Mîtap ukput me lek ikwaan̄ ikpọkpọk inama mgban ya
4
Mgbọ Sambalat onọbe ibe ke eji mîbene ikwaan̄ me lek mgban ama Jeruselem, înaan̄ ejit enenen, unaan̄-ejit ya osisisaak ọmọ. Ikekisa ebi Ju irọ ochak. 2 Ikekitumu me isi ebi melek kan̄ mè ebi akọn̄ Sameria ibe, “Keke ke nkwukwu ebi Ju chi ekirọrọ mọnọ? Ìre ema ekikeek ibe ke ema mêkọt inama mgban yi, mè igwa ngwugwa, mè irọ otutuuk inu isan̄a me usen ge gaalek ni? Ìre ife chi ekikeek ibe ke ema mêkọt irọ inyi ewuuk ukan̄ otakabe chi òkukup me emen èdọ mkpukput chi eyaka enye lek, mè ekana inu mêkọtbe ikpọk isa isi ikwaan̄ mọnọ?”3 Tobaya ogwu Amọn okukup me agba lek kan̄ ikitumu ibe, “Inu ya ema ekinama ibe ìre mgban, ikerere ekpuuruk ikike oje me inyọn̄, ìbogbugbugbọ mgban ewuuk kiban̄ ya igwook!”
4 Nneniriaak uriaak ibe, “Jei, Awaji kiji, soso nọ eji ida, mije, eji mîkana inu ochak. Soso, yaka ochak kiban̄ gwook ema me ibot! Rọ si inyi ema ekana ebi usun̄ akọn̄ me ofifi ido! 5 Kakpọ ijo kiban̄ ìlọ chieen̄, katetele si ìnyi ema, mije, ema mîrọ inu òbotap unaan̄-ejit me ejit ebi ìkinama mgban chi.”a
6 Eji etetet lek inye inama mgban ya ire ìkike iba ubene kan̄, mije, otutuuk ene esa ejit ge isi ikwaan̄.
7 Me mgbọ Sambalat, mè Tobaya, mè ebi Arabu, mè ebi Amọn, mè ebi Asidọdu enọbe ibe ke ikwaan̄ ikpọkpọk inama mgban ama Jeruselem òkije inyi isi, ke mêkichit ere cha geelek ògbugbugbọ me lek mgban ya, ema enanaan̄ ejit enenen. 8 Ema enenigbaan̄ itaka otọt ibe enejibi akọn̄ enin̄ Jeruselem, mè etap wọlọwọlọ me emen ama ya. 9 Ire, eji erariaak uriaak igwen Awaji kiji, mè inito ebi mbem ikana ama eririeen̄ mè ikarek, inyi ema ekakọt ìraka ìnin̄.
10 Ebi Juda enenikitumu ibe, “Lek ebi ikwaan̄ îwọ enenen. Ire, okpọkọ ewuuk mè mkpukput ìkpọkpọ ijot si ere. Eji kpebeyaka ikọt ikpọk inama mgban ama yi igak ikeya.”
11 Ebi oriara kiji ekekigugo lek ibe, “Sabum ema eberiọọn̄, sabum ema ebemun̄ eji, eji mîra iraka inin̄ etete kiban̄, mè ikpan̄ ema isan̄a kpai, mè irọ inyi ikwaan̄ ya ifieek.”
12 Ebi Ju ìkiluk me agba lek kiban̄ isikinu me lek kiji, mîra inikilook eji ibe, agan̄ geelek eji mêtapbe isi, ke ife chi ebetitim eji akọn̄ me lek. Mîlook eji ikeya otuuk kè akọp mgbọ.
13 Nnenito ebi ene me ere geelek mgban ikabenege, mè ere geelek kpenama-nu ichit, ibe ekebem. Ǹto ema me otoko me otoko, melek oge akọn̄, mè otunwa, mè ogbaan̄ me ubọk. 14 Mgbọ mmun̄be ike inu okupbe, nnenigwen ebi ibot ama, mè ebi ibot mkpulu, mè otutuuk ebi ene ititiin̄, mè initumu inyi ema ibe, “Ikafieek owot me lek ife cha. Ìkeek Ogwukaan̄-ene Awaji kiji, ogwu òmimin mè ikaan̄ ukpook! Ìtet lek ìnye ìtim akọn̄ me ibot ebi ngwan̄ kinyi, mè bọn ebirieen̄ kinyi mè bọn ebibaan̄ kinyi, mè ebi nwa kinyi, mè uwu kinyi.”
15 Ebi oriara kiji enọnọ ibe ke eji mîriọọn̄ otitọt kiban̄, mè iriọọn̄ si ibe ke Awaji îfiat otitọt kiban̄. Eji otutuuk ene egwugwu ikom isi lek mgban ya, isi ikinama inyi isi.
16 Bene me usen ya, okpọkọ me lek ebi n̄a ekisi ikwaan̄, okpọkọ keyilọ ekiben otunwa, mè agbọ, mè ògbaan̄ mè ofifi nroon̄ akọn̄ ikaan̄ me ubọk ikibem ere. Ebi ibot ikwaan̄ edọdọmọ lek kiban̄ isi ikeke me udun̄ ebi Juda geelek, 17 ike ema ekinama mgban ya. Ebi ìben nroon̄ ikwaan̄ geelek ekekisa ubọk ge iben nroon̄ ikwaan̄, mè isa ubọk agan̄ keyilọ itet nroon̄ akọn̄. 18 Ene geelek òkinama mgban̄ ìkikwakwaan̄ nroon̄ akọn̄ me agba ebon kan̄ mgbọ îkisi ikwaan̄. Ire, ogwu òkiwut otita onikeke igba emi.
19 Nnenitumu inyi ebi ibot ama, mè ebi ibot mkpulu, mè otutuuk ebi ene ibe, “Okike mgban ebenama îjọn̄ọ enenen, mè iwele. Ikeya si, eji ebi ikwaan̄ mîyat lek kiji iwele ikeke ijọn̄ọ ere ge me lek ge. 20 Eya orọ, ere geelek onọbe ida otita okitaan̄, libi na me ere ya na titiin̄ melek kiji! Awaji kiji môtim akọn̄ me ibot kiji!”
21 Ikeya ke eji ekisi ikwaan̄ usen geelek bene me agan̄ egwe isi ire ikakwun̄ mgbọ ntoronyan̄ osibibe, usini kiji ekinama mgban, sà usini kiji ekiben nroon̄ akọn̄ ikaan̄ me ubọk ikibem ere. 22 Nnenitumu si inyi otutuuk ene mgbọ ya ibe, “Isire ikakwun̄, ìkup me emen ama Jeruselem, kpa ogwu mè ogwu ikwaan̄ kan̄, inyi ema ekana ebi mbem enyi eji me eririeen̄, mè ekegọọk enama mgban me ikarek.” 23 Emi, mè ebi ngwan̄ n̄a, mè ebi melek n̄a, mè ebi mbem ìkup melek n̄a, eji kpewọọk ofọnti me lek mgbọ geege. Ene geelek ìkakaan̄ nroon̄ akọn̄ kan̄ me ubọk mgbọ geelek.b