2 Ejira ogwu ngwugwa onenisan̄a Ikpa Ikan ya isibi me isi otutuuk ebi ìtitiin̄ me ere ya, ebirieen̄ mè ebibaan̄, mè ebi geelek ìbekọt itet ibot me lek inu ema enọbe. Usen ya ìre adasi usen me onyan̄ jaaba.^a 3 Ejira onenifuk Ikpa Ikan ya me oyet ile me isi otunchit Mudim, me isi ebirieen̄ mè ebibaan̄ mè otutuuk ebi ìbekọt itet ibot me lek inu ema enọbe. Îfuk Ikpa ya bene me ewelegwe mege isi ire ejit ikarek. Otutuuk ene erọriọọn̄ ubọk ikigban̄ Ejira okifuk Ikpa Ikan ya isibi.

4 Ejira ogwu uti ikpa ìnene ikeke me inyọn̄ ubene obubot esabe uti inama inyi orirọ ya. Matitiya, mè Sema, mè Anaya, mè Uraya, mè Ilikiya, mè Maseya ekekeke me ubọk agan̄ ulom kan̄. Pedaya, mè Misayen, mè Malikija, mè Asum, mè Asibadana, mè Jekaraya, mè Mesulam ekekeke me ubọk agan̄ ujit kan̄.

5 Ejira onenichili ikpa ya me chieen̄ otutuuk ene. Otutuuk ene mîmọọn̄ ọmọ iso, mije ere îkekebe ya obenebe iraka ema ibot. Mgbọ îchilibe ikpa ya, otutuuk ene enanan̄a ikeke me ukot. 6 Ejira oneninyi Okumugwem Awaji ilile itọn̄, otutuuk ene ebebene ubọk iba kiban̄ ifo inyọn̄, mè ikichieek igwook ibe, “Ikup ikeya! Ikup ikeya!” Otutuuk ene egegele igwook, mè ikana isi ichit me ijọn̄, mè itọbọ ebum inyi Okumugwem.

7 Ike otutuuk ene ekekebe me ere ya, Jesuwa, mè Bani, mè Serebiya, mè Jamin, mè Akubu, mè Sabetai, mè Odiya, mè Maseya, mè Kelita, mè Ajariya, mè Josabadi, mè Yanan, mè Pelaya ebi otoko kè Libai enenikije ikana me etete ebi ene, mè ikijeen̄ ema Ikan cha. 8 Ema ekekifuk ikpa Ikan Awaji ya, mè ikikana itap me usem ema ekinọ, mè ikikpa iwele, inyi ebi ene ekegobo inu cha ekifuk etet.

9 Neyemaya ogwu ibot mkpulu, mè Ejira ogwu ngwugwa mè ire si ogwu uti ikpa, mè ebi otoko kè Libai ebi ìkijeen̄ ebi ene Ikan ya, enenitumu inyi otutuuk ene ibe, “Cherekeyi ìre usen òkup mbuban inyi Okumugwem Awaji kinyi. Eya orọ, ikayaka ìfieek ejit, ikayaka ìto ito.” Ema etumu ikọ ya, mije, otutuuk ene mîbene ikito ito mgbọ ekinọ inu Ikan cha okitumu.

10 Neyemaya onenitumu ibe, “Ìfon, mè ìsi ìrie atalek inorie, mè ìnwọ miin̄ òtotop, mè ìche si ìnyi ebi kpekaan̄. Cherekeyi ìre usen òkup mbuban inyi Okumugwem Awaji kiji. Ikafieek ejit, mije, unwọọn̄ Okumugwem onyibe enyi ore unye kinyi.”

11 Ebi otoko kè Libai enenikikat ebi ene ejit ibe, “Ìriaan̄ ere, ikayaka ìfieek ejit. Mije, cherekeyi ìre usen òkup mbuban.”

12 Otutuuk ene eneniyat inan̄a me ere ya, isi irie inorie, mè inwọ miin̄, mè iche inorie mè miin̄ inyi ebi kpekaan̄, mè ikirie ijọk me ikpele unwọọn̄. Mije, ema mînitet ibot me lek ikọ Ikan ya eyi ejeen̄be ema.

13 Me ofit iwele kan̄, ebi ibot otutuuk owot iman, mè ebi ngwugwa, mè ebi otoko kè Libai enenititiin̄ melek kè Ejira ogwu uti ikpa, inyi ema eneriọọn̄ ubọk ekween̄ inu egebe me emen Ikan ya. 14 Ema enenimun̄ ere egebe me emen ikpa Ikan ya ibe ke Okumugwem înyi Mosis ida ibe mè ebi Ijeren ekeluk me emen uwu nlak me mgbọ Ijọk eyi òso onyan̄ jaaba. 15 Mîge si me ere ya ibe mè elook etip ekana otutuuk ama kiban̄ geelek, mè elook si me Jeruselem ibe, “Ìsibi ìsi inyọn̄ ogoon̄ ìsi ìkep otu agọọk uti olifu, mè agọọk uti olifu oron, mè uti mitulu, mè nlak asaak, mè otu agọọk uti geelek òkaan̄ inwan̄ iwa me lek, mè ìsa ìninama uwu nlak, ike egebe me ikpa Ikan.”

16 Ebi ene enenisi ikeen̄ otu agọọk uti cha isa ininama uwu nlak me inyọn̄ otoon̄-uwu kiban̄, mè emen oyet egep kiban̄, mè emen oyet egep Uwu Mbuban Awaji, mè oyet ile eyi òkup me isi otunchit Mudim, mè inama si me oyet ile eyi òkup me isi otunchit Iferem. 17 Otutuuk ọgbọn̄ ebi ìnan̄a me usun̄ akọn̄ ika eneninama uwu nlak inyi lek kiban̄, mè iluk me emen. Akarake ukot kè Josuwa gwun̄ kè Nun mege inire usen keya, ebi Ijeren kperarak irie mbet lek ijọk Uwu Nlak òkup ikeyi. Ubelejit kiban̄ omimin enenen!

18 Usen geelek, bene me adasi usen ijọk ya si re òta, Ejira ìkifufuk ikpa Ikan Awaji inyi ema. Ema ererie ijọk ya usen jaaba. Me òso usen jeeta, ema egbagbaan̄ ititiin̄, ike orọmijọn̄ odobe.