onenibọkọ me otubọk kè Ananiya inama inyi isi. 10 Jedaya gwun̄ kè Arumafu onenibọkọ me otubọk kan̄, mè inama agan̄ òkikpọ uwu kan̄. Atus gwun̄ kè Asabineya onenibọkọ me otubọk kan̄ inama inyi isi. 11 Malikija gwun̄ kè Arim mè Asubu gwun̄ kè Payat-Mowabu enenibọkọ me otubọk kan̄ inama agan̄ ògọgọọk mege isi ire lek uwu-oket Orioon̄ Fituru. 12 Salum gwun̄ kè Aloyes ogwu ibot mkpulu okpọkọ agan̄ ge me Jeruselem, melek bọn ebibaan̄ kan̄, enenibọkọ me otubọk kan̄.
13 Anun mè ebi ama Janowa enenikpọk inama otunchit Iteke, mè inama isan̄a, mè ijeen̄ si otutuuk afọn̄ òje me lek, mè itap otutuuk m̀gba mè olọkọrọ òje me lek iso me irek kiban̄. Ema mîkpọk inama si oke mgban òwewele iso efit ejit iba mè akọp go, mege isi ichak me lek otunchit Ifin Anam.
14 Malikija gwun̄ kè Rekabu, ogwu ibot mkpulu agan̄ Bet Akerem, onenikpọk inama otunchit Ifin Anam ya, mè ijeen̄ si otutuuk afọn̄ òje me lek, mè itap otutuuk m̀gba mè olọkọrọ òje me lek iso me irek kiban̄.
15 Salun gwun̄ kè Kolu-Oje, ogwu ibot mkpulu agan̄ Mijipa onenikpọk inama otunchit Ogbuuruk, mè ijeen̄ si otutuuk afọn̄ òje me lek, mè itap otutuuk m̀gba mè olọkọrọ òje me lek iso me irek kiban̄. Îre ọmọ si okpọk inama mgban òkpuku Siela,c eyi òkup me agba lek ògọ Ajakajak Ogwu Ubọọn̄ igbaalek, mè inama mgban ama mege isi ire lek otitop ekisa ije inene isi ama kè Debit. 16 Neyemaya gwun̄ kè Ajibuk ogwu ibot mkpulu ìkike iba agan̄ Bet Suru onenibọkọ me otubọk kan̄ inama isi ire oke ere òkibene chieen̄ ikpọ ere ekifuun̄ ebi owot iman kè Debit, mè isi ire lek òkpuku mun̄ melek Uwu ebi Usọ Akọn̄.
17 Ebi otoko kè Libai enenibọkọ me otubọk kan̄. Ogwu adasi, Reyum gwun̄ kè Bani, obọkọ me otubọk kan̄. Asabiya ogwu ibot mkpulu ìkike iba agan̄ Keyila onenibọkọ me otubọk kè Reyum inama inyi ebi agan̄ kan̄. 18 Ebi ngwan̄ kan̄ enenibọkọ me otubọk kan̄. Ogwu adasi, Bebaid gwun̄ kè Enadadi ogwu ibot mkpulu ìkike iba agan̄ Keyila keyilọ, obọkọ me otubọk kan̄. 19 Ejeri gwun̄ kè Jesuwa ogwu òkikpulu Mijipa onenibọkọ me otubọk kan̄, mè inama okpọkọ agan̄ keyilọ, ibene me ere òbene isi ida uwu nroon̄ akọn̄ mege isi ire ibot ebum mgban ya. 20 Baruk gwun̄ kè Jabai osasa me ikpele ulọk inama ofifi okike, ibene me ibot usọk isi ire lek oniin̄ ekije isi uwu kè Eliasibu ogwu òban Awaji. 21 Meremot gwun̄ kè Uraya gwun̄ kè Akoji oneninama ofifi okike, ibene me otu oniin̄ ekije isi uwu kè Eliasibu ogwu òban Awaji isi ire òta kan̄.
22 Ebi ngwugwa ìkiluk me asabọn ama òkukup ikana ere ya enenibọkọ me otubọk kan̄. 23 Benjamin mè Asubu enanama oke mgban òkup me isi uwu kiban̄. Ajariya gwun̄ kè Maseya gwun̄ kè Ananiya onenibọkọ me otubọk kiban̄ inama oke mgban òkup igba uwu kan̄. 24 Binuwi gwun̄ kè Enadadi okpọkpọk inama ofifi oke mgban ya ibene me uwu kè Ajariya isi ire ibot ebum ya, mè isi ire ibot usọk mgban ya. 25 Palan gwun̄ kè Ujai onenibọkọ me otubọk kan̄ inama, ibene me oke ere òkibene isi ida ibot usọk ya mè uwu-oket òkukup igba uwu ogwu ubọọn̄ òkup me agan̄ inyọn̄ ere ebi ìkibem ogwu ubọọn̄ elukbe me emen oyet egep, inyi isi. Pedaya gwun̄ kè Paros, 26 mè ebi bọn ikwaan̄ Uwu Mbuban ebi ìkiluk me inyọn̄ orioon̄ Ofen enenibọkọ me otubọk kè Palan inama isi ire ere òbene isi ida otunchit Mudim eyi òkup me agan̄ mbum-ura òfo ere uwu-oket òsọsọọk isibi okekebe. 27 Ebi Tekowa enenikpọk ibọkọ me otubọk kiban̄ inama ibene me oke ere uwu-oket òsọsọọk isibi ya okekebe isi ire lek mgban Ofen.
28 Ebi ngwugwa enenibọkọ me otubọk ebi Tekowa inama, ibene me otunchit Inyinya. Ogwu ikup, ìnama me isi uwu kan̄. 29 Jadọk gwun̄ kè Imeri onenibene me otubọk kiban̄ inama oke mgban òkup me isi uwu kan̄. Semaya gwun̄ kè Sekanaya ogwu òkibem otunchit agan̄ Mbum-ura onenibọkọ me otubọk kiban̄. 30 Ananiya gwun̄ kè Selemeya, mè Anun, òso ene gweregwen me lek bọn kè Jalafu, enenibọkọ me otubọk kan̄ inama ofifi okike. Mesulam gwun̄ kè Berekaya onenibọkọ me otubọk kiban̄ inama okike mgban òkibene isi ida uwu ere îkiluk. 31 Malikija, ene ge me lek ebi usọ ikwaan̄ alata araran̄, onenibọkọ me otubọk kan̄ inama mege isi ire lek uwu ebi bọn ikwaan̄ Uwu Mbuban mè ere ebi mbit elukbe, eyi òkibene isi ida otunchit Igobo Ene, mè isa isi ire uwu inyọn̄ òkup me ibot ebum mgban ama. 32 Ebi usọ ikwaan̄ alata araran̄ mè ebi mbit enenibọkọ me otubọk kè Malikija inama ibene me lek uwu inyọn̄ òkup me ibot ebum mgban ama inire otunchit Arọọn̄.